Read kapsiki 2 Wəshi nyi Mene Ka Meghe 12 Bible Online

2 Wəshi nyi Mene Ka Meghe 12 - kapsiki bible

2 Wəshi nyi Mene Ka Meghe 12

¹Ma kwa gweɗakwete hɛɗia ŋkɛ Robowam ba'a kwa mtsehete berete ŋkɛ, pa wəfəyite wəsə mahalegəa Mahwətə, tsagha menete mbelia ŋkɛ perə.

²Ma mbe kwa mcɛfe ta va ta Robowam mbe meghe ne, pa meghea ka Ɛzhipte Shishak se kampa le Zhɛrəzalɛm: kwa bezemte nda ghena hɛ ke Mahwətə.

³Shishak ne, te ghəa ka sewajɛ nyi nza wəmata gədəwə va hɛ 1.200, ka zleɗe gədəwəa lɛmə 60.000 ba'a ka sewajɛ kwele kwele kaɓelatema hɛ mbeli kwa sebe ta ŋkɛ same kwa Ɛzhipte: ka Libi, Səwkot ba'a ka Ɛtiyopi.

⁴Pa zehwe meleme kwa berete berete nyi te hɛɗia Zhəwda, kalə mbe kema mbe kema hwa'a mbe Zhɛrəzalɛm.

⁵Pa nde mɛ ŋkwa Shemaya se sha Robowam ba'a sha mbeli nyi te ghə mbe Zhəwda, nyi ketsenete geva mbe Zhɛrəzalɛm, kwa nza Shishak takwa takwa kadzembe. Ma ke sha hɛ: «Wa nya ghena nya gezete Mahwətə nya: nahe yɛ keneghakɛ ɗa! 'Ya perə ne, kapele nda ŋayɛ 'ya ke berete ta Shishak.»

⁶Pa meghe le mbelia jama ta ka Israyɛl ɗepete fete ta nci: «Kaganda ghena ta Mahwətə!»

⁷Nakɛma ta Mahwətə ne, pa gezete nda ghena ke Shemaya zhɛkwa: «Ma kwa nza ŋkɛ nahe hɛ keɗepete fete ta nci ne, kazamte hɛ 'ya bətə we. Laka berete ta mbeli nyi ɓɛhwɛ ne, kambele hɛ 'ya, kwa nza ŋkɛ nahe 'ya kegweɗakwete hwepe ta wənəa ɗa va Zhɛrəzalɛm, kwa pelave nda hweŋkwa 'ya ke Shishak kazamte melemea shɛ.

⁸Ya tsagha shɛ ŋkɛ ne, nda hɛ kanza mbeyitere berete ta Shishak, kezha ɗepete ghala nya kwelɛ hawe va 'ya le hawe va ka meghe nyi te hɛɗi.»

⁹Pa Shishak, meghea ka Ɛzhipte ɗate Zhɛrəzalɛm. Pa ŋkɛ fəhwe pɛtɛa wəshi nyi wəshi nyi nza zləvə te hɛ nyi mbe ghɛa Mahwətə ba'a nyi ki ghɛa meghe. Pɛtɛa wəshi fəhwe ŋkɛ, pa le yɛ gelə kwa mze kwa tere tere nyi vɛsəte Salomon.

¹⁰Kezha ve kadzete ŋkwa nci ne, pa meghe Robowam vɛsəte kwa mze kwa tɛawetɛa, pa dapave nda hɛ te dzeve ke ka meghea kɛfia ka sewajɛ nyi keya degha meghe.

¹¹Ma yayata və nya lə meghe kadzembe ghɛa Shala Mahwətə ne, kalə ka ya ŋkwa kafə gelə, kwa sebe ta ŋkɛ, kazhɛne hɛ kadzembe cɛa ka ya ŋkwa.

¹²Kesərəakɛ hwepe wənəa ŋkɛ Mahwətə kənəa Robowam kazamte bətə we, kwa nza ŋkɛ nahe Robowam keɗepete fete ta ŋkɛ. Nya za ma ɓiyitsa ne, na mbeli kesləyi wəshi ganji mbe hɛɗia Zhəwda.

¹³Meghe Robowam nya nza meghekɛ kaNama, wəzha ta ka Amon ne, pelɛ Zhɛrəzalɛm menehwe meghe ŋkɛ. Kwele kwele se berete va meghea ŋkɛ. Va ta ŋkɛ wəfaɗemsə kwetɛŋeghəmbe nda dzembe meghe ŋkɛ. Va meŋe mberefaŋeghəmbe menete ŋkɛ mbe meghe pelɛ Zhɛrəzalɛm. Kwa nza ŋkɛ ne, gheŋkɛ ya kameleme nya ntave Mahwətə te hɛɗia pɛtɛa ka Israyɛl kezha ncɛ nza ta ŋkɛ hwa mbelia ŋkɛ.

¹⁴Wəshi kwa ndiremi yamenete Robowam, kese kapele wənəa ŋkɛ werete kezha zele Mahwətə we.

¹⁵Ma wəshi nyi menete Robowam, se te kwa ghate pa te kwa keɗaŋe ne, nahe hɛ kenza kerafe rafe mbe palepa ta wəshi nyi menete nde mɛ ŋkwa Shemaya ba'a mbe ŋa nde kelɛŋə Ido. Keveci keveci se yɛ Robowam mbe mpa le Zhɛrobowam.

¹⁶Ma kwa mte ŋkɛ ne, pa mbeli lamte ŋkɛ mbe meleme ta David. Wəzege ta ŋkɛ Abiya nde kelete meghe te ŋkwa ŋkɛ.