Read kapsiki 2 Wəshi nyi Mene Ka Meghe 30 Bible Online

2 Wəshi nyi Mene Ka Meghe 30 - kapsiki bible

2 Wəshi nyi Mene Ka Meghe 30

¹Pa Ɛzɛkiyas hekakɛ ka Israyɛl le Zhəwda pɛtɛ. Pa le palepa rafete nda ŋkɛ ke ka Ɛfrayim ba'a ka Manasɛ yitea se hɛ kadzembe ghɛa Mahwətə mbe kezha mene gəsəkə Pakea Mahwətə, Shala ta ka Israyɛl.

²Pa yɛ meghe le mbelia jama ta ŋkɛ ba'a ka Zhɛrəzalɛm pɛtɛ tsate kezha mene gəsəkə Pakea shɛ mbe kwa bake ta tere.

³Va nya ɗema hɛ te vəa ŋkɛ, kwa ɗema ka dzeghe Shala keyaɓemte geva kwele kwele ba'a kwa ɗema mbeli ketsenete geva pɛtɛ mbe Zhɛrəzalɛm.

⁴Pa yɛ meghe le mbeli nyi ketsenete pɛtɛ yɛhwe ghena shɛ,

⁵pa hɛ tsahwe kezha ghwene ŋkwa kalə te hɛɗi pɛtɛa ka Israyɛl, se Bɛrshɛba hwa'a mbe Dan yitea se mbeli kadzembe Zhɛrəzalɛm kamene gəsəkə Pakea Mahwətə, Shala ta ka Israyɛl. Kwa nza ŋkɛ kezhɛne mbeli kwele kwele kamenete kala nya kerafete geva we.

⁶Cape mbeli nyi ghwenakɛ nyi mbeli dzeyi mbe hɛɗia Israyɛl le Zhəwda pɛtɛ le palepa nyi dɛkate dzeve yɛ meghe le mbelia jama ta ŋkɛ te. Kala nya gezeke meghe, ma ke hɛ zlapete: «Ka Israyɛl gheyɛ nyi kembele ŋayɛ va ka meghea ka Asiri, zhɛne mə geva kase sha Mahwətə, Shala ta Abraham, Izak le Zhakob, nda tezhɛre ŋayɛ geva ŋkɛ kase.

⁷Yipəma ghəa ŋayɛ yɛ le ka yitehɛ ŋayɛ ba'a ka menəhɛ ŋayɛ nyi kebezemte nda ghena ke Mahwətə, Shala ta ka shihɛ nci ma. Nahe Shala kezamte sebe te hɛ, kala nya newe nya yɛ.

⁸Mba yɛ zhɛrete ghəa ŋayɛ kaka fama ghena kala ka shihɛ ŋayɛ: ɓelaheyi mə geva yitea Mahwətə, zhɛneke mə geva kadzembe ŋkwa ŋkɛ nya wɛŋe, nya veyi ŋkɛ tekeleke kaghala ghala. Nza mə kaka mene slene ta Shala Mahwətə ta ŋayɛ yitea zhɛremte hwepe wənəa ŋkɛ nya wəba nya ŋkɛ kənəa gheyɛ.

⁹Ma kezhɛneke geva yɛ kase sha Mahwətə, katezhɛ heli mbeli nyi kefəhwe ka menəhɛ ŋayɛ ba'a ŋwale tezhilia ŋayɛ yitea hɛ, katepele nda hweŋkwa hɛ ke hɛ kazhɛne geva kadzete hɛɗi nya. Kwa nza ŋkɛ kwele kwele zhɛ heli ba'a ganyɛa mehele va Shala Mahwətə ta ŋayɛ, katezhɛre ŋayɛ wəmbə ŋkɛ kezhɛneke geva yɛ kase shɛ we.»

¹⁰Pa mbeli nyi ghweneghe nyi le ghena ntəsləmte hɛɗia Ɛfrayim ba'a ŋa Manasɛ, kadzeghwa kemeleme kemeleme, kwa sebe ta ŋkɛ, hwa'a hɛ mbe hɛɗia Zabəlon. Ama ntake mbeli kaŋ'wəshi ba'a kayiɗə hɛ.

¹¹Ya tsagha ŋkɛ ne, pa kweci mbeli mbe hwelefe ta Asɛr, Manasɛ ba'a Zabəlon ɗepete fete ta nci, cape hɛ se kadzembe Zhɛrəzalɛm.

¹²Ma te hɛɗia Zhəwda perə ne, nahe Mahwətə kemene slene hwa mbelia nyi keyɛte kanya kwetɛŋe kamene slene le ghena ta ŋkɛ nya gezeke yɛ meghe le mbelia jama.

¹³Kwele kwele mbeli nyi ketsenete geva mbe Zhɛrəzalɛm, te kwa bake ta tere mbe va kezha mene gəsəkəa ɗafa nyi ɗema tenjɛne hwe. Nahe ŋkɛ kenza katsene nya wəba tsape.

