Read kapsiki 2 Wəshi nyi Mene Ka Meghe 29 Bible Online

2 Wəshi nyi Mene Ka Meghe 29 - kapsiki bible

2 Wəshi nyi Mene Ka Meghe 29

¹Ma nda dzembe meghe Ɛzɛkiyas ne, bakemsə mcɛfeghəmbe va ta ŋkɛ, pa ŋkɛ menete va te meghe bakemsə meslighəmbe mbe Zhɛrəzalɛm. Abi, wəzha ta Zakari sləa meghekɛ.

²Wəsə nya ɗe Mahwətə yamenete Ɛzɛkiyas, tɛfɛa tɛfɛa kala shinyɛ David.

³Ma te kwa ghate ta va ta ŋkɛ mbe meghe, te tere kwa ghate ne, pa ghwenemte mɛ degha nyi te ghɛa Shala ba'a hite hɛ.

⁴Pa ŋkɛ hekake ka dzeghe Shala ba'a ka Lɛvi ba'a tsenete hɛ te ŋwela nya laka ŋkwa kesame ta veci.

⁵Ma ke sha hɛ: «Ka hwelefefia Lɛvi, fate mə ghena ta ɗa! Yaɓemte mə ghəa ŋayɛ wɛŋe wɛŋe tsetsenya, kwa sebe ta ŋkɛ yaɓemte mə ghɛa Shala Mahwətə ta ka shihɛ ŋayɛ, fəmte wəshi kwa wale wale nyi mbe ŋkwa nya wɛŋe.

⁶Nahe ka shihɛ ɓəmə kepeleyite se yitea Shala Mahwətə ta ɓəmə, pa hɛ menete wəsə nya kehima kwa kema ta ŋkɛ, kawəfəyite! Pa hɛ zhɛremte kema ta nci va ŋkwa nya keveyi geva tekeleke kaŋa ŋkɛ ba'a pa hɛ zhɛrave nda wəmbə.

⁷Pa hɛ ŋzlemte pa le gelembe nyi mɛa ŋkwa kedzeki, peslekɛ ghwə kwa yɛ paterela, pa hɛ sərəakɛ tere 'wərdə ba'a melɛ nyi dzeghe mbeli le wəshi keseɗa mbe ŋkwa nya keveyi geva tekeleke kaŋa Shala ta ka Israyɛl.

⁸Pa Mahwətə hwepete wənə va meleme ta Zhɛrəzalɛm ba'a hɛɗi Zhəwda: pa wəfəyite mbelia ŋkɛ mbe yaka nya zhɛ ŋkwa ghazlənə ve ba'a kawəsə hawe, kala nya newe nya yɛ le ntsə ta ŋayɛ.

⁹Vatse mpənji ka yitehɛ ɓəmə kwamte mpa, nda nza ŋwale tezhilia ɓəmə, ŋwalea kwɛ ɓəmə le mia ɓəmə kaka mavashi.

¹⁰Ma tsetsenya gɛ ne, kaɗe 'ya kamene jikə geva le Shala Mahwətə ta ka Israyɛl, kezha kelemte geva hwepe wənəa ŋkɛ nya kwele kwele kənəa gheɓə.

¹¹Ma gheyɛ gɛ ŋwalea ɗa, mba yɛ kenza kaka pele se, kwa nza ŋkɛ gheyɛ yantave Mahwətə kaslete kwa kema ta ŋkɛ, nyi kehi hi kamene nda slene ba'a katere 'wərdə kazləvəa ŋkɛ.»

¹²Wa nyi ka Lɛvi nyi kedzete kema nyi: Mahat, wəzege ta Amasay ba'a Zhowɛl, wəzege ta Azariya kwa yita ta Kɛhat, Kish, wəzege ta Abdi ba'a Azariya, wəzege ta Yehalɛlɛl kwa yita ta Merari, Yowa, wəzege ta Zima ba'a Ɛdɛn wəzege ta Yowa kwa yita ta Gɛrshon,

¹³Shimri ba'a Yɛyiyɛl kwa yita ta Ɛlisafan, Zakari ba'a Mataniya kwa yita ta Asaf,

¹⁴Yɛhiyɛl ba'a Shimɛyi kwa yita ta Hɛman, Shemaya ba'a Əwziyɛl kwa yita ta Yedəwtəwn.

