Read kapsiki 2 Wəshi nyi Mene Ka Meghe 16 Bible Online

2 Wəshi nyi Mene Ka Meghe 16 - kapsiki bible

2 Wəshi nyi Mene Ka Meghe 16

¹Ma mbe kwa mahekenemsə ŋkwaŋeghəmbe ta va ta Asa mbe meghe ne, pɛkwe Basha, meghea ka Israyɛl se kampa le hɛɗia Zhəwda. Ntake kaŋa zli kwa berete yitea meleme ta Rama kezha fɛa yɛ Asa le ka Zhəwda kedzeghwa kala nya ɗe hɛ laka ŋkwa shɛ.

²Pa Asa ntave mze kwa ghwə ghwə ba'a mze kwa tere tere shave mbe ghɛa Shala ba'a shave hwa wəshia meghe, pa ghweneghe hɛ kadzembe Damas ke Bɛn-Hadad, meghea ka Siri, ma ke shɛ:

³«Menete ɓə jikə geva, gha le 'ya, kala nya se ka yitehɛ ɓə. Newe ma tse gi, 'ya kaghwene ŋa mze kwa ghwə ghwə le mze kwa tere tere kawəsə gəmə. Kwiɗi nehemte jikə geva ta ŋayɛ le Basha, meghea ka Israyɛl kezha kelemte ka sewajɛa ŋkɛ ŋkɛ te hɛɗia ɗa.»

⁴Pa Bɛn-Hadad yɛte zəzə ta Asa pa ghwenakɛ meghea ka sewajɛa ŋkɛ kampa le meleme nyi mbe Israyɛl. Pa hɛ kelehwe Yon, Dan ba'a Abɛl-Mayim, tsagha yɛ meleme ta Nɛftali pɛtɛ nyi wəfərəakɛ wəshi kezeme mbeli mbe hɛ.

⁵Ma kwa fate ghena shɛ Basha ne, pa ghereŋete slene, kasərəakɛ ŋa zli kwa berete yitea Rama.

⁶Pa meghe Asa fəte pɛtɛa ka Zhəwda yitea ghəa ŋkɛ. Pa hɛ fəhwe yɛ pelɛ ba'a yɛ sheghwə nyi tsenete Basha kezha ŋa zli yitea Rama. Pa Asa ŋeyite zli yitea Gɛba ba'a Mispa le hɛ.

⁷Ma vəa ŋkwa shɛ ne, pa nde mɛ ŋkwa Hanani se sha Asa, meghea ka Zhəwda, ma ke shɛ: «Kese na ka'yɛwe kemane ta Shala Mahwətə ta ŋa we. Meghea ka Siri yaɗehwe dɛŋe geva na te! Ma kwa menete na kala nya, nahe na kambelakɛ ka sewajɛa ka Siri shave mbe dzeve ta ŋa.

⁸Ashɛ ka Ɛtiyopi le ka Libi kejikəte ka sewajɛ nyi le berete, kwele kwele wəmata gədəwə le ka zleɗe gədəwəa lɛmə kwa shɛma ɓela wəka? Ndagwara nahe Mahwətə kendeke ŋa hɛ, va nya dɛŋe geva na te.

⁹Kwa nza ŋkɛ ne, nahe Mahwətə keveyi ntsə ta ŋkɛ te hɛɗia pɛtɛ, kezha kemane mbeli nyi keɗe le wənəa nci pɛtɛ. Ama tsetsenya gɛ, nahe na kemenete wəsə kala gezhi, vatse, se te ɓeshi, mba na kanehe le yɛ mpa we.»

¹⁰Mɓɛke Asa hwepete wənə va nde mɛ ŋkwa. Pa keseyi kwa daŋgayɛ, kwa nza ŋkɛ ghena ta ŋkɛ nde hwepete nda wənə. Mbe vəa shɛnyɛ ne, ntake Asa kasa nda yaka ke kweci mbeli hwa mbelia ŋkɛ.

¹¹Ma kweci nyi menete Asa, se te nyi kaghate hwa'a te nyi kekeɗaŋe ne, nahe hɛ kenza kerafe rafe mbe palepa ta wəshi nyi menete ka meghea ka Zhəwda le ŋa ka Israyɛl.

¹²Ma mbe kwa mahekenemsə meslighəmbe ta va ta ŋkɛ mbe meghe ne, pa zereghe keseve Asa kwele kwele mbe seɗa, ma nya hi ŋkɛ kazele kemane va Mahwətə ɓetəkə ne, pa ŋkɛ lənyɛ kazele kemane va ka mene ghwɛ.

¹³Ma kwa mtenyɛ Asa mbe kwa wəfaɗemsə kwetɛŋeghəmbe ta va ta ŋkɛ mbe meghe ne,

¹⁴pa mbeli lamte ŋkɛ kwa kwete hwa kwele nyi late ŋkɛ mbe meleme ta David. Pa mbeli veyi geva ta ŋkɛ te diɓere nya tsenete mama ta 'wərdə mbeli kwele kwele, kala nyi hite ka mene slene ta 'wərdə tekeleke, pa mbeli teremte kweci kwele kwele te zləvəa ŋkɛ.