¹⁴Pa hɛ ghate kafefelaŋe reghwetɛ nyi dzeyi mbe meleme ba'a yɛ reghwetɛ ketere 'wərdə, tetereke hɛ betakɛ hɛ kwa zlərəa Sɛdron.

¹⁵Te kwa meŋe wəfaɗeghəmbe ta hɛ te tere shɛnyɛ, pa hɛ sleslamte ghə te wəshi keseɗa yitea gəsəkə Pake. Pa ka dzeghe Shala le ka Lɛvi nyi shewə va hawe yaɓemte ghəa nci kezha ɗepe dzeghe melɛ kwa tere tere mbe ghɛa Mahwətə.

¹⁶Pa hɛ dzete ŋkwa slene ta nci nya ghalanza, kala nya gezete wəsə mahalegəa Moyize, wəndəa Shala: pa ka Lɛvi ndeke nda mimia wəshi keseɗa nyi dzeghekɛ melɛ mbeli le hɛ ke ka dzeghe Shala, pa ka dzeghe Shala yisəate te reghwetɛ.

¹⁷Kwa nza ŋkɛ kwele kwele mbeli hwa tsene ta mbeli nyi keyaɓekɛma geva, vatse nza ka Lɛvi kasla ghə te wəshi keseɗa te ŋkwa nyi keɗema wɛŋe wɛŋe kezha mene slene nya wɛŋe kazləvəa Mahwətə.

¹⁸Ma wəba ta mbeli, halama ka hwelefefia Ɛfrayim, Manasɛ, Isakar ba'a Zabəlon ne, keyaɓekɛ ghəa nci hɛ we, ama ya tsagha ŋkɛ ne, nahe hɛ kezehwe wəsə kezemea gəsəkə Pake, ya hweŋkwa ɗema va hɛ kazeme kala nya kerafete geva. Ama pa Ɛzɛkiyas səkwəte ghə kezha hɛ, ma ke: «Pa Mahwətə nya ndeɗea mehele kelemte nda fete ta nci te wənə

¹⁹ke mbeli nyi kentsəte geva le wənəa nci pɛtɛ kazele Shala, Mahwətə nya kaShala ta ka shihɛ nci, ya ghenci yaɓemtema geva ba'a veyima geva tekeleke.»

²⁰Pa Mahwətə fate səkwə ghə ta Ɛzɛkiyas, pa sərəakɛ ɗa mbeli.

²¹Pa ka Israyɛl nyi mbe Zhɛrəzalɛm menete gəsəkəa ɗafa nyi ɗema tenjɛne hwe kahɛ mberefaŋe le zlama nya wəba. Keveci keveci ka Lɛvi le ka dzeghe Shala katsahe Mahwətə le wəshi ketsa kwa berete.

²²Pa Ɛzɛkiyas gezete nda ghena kemtsehe berete ke ka Lɛvi nyi keveyi geva tsape kezha slene ta Mahwətə. Kashikwə zake ne, nda ɗafa ta gəsəkə yazeme mbeli, kadzeghe melɛ kejikə geva ba'a kagha cimə ketsahe Mahwətə, Shala ta ka shihɛ nci.

²³Pa tsene ta mbeli ɗehwe kamtsehe hɛa gəsəkə kahɛ mberefaŋe zhɛkwa. Ma kwa bake ta shikwəa shɛ ne, le zlama menete geva ŋkɛ,

²⁴Kwa nza ŋkɛ nahe meghe Ɛzɛkiyas kendeke nda yɛ sla slibə, timɛti 7.000 ke tsene ta mbeli. Pa mbelia jama ndeke nda yɛ sla slibə ba'a timɛti 10.000. Ɓiyitsa ne, pa ka dzeghe Shala yaɓemte geva kwele kwele.

²⁵Pɛtɛ mbeli le zlama: ka Zhəwda, ka dzeghe Shala ba'a ka Lɛvi, tsagha mbeli nyi kese mbe hɛɗia Israyɛl nyi kese deke kezha gəsəkə ba'a nyi kesenji kanza mbe Zhəwda.

²⁶Ma zlama shɛ ne, tekeleke wəba ŋkɛ sha ka Zhɛrəzalɛm, kwa nza ŋkɛ ghala se te vəa Salomon wəzege ta David meghea ka Israyɛl ne, kegha mbeli kamenete hwelefe ta gəsəkəa shɛ we.

²⁷Kwa keɗaŋe, pepelɛhetɛme ka dzeghe Shala le ka Lɛvi sate te ŋkwa, pa wəpikɛ mbeli. Pa səkwə ta nci dzeme pelɛ ŋkwa nya keveyi geva tekeleke kaŋa Shala pela ghweme, pa Shala fate.