¹⁵Pɛtɛ hɛ tsenete ka menəhɛ nci, pɛtɛ hɛ yaɓemte ghəa nci. Kwa sebe ta ŋkɛ, kala ghena nya gezeke meghe ba'a kala ɗe ta Mahwətə, cape hɛ kadzembe ghɛa Shala kezha yaɓe.

¹⁶Shilimə ka dzeghe Shala mbe cɛ kezha yaɓe ŋkwa nya mbe: kəliɓə hɛ fəakave wəshi kwa wale wale nyi sləyi hɛ mbe ghɛa Shala kashave pelɛke te ŋwela. Kəliɓə ka Lɛvi fəte hɛ shave mbe meleme kalə kabete hɛ kwa zlərəa Sɛdron.

¹⁷Pa hɛ ghate yaɓe ta ŋkɛ te kwa ghate ta hɛ mbe tere kwa ghate. Ma mbe kwa deghese ta hɛ ne, hwa'a kwa dapa ta ghɛa Mahwətə. Hɛ deghese menete hɛ kayaɓe cɛ shɛ zhɛkwa, ma te kwa meŋe ŋkwaŋeghəmbe ta hɛa tere ne, nahe slenea shɛ.

¹⁸Kwa sebe ta ŋkɛ, cape ka Lɛvi kalə sha meghe Ɛzɛkiyas, ma ke hɛ shɛ: «Maze yawe, nahe ghen'yɛ keyaɓemte ghɛa Mahwətə pɛtɛ, pa le reghwetɛ kedzeghe melɛ kwa tere tere ba'a le tabele nya bete ɗafa nyi keleke nda mbeli ke Shala mbeli te, pɛtɛ le wəshi kemene slene ta ŋkɛ.

¹⁹Ma wəshi nyi keveyi geva tekeleke kaŋa Shala nyi zhɛremte nyi meghe Ahaz wale wale mbe və nya nza meghea ŋkɛ wale wale ne, pɛtɛ hiyi hɛ ghen'yɛ te ŋkwa nci kaveyi hɛ tekeleke zhɛkwa. Wa nyi hɛ nyi kwa kema ta reghwetɛa Mahwətə.»

²⁰Masheke masheke te hendɛ ta ŋkwa, pa meghe Ɛzɛkiyas tsenete mbelia jama nyi te ghəa meleme, tarame hɛ pelɛ ghɛa Mahwətə.

²¹Pa hɛ fəke mcɛmcɛli mberefaŋe, gamea lɛmə mberefaŋe, zhɛgwəa lɛmə timɛti mberefaŋe ba'a zhɛfa lɛmə mberefaŋe kezha dzeghe melɛ keyaɓe jaɗafa va Shala. Ma nda dzeghekɛ geva melɛ nyi ne, kezha mbelia ghɛa meghe, ŋkwa nya keveyi geva tekeleke kaŋa Shala ba'a ka Zhəwda pɛtɛ. Pa meghe ndeke nda hweŋkwa ke ka dzeghe Shala nyi kahwelefefia Aron kadzeghe melɛ te reghwetɛa Mahwətə.

²²Pa ka dzeghe Shala slamte ghə te mcɛmcɛli nyighɛ. Pa hɛ taweve mimi kayisəte te reghwetɛ. Kwa sebe ta ŋkɛ, pa hɛ slamte ghə te game lɛmə, kakwa keɗaŋe zhɛgwəa lɛmə timɛti: tsagha shɛ yisə mimi ka dzeghe Shala te reghwetɛ.

²³Kwetere wəmbəa ŋkɛ, pa hɛ fəke zhɛfa lɛmə kedzeghe melɛ keyaɓe jaɗafa kadzete kema ta yɛ meghe le tsene ta mbeli. Pa yɛ meghe le kweci mbeli dedapeyi dzeve te hɛ.

²⁴Pa ka dzeghe Shala slamte ghə te hɛ, kayisəyi mimia nci te reghwetɛ kezha kelemte beze ghena ta pɛtɛa ka Israyɛl Shala te wənə. Kwa nza ŋkɛ ne, nahe meghe kegezete kezha dzeghe melɛ mbeli keghə keghə bake kezha mbeli pɛtɛ.

