Read kapsiki 2 Wəshi nyi Mene Ka Meghe 28 Bible Online

2 Wəshi nyi Mene Ka Meghe 28 - kapsiki bible

2 Wəshi nyi Mene Ka Meghe 28

¹Ma nda kelete meghe Ahaz ne, bakemsə va ta ŋkɛ, pa ŋkɛ menete va meŋe kwetɛŋeghəmbe te meghe mbe Zhɛrəzalɛm. Kemenete wəsə nya tiɗiɗi ŋkɛ kwa kema ta Mahwətə kala shinyɛ David we.

²Ama dzeghwa ta ka meghea ka Israyɛl yakelete ŋkɛ. Pa le pa ta wəshi lə ŋkɛ kavɛsəte kezha hawe va yɛ shala Ba'al.

³Katere 'wərdə ŋkɛ kwa zlərəa Hinom ba'a pa dzeghekɛ melɛ le ŋwalea ŋkɛ, kala wəshi nyi ndiremi ndiremi ta hwelefefi nyi ŋkamte Mahwətə kezha ve nda ŋkwa ka Israyɛl.

⁴Pa dzeghekɛ melɛ ɓiyitsa le wəshi keseɗa ba'a pa terekɛ 'wərdə dzeyi hwa yɛ kələŋə, pelɛ yɛ wəmbə nyi nza wəfe zhiɓə.

⁵Pa Shala Mahwətə ta ŋkɛ veyi mbe dzeve ta meghea ka Siri: pa ka Siri ɗate ŋkɛ ba'a keseghe ka mavashi kwele kwele yitea hɛ kadzeme Damas. Pa Ahaz teɗenyɛ kadzembe dzeve ta Pɛka, wəzege ta Remaliya nya kameghea ka Israyɛl, nya kendeke nda teɗe nya wəba mbe mpa.

⁶Te veci kwetɛŋe ne, pa Pɛka mpəmte ka katsala kɛfia ka sewajɛa ka Zhəwda 120.000. Ma nda menete nda geva ŋkɛ kala nya ne, va nya wəfəyite Shala Mahwətə ta ka shihɛ nci hɛ.

⁷Ma Zikri, nde Ɛfrayim nya kakatsala ne, mbəhə peslekɛ Masɛya kwete wəzege ta meghe, Azrikam nya te ghəa ghɛa meghe ba'a Ɛlkana, mcɛnyɛ kwa sla pela ta meghe.

⁸Kakwa keɗaŋe ne, pa ka sewajɛa ka Israyɛl kesehwe mi ba'a ŋwalea ka Zhəwda 200.000 kaka mavashi. Kəliɓə hɛ fəte wəshi kwele kwele nyi fəghe kadzeme Samari perə.

⁹Mbe Samari ne, kwete nde mɛ ŋkwa ta Mahwətə ya shɛ, sləa ŋkɛ Odɛd. Pa shave kabegeme le ka sewajɛa ka Israyɛl kase hɛ kadzembe meleme, ma ke sha hɛ: «Nahe Shala Mahwətə ta ka shihɛ ŋayɛ kehwepete wənə va ka Zhəwda. Vatse veyi ŋayɛ hɛ ŋkɛ mbe dzeve ta ŋayɛ. Ama pa yɛ mpəmte hɛ le wənə le wənə, nahe fete shɛ kentsehe pelɛ ghweme.

¹⁰Ɓiyitsa ne, gheyɛ ɗe kaveyi zhili le mia ka Zhɛrəzalɛm le yɛ ŋa ka Zhəwda kaka mavashi. Ma le wəsə nya menete nya yɛ kala nya ne, gheyɛ le ghəa ŋayɛ kazhɛre ghəa ŋayɛ kaka fete sha Shala Mahwətə ta ŋayɛ wəka?

¹¹Fate mə ghena ta ɗa, zhɛnemte mə ka mavashi nyi keseve nyi yɛ hwa ka menəhɛ ŋayɛ nyi kwa Zhəwda kalə sha ghɛa nci, kwa nza ŋkɛ hwepete wənə ta Mahwətə ya kənəa gheyɛ ɗaŋe ɗaŋe tsetsenya.»

¹²Ma kweci mbelia jama nyi te ghəa ka Ɛfrayim ne, nahe hɛ keɗema ghena ta mbeli nyi kesheke kwamte mpa. Yɛ Azariya, wəzege ta Yohanan, Bɛrɛkiya, wəzege ta Meshilɛmot, Yehizkiya, wəzege ta Shaləwm ba'a Amasa, wəzege ta Hadlay.

¹³Ma ke hɛ sha hɛ: «Sema yɛ teke le ka mavashi nyi ma! Gheyɛ katezhɛre n'yɛ kaka menete fete nya wəba sha Mahwətə. Gheyɛ zəzəte kamtsehe ɗaŋeɗa ta jaɗafa ba'a fete ta n'yɛ na, ndagwara ɗaŋe ɗaŋe ŋkɛ tsetsenya, kanewe yɛ kehwepe hwepe wənəa Mahwətə va ka Israyɛl?»

