Read kapsiki 2 Wəshi nyi Mene Ka Meghe 31 Bible Online

2 Wəshi nyi Mene Ka Meghe 31 - kapsiki bible

2 Wəshi nyi Mene Ka Meghe 31

¹Ma kwa nahe gəsəkə ne, cape ka Israyɛl nyi tagha pɛtɛ kadzeyi mbe yɛ meleme ta Zhəwda, pa hɛ mpəmte yɛ gɛaŋa nyi mɓeyi mbeli, tsaslemte selə nyi keveyi geva tekeleke, ŋzlamte yɛ ŋkwa kedzeghe melɛ ba'a yɛ reghwetɛa nci. Tsetse menete hɛ te hɛɗia meghea Zhəwda pɛtɛ, mbe hwelefe ta ka Bɛnjamɛn, Ɛfrayim ba'a Manasɛ, kwa sebe ta ŋkɛ, cape yayata wəndə kalə sha ghɛa ŋkɛ mbe meleme ta ŋkɛ.

²Pa Ɛzɛkiyas nteyi wəvəsə ka dzeghe Shala le ka Lɛvi, kandeke nda slene ke yayata nci mbe wəvəsəa nci. Mbe ŋkwa nya keveyi geva tekeleke kaŋa Mahwətə ne, ka dzeghe Shala le ka Lɛvi ka mene slene ta dzeghe melɛ kwa tere tere le nyi kejikə ŋkwa, le slene ta səkwə ghə nya tsahe Mahwətə ba'a katsa nda hana mbeli hwe.

³Pa meghe kelete kwete bela ta wəshia ŋkɛ kezha melɛ kwa tere tere nyi mene mbeli masheke le tɛhwɛɗi, tsagha le nyi mene mbeli te veci kezhɛne mpi, le ŋa kwa ghate ta hɛ mbe tere ba'a hwa kweci gəsəkə, kala nya gezete wəsə mahalegəa Mahwətə.

⁴Pa meghe gezete nda ke ka Zhɛrəzalɛm pɛtɛ kezha ve nda wəshi nyi kehi va hɛ ke ka dzeghe Shala le ka Lɛvi, yitea ndeke nda ghə hɛ ke wəsə mahalegəa Mahwətə.

⁵Ma kwa fate ghena shɛ mbeli ne, pa ka Israyɛl fəke kwa ghate ta wəshi nyi wəzate hɛ kwele kwele: yɛ ha, tɛ, n'yi, mze ba'a kweci wəshi nyi wəzate hɛ keghə keghə, tsagha kwa meŋe ta bela ta wəshi nyi meneke hɛ te wəve.

⁶Pa mbeli nyi mbe meleme kwa Zhəwda, ka Israyɛl le ka Zhəwda fəke kwa meŋe ta bela ta wəshi keseɗa ta nci perə, yɛ sla ba'a timɛti, tsagha le wəshi gəmə nyi keveyi geva tekeleke kaŋa Shala Mahwətə ta nci. Təɗəmə mbeli tsenete wəshi keghə keghə.

⁷Pa mbeli ghate katsene wəshi təɗəmə təɗəmə mbe tere kwa mahekene, mbe kwa mberefaŋe ta tere kiɗimte hɛ.

⁸Ma kwa se yɛ meghe Ɛzɛkiyas le mbelia jama ta ŋkɛ kanewe wəshi nyi fəke mbeli ne, pa hɛ tsate nda hana ke Mahwətə ba'a ke ka Israyɛl mbelia ŋkɛ.

⁹Pa meghe 'yɛwete va ka dzeghe Shala le ka Lɛvi te ghəa wəshi gəmə shɛhɛ.

¹⁰Ma ke wəndə kwelea ka dzeghe Shala Azariya, mbe yita ta Sadok zhɛnete nda: «Ma ghala ghate mbeli kakele wəshi nyi kelemte hɛ shave mbe wəshia nci kadzeki ghɛ Mahwətə ne, behe behe ghen'yɛ va wəshi kezeme, ba'a nahe ghen'yɛ kekemave kwele ma, kwa nza ŋkɛ nahe Mahwətə kewəpikɛ mbelia ŋkɛ. Ma wəshi nyi tetene nyi teke ne, nyi kewəbamte wəba.»