²⁵Pa meghe veyi ka Lɛvi mbe ghɛa Mahwətə le wəshi ketsa ta nci: yɛ gagera, yɛ ŋgwəleŋə ba'a getsepele, kala nya ghena nya gezeke David ba'a ka mɛ ŋkwa ta meghe, yɛ Gad le Natan. Kwa nza ŋkɛ ne, va Mahwətə ghena shɛ, laka mɛa ka mɛ ŋkwa ta ŋkɛ.

²⁶Pa ka Lɛvi dzete ŋkwa nci le wəshi ketsa nyi meghwete David, ba'a ka dzeghe Shala laka ŋa nci bela le yɛ veke.

²⁷Pa Ɛzɛkiyas gezete kezha dzeghe melɛ kwa tere tere te reghwetɛ. Vəa ŋkwa nya ghate geva dzeghe melɛ, ntake mbeli kagha cimə te zləvəa Mahwətə, zlaɓe le vɛ ta yɛ veke ba'a wəshi ketsa ta David, meghea ka Israyɛl.

²⁸Pɛtɛa tsene ta mbeli megwəɗəŋə, vəa ŋkwa nya tsa wəshi ka tsa wəshi le yɛ ka vɛ veke pa nda kiɗimte dzeghe melɛ mbeli.

²⁹Ma kwa kiɗi ŋkɛ ne, pa yɛ meghe le mbeli nyi tagha pɛtɛ gwəɗəŋə ntiŋə ghə mbe hɛɗi.

³⁰Pa Yɛ meghe le mbelia jama geze nda ke ka Lɛvi katsahe Mahwətə zhɛkwa le cimə nyi ncake yɛ David le nde mɛ ŋkwa Asaf. Ntake ka Lɛvi kagha cimə le zlama, vəkwə hɛ ntiŋə ghə mbe hɛɗi kahawe va Mahwətə.

³¹Pa meghe Ɛzɛkiyas zhɛne kakelete ghena, ma ke sha mbeli: «Tsetsenya, ma gheyɛ mbeli nyi nza wəshi yitea dzeve va gheyɛ kave nda ke Mahwətə ne, fəke mə wəshi kedzeghe melɛ kejikə geva ba'a kwa tsa hana kadzembe ghɛa Shala!» Pa mbeli fəke wəshi keseɗa kezha dzeghe melɛ shɛhɛ. Pa mbeli nyi nza zlama va hɛ dzeghekɛ melɛ kwa tere tere.

³²Ma pɛtɛa nci ne, mberefaŋemsə mcɛmcɛli, gwəmsə game lɛmə ba'a gwəmsə bake zhɛgwəa lɛmə timɛti nyi dzeghekɛ melɛ kwa tere tere mbeli le hɛ,

³³tsagha mcɛmcɛli gwəmsə ŋkwaŋe ba'a yɛ timɛti le kwi 3.000 kezha kweci melɛ.

³⁴Ma ka dzeghe Shala nyi tagha ne, dewə hɛ kezha kwaɓe hweta kənəa wəshi keseɗa kedzeghe melɛ kwa tere tere. Vatse nda se ka menəhɛ nci ka Lɛvi kakemane hɛ kezha kiɗi slene, nda teyaɓemte geva kweci ka dzeghe Shala. Kwa nza ŋkɛ za ma ka Lɛvi ɗehwe se yitea yaɓe geva ke ka dzeghe Shala.

³⁵Kadzevare wəshi keseɗa kedzeghe melɛ kwa tere tere nyi kwele kwele ba'a yɛ tɛ nyi fəke mbeli ne, nahe ŋkɛ kehite geva katere merege mbeli te reghwetɛ zhɛkwa kezha melɛ kejikə ghə. Tsetse zhɛne mbeli kahite səkwə ghə mbe ghɛa Mahwətə.

³⁶Kwele kwele zlamate zlama yɛ Ɛzɛkiyas le mbeli pɛtɛ te wəsə nya pelave nda Shala ke hɛ kamene, kwa nza ŋkɛ kese wəsəa shɛ kadera we.