Read kapsiki 2 Wəshi nyi Mene Ka Meghe 2 Bible Online

2 Wəshi nyi Mene Ka Meghe 2 - kapsiki bible

2 Wəshi nyi Mene Ka Meghe 2

¹Pa Salomon ɓelave ka kele wəshi 70.000, ka tsehe pelɛ 80.000 kezha mene slene pelɛ ghweme te dzeve ba'a ka newe slenea shɛ 3.600.

²Pa Salomon ghwenakɛ nda mɛ ke Hiram meghea ka Tir, ma ke shɛ: «Nahe na kempəave nda sheghwəa lekeleke ke yiteyɛ ɗa David kezha ŋa ghɛa ŋkɛ ne, menete ɗa tsagha shɛ perə.

³Kwa hweŋkwa 'ya kaɗe kaŋa ghɛ kazləvəa Shala Mahwətə ta ɗa, ghɛ nya keveyi geva kaŋa Shala. Katere nda 'wərdə mbeli mbe, kave ɗafa nyi keveyi geva kaŋa Shala keveci keveci. Kadzeghe nda melɛ kwa tere tere masheke le tɛhwɛɗi, tsagha hwa Saba, kwa ghate ta hɛ mbe yayata tere ba'a hɛa gəsəkəa Shala Mahwətə ta n'yɛ. Ghena nyi ka gezeyi nda geva ke ka Israyɛl, mba nza hɛ kajive kajive.

⁴Ma ghɛ nya teŋa nya 'ya ne, kewəbanyɛ tenza ŋkɛ, kwa nza ŋkɛ ne kewəbanyɛ Shala ta n'yɛ kwele ma ke kweci shala pɛtɛ.

⁵Ya kwela nza ŋkɛ ne, wəndə shɛ kaŋate nda ghɛ we, kwa nza ŋkwa nya pelɛ ghweme le yɛ kwelea ŋkɛ shaŋe kambakɛ. 'Ya le ghəa ɗa ne, kezəzəte 'ya wərə 'ya kaŋate nda ŋkwa kenza we, ama deke ŋkwa kedzeghe nda melɛ.

⁶Yawa, pa na ghweneke ɗa nde caŋa caŋa nya keɗepe vɛsə mze kwa tere tere, mze kwa ghwə ghwə, mze kwa tɛawetɛa ba'a lɛ, nyi keɗepe tsa lekwesa kwa rafe rafe le kwa ghɛmɛ, le kwa ghɛmɛ kwa mimi mimi keɗema kakwa mede mede, ba'a nyi keɗepe rafe pa ta wəshi. Kamene slene hɛ jikə le yɛ ŋa ɗa ka caŋa caŋa, nyi tsehave Yiteyɛ ɗa David nyi mbe Zhɛrəzalɛm le nza le yɛ nyi te hɛɗia Zhəwda.

⁷Mpəave ɗa sheghwəa lekeleke, vɛ ba'a ndakwela sawa pelɛ ghweme ta Liban. Nahe 'ya keɗepe tsape ɗepe mpə wəfe nyi pelɛ Liban mbelia ŋa. Kalə ka mene slene ta ɗa kakemane ŋa ŋa.

⁸Zlaɓe hɛ kezha mpəave ɗa sheghwə kwele kwele, kwa nza ŋkɛ ghɛ nya teŋa 'ya ne, kewəbanyɛ tsape tenza ŋkɛ.

⁹Ma 'ya le ŋa ɗa ne, kave nda ha 'ya ke ka mpə wəfe kakiləwə slibə gwəmsə ŋkwaŋe, tsagha kiləwəa megi perə, litrəa tɛ 800.000, tsagha ŋa n'yi.»

¹⁰Ma ke Hiram, meghea ka Tir zhɛnete nda ke Salomon le rafe palepa: «Va nya nza Mahwətə kaɗe mbelia ŋkɛ nda veyi ŋa ŋkɛ kameghea nci.»

¹¹Nda mbeli katsa nda ŋ'wese ke Mahwətə, Shala ta ka Israyɛl, nya kepate yɛ ghweme le hɛɗi, kwa nza ŋkɛ nahe ŋkɛ kendeke nda wəzege ke David nya nza ntsehwele kwele kwele ve, le ghə ganyɛ ba'a keɗɛŋe ɗɛŋe, wərə ŋa nda ghɛ ke Mahwətə, tsagha ghɛ meghe kezha ghəa ŋkɛ.

¹²Yawa, tsetsenya gɛ 'ya kaghwene ŋa nde caŋa caŋa kwetɛŋe nya keɗepemte slenea shɛ, Həwram-Abi.

¹³Nde Tir ŋkɛ se laka yita, ama kande ya te wesle ŋkɛ laka meghekɛ nya kahwelefe ta Dan. Nahe ŋkɛ keɗepe vɛsə mze kwa tere tere, kwa gheme, kwa ghwə, lɛ, tsehe pelɛ, mene sheghwə. Nahe ŋkɛ keɗepe zhɛre yɛ zlave kakwa ghɛmɛ, kakwa gheme, kakwa ndereme ndereme ba'a kaleme pawa nyi slɛahe slɛahe perə. Nahe ŋkɛ keɗepe feɗe pɛtɛa wəshi nyi te'yɛwe mbeli ve. Katemene slene ŋkɛ zlaɓe le ka caŋa caŋa ta ŋa ba'a pɛtɛa mbeli nyi tsehave yiteyɛ ŋa, meghe David.

¹⁴Ma laka ŋa ŋa bela ne, ghwenave n'yɛ ha, megi, n'yi ba'a tɛa rɛzɛŋe nyi gezete na.

¹⁵Katelə ghen'yɛ kampə ŋa yayata wəfe nyi ɗe na pelɛ ghweme ta Liban, katefə ŋa hɛ ghen'yɛ kase jikə tehwepe dzeyi te yɛmə hwa'a kwa Jafa. Nda fə na se tagha kadzeme Zhɛrəzalɛm.

¹⁶Pa Salomon ɓelate ka se se nyi mbe ka Israyɛl le nza, kala kwelea nci nya ɓelate yitenyɛ David. Pɛtɛ nci ne, 153.600.

¹⁷Pa ntave ka fə wəshi 70.000, ka tsehe pelɛ pelɛ ghweme 80.000, ka newe slenea shɛ 3.600, kezha hi nza slene hwa mbeli.