¹⁴Kwa kema ta mbelia jama nyighɛ ba'a jikə ta mbeli pɛtɛ, waɗe ka sewajɛ pelakɛ ka mavashi nyighɛ taghanyɛ, kaɗema pa wəshi nyi fəte hɛ.

¹⁵Pa mbeli tsehave kweci mbeli tekeleke kezha gweɗakwe ka mavashi nyighɛ: kəliɓə hɛ fəave nda yɛ lekwesa le yɛ tsahwa ke nyi ɗema hɛ va hɛ. Pa hɛ fəave nda wəshi kezeme ba'a wəshi kesa ke hɛ, peɗete nda zhia nci ke mbeli nyi ɗakɛ zhi, fəte mbeli nyi keshɛma dzeghwa te kwara lɛmə ba'a beghave nda hɛ ke mbelia nci nyi kwa Zhɛriko, meleme ta peha. Kwa sebe ta ŋkɛ, tewətelɛwe hɛ zhɛneke geva kadzembe Samari.

¹⁶Ma vəa ŋkwa shɛ ne, pa meghe Ahaz 'yɛwakɛ va meghea ka Asiri kezha se kakemane.

¹⁷Kwa nza ŋkɛ nahe ka Ɛdom kese zhɛkwa kampate mpa le hɛɗia Zhəwda ba'a kakeseve kweci kaka daŋgayɛ.

¹⁸Ka Filisti le ŋa nci ne, nahe hɛ dzembenji mbe meleme nyi kwake kwake te ŋwela ba'a mbe Nɛgɛv nya kaŋa ka Zhəwda. Pa hɛ zehwe yɛ Bɛt-Shɛmɛsh, Ayalon le Gedɛrot, tsagha yɛ Soko, Timna, Gimzo ba'a meleme nyi ɓɛhwɛ ɓɛhwɛ kwa ghala ta nci, pa hɛ nzanji mbe hɛ le ghɛ.

¹⁹Pa Mahwətə shifəmte berete ta hɛɗia Zhəwda, tewəmbəreke meghe Ahaz nya tsəkwəyite mbelia ŋkɛ kapele se yitea Mahwətə ba'a va nya sema dɛŋe dɛŋe te le ghəa ŋkɛ.

²⁰Pɛkwe Tɛglat-Falasar, meghea ka Asiri se kaɗa Ahaz, kaveyi kande ghema ta ŋkɛ, kaɗema kakemane.

²¹Laŋe Ahaz kelete kwete bela ta mcɛlə nyi mbe ghɛa Shala, nyi ki ghɛa meghe ba'a nyi ki ghɛa mbelia jama ta ŋkɛ kandeke nda pɛtɛ ke meghea ka Asiri, ama kekemave wəsə mbe ya ci'a we.

²²Pa le nya nza ndiremi te ne, kesərəakɛ pele se Ahaz yitea Mahwətə we.

²³Pa dzeghekɛ nda melɛ ke yɛ shala ta ka Damas, ndagwara ghenci ka keleke nda teɗe. Ma ke sha ghəa ŋkɛ: «Se va yɛ shala ta nci ŋ'we kemane ka meghea ka Siri. Telə 'ya kadzeghe nda melɛ nda ke hɛ yitea kemane ɗa hɛ perə.» Ama yɛ shala shɛhɛ ya kateɗe nya te hɛ le pɛtɛa ka Israyɛl.

²⁴Pɛtɛ Ahaz tsenete wəshi nyi keveyi geva tekeleke mbe ghɛa Shala kampəmte, pa ŋzlemte mɛa cɛ nyi te ghɛa Mahwətə. Kwa sebe ta ŋkɛ, pɛtɛ pate yɛ ŋa ŋkɛ reghwetɛ dzeyi kwa yɛ baŋwa ta hweŋkwa nyi mbe Zhɛrəzalɛm pɛtɛ.

²⁵Mbe yayata meleme nya te hɛɗia ŋkɛ ne, pa pate ŋkwa kedzeghe nda melɛ ke shala ta kweci hwelefefi, kamtsehete hwepe nda wənə ke Shala Mahwətə ta ka shihɛnyɛ.

²⁶Ma nyi ketene slene ta Ahaz, se te nyi keghate pa te kwa keɗaŋe ne, nahe hɛ kenza kerafe rafe mbe palepa ta slene nyi menete ka meghea ka Zhəwda le ŋa ka Israyɛl.

²⁷Ma kwa mte ŋkɛ ne, pa mbeli lamte ŋkɛ mbe meleme ta Zhɛrəzalɛm, ama kaɗema kwa kwele ta ka meghe. Ɛzɛkiyas, wəzege ta ŋkɛ nde kelete meghe te ŋkwa ŋkɛ.