¹¹Pa meghe gezete nda ke mbeli kahi yɛ cɛ kebete wəshi takwa takwa yitea ghɛa Shala. Ma kwa himte geva hɛ,

¹²wərə mbeli kakele wəshi nyi kelemte mbeli mbe wəshi nyi meneke mbeli te wəve ba'a kweci wəshi nyi keveyi geva keghə keghə kaŋa Shala. Pa mbeli veyi Konaniya kawəndə nya te ghəa wəshia shɛhɛ ba'a wəza meghekɛ Shimɛyi kasləwəfəa ŋkɛ.

¹³Kala nya zəzəte yɛ meghe Ɛzɛkiyas le wəndə kwelea ka dzeghe Shala Azariya, nya nza ghɛa Shala te dzeve ve, yɛ Konaniya le Shimɛyi kanewe ghweme te ka ya wəshi nyi: Yɛhiyɛl, Azariya, Nahat, Asayɛl, Yerimot, Yozabad, Ɛliyɛl, Ismakiya, Mahat ba'a Benaya.

¹⁴Nde Lɛvi Korɛ, wəzege ta Imna ba'a nde ya mɛa degha laka bela kesame ta veci ya te ghəa wəshi gəmə nyi keleke nda mbeli ke Shala. Gheŋkɛa shɛ nde nehe nda wəshi nyi keveyi geva tekeleke kaŋa Shala ba'a wəshi nyi keveyi geva kaŋa ŋkɛ nahe.

¹⁵Mbe yɛ meleme ta ka dzeghe Shala ne, yɛ Ɛdɛn, Miniyamin, Yɛshəwa, Shemaya, Amariya ba'a Shekaniya yanza hɛ zlaɓe kezha nehe nda wəshi kezeme le hweŋkwa ke ka menəhɛ nci, mbelia jama keɗema ŋwale, kala nza ta wəvəsəa nci.

¹⁶Deke ke mbeli nyi rafete nyighɛ mbeli, pa le ŋwale tezhili nyi nza va ta nci mahekene kajive te kema nehe nda hɛ nahe we, ama pa le nyi kese keveci keveci kala nza ta wəvəsəa nci kamene slene ta səkwə ghə mbe ghɛa Shala.

¹⁷Kala nza ta peləa nci rafete ka dzeghe Shala mbeli, ama ka Lɛvi ne, se te va bakemsə kajive te kema rafe hɛ mbeli kala slene ta nci ba'a wəvəsəa nci.

¹⁸Pɛtɛ le mbeli nyi ki ghɛa nci rafete hɛ mbeli, mi, ŋwale tezhili le ŋwalea kwɛ ba'a mbeli pɛtɛ nci nyi nza hweŋkwa va hɛ keveci keveci kazeme nyi wəshi keveyi geva tekeleke kaŋa Shala.

¹⁹Ma ka dzeghe Shala nyi kahwelefefia Aron, nyi mbe meleme nyi ɓɛhwɛ ɓɛhwɛ dzeyi yitea yɛ meleme ta ka dzeghe Shala ne, le kweci mbeli nyi ntave mbeli shɛ tekeleke kezha nehe nda ŋa nci wəshi kezeme ke hɛ mbe yayata meleme, tsagha kaŋa ka Lɛvi nyi kerafete geva mbe palepa.

²⁰Ma kwa menete ŋkɛ kala nya mbe hɛɗia ŋkɛ ne, wəsə nya tiɗiɗi le nya megela yamenete Ɛzɛkiyas kwa kema Shala Mahwətə ta ŋkɛ.

²¹Ma mbe wəshi nyi menete pɛtɛ kezha slene ta ghɛa Shala, kezha wəsə mahalegə ba'a ghena nyi gezeke ŋkɛ ne, nahe ntsə geva kazele ɗe ta Shala le wənəa ŋkɛ pɛtɛ, vatse ndeke nda berete Shala.