Read kapsiki 2 Wəshi nyi Mene Ka Meghe 18 Bible Online

2 Wəshi nyi Mene Ka Meghe 18 - kapsiki bible

2 Wəshi nyi Mene Ka Meghe 18

¹Kwele kwele se wəshi va Zhozafat ba'a zləvə. Pa jikəte ghɛa ŋkɛ laka wəme geva le ŋa Akab, meghea ka Israyɛl.

²Ma kwetere wəmbəa kweci va kwa sebe ta ŋkɛ ne, ntəŋə Zhozafat lə sha Akab pelɛ Samari. Kezha kemaneve hɛ le mbeli nyi yite ne, pa Akab slamte ghə te timɛti ba'a mcɛmcɛli kwele kwele. Ma kwa sebe ta ŋkɛ, pa kese mehele ta Zhozafat kezha dzeme hɛ zlaɓe kaɗa Ramot te hɛɗia Gala'ad.

³Ma ke Akab, meghea ka Israyɛl sha Zhozafat, meghea ka Zhəwda: «Kalə na zlaɓe le 'ya kaɗa Ramot nya te hɛɗia Gala'ad na?» Ma ke Zhozafat zhɛnete nda: «Kanya kwetɛŋe mə le gha, mbelia ŋa ne, ŋa ɗa hɛ. Kalə 'ya yitea mpa zlaɓe le gha.»

⁴Ama, pa Zhozafat mtsehete: «Fake ɓə ghena va Mahwətə kaba.»

⁵Pa meghea ka Israyɛl tseneke ka mɛ ŋkwa ta ŋkɛ gwəmsə wəfaɗe, pa 'yɛwe va hɛ: «Wərə mə kalə kampa kezha kelehwe Ramot nya mbe Gala'ad zhɛkwa na, na belewəmte 'ya na?» Ma ke ka mɛ ŋkwa zhɛnete nda: «Wərə na kalə, kateve ŋa melemea shɛ Shala.»

⁶Ama pa Zhozafat 'yɛwakɛ: «Ketene kwete nde mɛ ŋkwa teke ya kwetɛŋe kezha 'yɛwakɛ ghena ta Mahwətə gheɓə ve wəka?»

⁷Ma ke meghea ka Israyɛl sha Zhozafat: «Kwete shɛ kwetɛŋe, Mishɛ wəzege ta Imla. Ama kaɗe ghena ta ŋkɛ 'ya we, kwa nza ŋkɛ ndiremi yamawe ɗa ŋkɛ, kaɗema kaghena ganyɛ.» Ma ke Zhozafat sha Akab: «Gezema ghena na kala nya te nde mɛ ŋkwa ma!»

⁸Pa meghea ka Israyɛl hekakɛ kwete nde mene slene nya ki ghɛa meghe kageze nda kalə kahe kahe kazele Mishɛ, wəzege ta Imla.

⁹Yɛ meghea ka Israyɛl le ŋa ka Zhəwda ne, ntintishɛ hɛ pelɛ pasla ta nci, le lekwesa meghe kənəa geva te ŋwela terasle yitea mɛa degha ta Samari, vəa ŋkwa nya geze ghena ka mɛ ŋkwa pɛtɛ kwa kema ta nci.

¹⁰Pa kwete wəndə Sidekiya, wəzege ta Kenana gezlate yɛ tereme kwa lɛ lɛ, ma ke: «Wa nya ghena nya gezeke Mahwətə nya: ‹Le tereme kwa lɛ lɛ nyi tempahwe ka Siri na kala vələa mca.›»

¹¹Pɛtɛa ka mɛ ŋkwa kageze tsagha: «Wərə na kadzeme kaɗa Ramot nya mbe Gala'ad. Katehərə ŋkɛ na, kateve ŋa melemea shɛ Mahwətə.»

¹²Ma ke wəndə nya kalə kaheka Mishɛ shɛ: «Fate ghena ta ɗa, pɛtɛa ka mɛ ŋkwa kejikəte mɛ kezha mawe nda hərəte ŋkwa ke meghe. Hite geva kezha geze na kala hɛ: gezete nda ghena ta hərəte ŋkwa perə.»

¹³Ama ma ke Mishɛ shɛ: «Le Mahwətə nya te ghweme, wəsə nya tegeze ɗa Shala ɗa yategeze 'ya.»

¹⁴Pa se kadzete kema ta meghe nya ke'yɛwakɛ ghena ve: «Mishɛ, na kehite geva kalə 'ya kampa kezha kelehwe Ramot nya mbe Gala'ad na, na belewəmte 'ya na?» Ma ke Mishɛ zhɛnete nda: «Wərə yɛ kalə, katehərəte ŋkɛ yɛ, kateve ŋayɛ melemea shɛ Mahwətə.»

¹⁵Ama ma ke meghe shɛ: «Ŋkwini zhigə ɗe na ka'yɛwe 'ya deke kaganda nya kese va Mahwətə yageze ɗa na 'ya sha gha wa?»

¹⁶Ma ke Mishɛ zhɛnete: «Nahe 'ya kenakɛ ka Israyɛl kwetɛ kwetɛŋe dzeme hwa ghweme kala timɛti nyi ɗema wəndə keya hɛ shɛ. Ma ke Mahwətə zhɛkwa: ‹Meghe va mbelia shɛhɛ we. Pa yayata wəndə zhɛne geva kalə sha ghɛa ŋkɛ le kwelɛŋe.›»

¹⁷Ma ke meghea ka Israyɛl sha Zhozafat: «Kegezete ŋa 'ya tiɗiɗi gɛ wa! Nda wəsə kwa ndiremi yageze ɗa ŋkɛ, kegha nya ganyɛ tɛape we!»

¹⁸Ma ke Mishɛ: «Fate mə ghena nya geze Mahwətə ɓetəkə. Kwa nza ŋkɛ ne, nahe 'ya kenakɛ Mahwətə mentishɛ pelɛ pasla ta meghea ŋkɛ, le pɛtɛa ka mene slene ta ŋkɛ nyi pelɛ ghweme meslete te kwa zeme ba'a te kwa gwela ta ŋkɛ.

¹⁹Ma ke Mahwətə: ‹Wa nde nza kalə kandeke nda zəzə kwa ndiremi ke Akab, meghea ka Israyɛl, yitea lə ŋkɛ kampa le Ramot nya mbe Gala'ad, baŋe mbeli kapeslekɛ ŋkɛ tse wa?› Pa kwete gezete ŋa ŋkɛ tekeleke, tekeleke ŋa kwete ɓiyitsa.

²⁰Pa kwete sefə hendeke geva te kema ta Mahwətə, ma ke: ‹'Ya kalə kandeke nda zəzə› Ma ke Mahwətə 'yɛwete: ‹Tsema wa?›

²¹Ma ke: ‹'Ya kalə kanza kasefə tseŋwə kwa mɛa ka mɛ ŋkwa ta meghe.› Ma ke Mahwətə zhɛnete nda: ‹Ntsehwele ganyɛ nya kezha ghwetete. Kwiɗi shɛ na menete nyagha!›

²²Ma nda veyi sefə tseŋwə Mahwətə kwa mɛa ka mɛ ta ŋa ne, va nya ɗe Mahwətə kaghwene ŋa ndiremi.»

²³Taghanyɛ, pa Sidekiya wəzege ta Kenana, hendave nda geva ke Mishɛ kampave le balema, ma ke: «Laka nyama hweŋkwa shavenyɛ Sefəa Mahwətə mbe 'ya kezha geze ŋa ghena wa?»

²⁴Ma ke Mishɛ zhɛnete nda: «Ya! Katefave na ndeɗekə gha le ghəa ŋa vəa ŋkwa nya tehwɛ na kadzawa vi kawəfərə ki ghɛa ŋa.»

²⁵Ma ke meghea ka Israyɛl gezete: «Keseve mə Mishɛ, ndeke nda mə ke Amon, Ŋgwamna ta meleme ba'a ke wəzege ta meghe Yowash.

²⁶Ma pe yɛ sha hɛ Wa nya tsetse gezeke meghe: veyi mə wəndə nya kwa daŋgayɛ, kaŋa nda ɗafa ɓɛhwɛ ɓɛhwɛ ba'a kandɛme nda yɛmə, nda tesheke ɗa 'ya kwelɛŋe kwamte mpa nya.»

²⁷Ma ke Mishɛ zhɛnete nda: «Ma kesheke ŋa na kwelɛŋe ne, kegezete ghena Mahwətə le mɛa ɗa tsagha we.»

²⁸Cape yɛ Akab, meghea ka Israyɛl le Zhozafat, meghea ka Zhəwda kadzeme kaɗa Ramot nya mbe Gala'ad.

²⁹Ma ke Akab sha Zhozafat: «'Ya katembeɗe lekwesa kezha dzawa mpa, ama gha le ŋa ŋa ne, seɗete lekwesa meghea ŋa.» Tsetse mbeɗemte lekwesa meghea ka Israyɛl yagha mbeli kaɗepete, cape hɛ yitea kadzawa mpa.

³⁰Nda nahe meghea ka Siri kegezete nda ke mbelia jama ta ka sewajɛ nyi te ghəa wəmata gədəwəa ŋkɛ, mba hɛ keɗa ka sewajɛ nyi ɓɛhwɛ ɓɛhwɛ, ya nyi jama jama, ama deke meghea ka Israyɛl nahe.

³¹Vatse gɛ, ma kwa nakɛ Zhozafat mbeli nyi te ghəa yɛ wəmata gədəwə, meghea ka Israyɛl ŋkɛ, ke hɛ keta nci, ntəslə hɛ ntəsləte kezha mpa le. Ama pa Zhozafat 'yɛwete kemane ta Shala Mahwətə, nya kekemanakɛ ŋkɛ laka zhɛne ka ghema ta ŋkɛ dzeyi te sebe.

³²Ma kwa ɗepete mbeli nyi te ghəa wəmata gədəwə kaɗema ŋkɛ kameghea ka Israyɛl ne, pa hɛ sərəakɛ keka.

³³Ndagwara gəmə gəmə hete have kwete sewajɛa ka Siri, pa menyɛ te meghea ka Israyɛl dzawa kwelɛ rəbəci nya keya geva ta ŋkɛ. Ma ke meghe sha wəndə nya kezleɗe wəmata gədəwəa ŋkɛ: «Zhɛrete geva te sebe, kelemte ɗa kwa mpa, kwa nza ŋkɛ, nahe wəsə kaɗakɛ ɗa.»

³⁴Ama te vecia shɛ ne, dzawe dzawe se mpa, vatse nzanyɛ meghea ka Israyɛl meslete kwa wəmata gədəwəa ŋkɛ pa va tɛhwɛɗi, kwa kema ta ka sewajɛa ka Siri. Ma yipə le pəkwə ta veci ne, mtiwə ŋkɛ.