Read kapsiki 2 Wəshi nyi Mene Ka Meghe 32 Bible Online

2 Wəshi nyi Mene Ka Meghe 32 - kapsiki bible

2 Wəshi nyi Mene Ka Meghe 32

¹Ma kwa sebe ta nya ncɛte ghəa ŋkɛ Ɛzɛkiyas kawəndə nya dɛŋe dɛŋe te Shala ne, pa Sɛnakɛrib, meghea ka Asiri se kadzembe hɛɗia Zhəwda. Pa ŋkɛ menete ghedəkwəa mbelia ŋkɛ yitea meleme nyi berete berete nyi zəzəte ŋkɛ kaŋzla.

²Ma kwa nakɛ Ɛzɛkiyas takwa takwa Sɛnakɛrib yitea Zhɛrəzalɛm kala wəsə kempa le ne,

³pa gezete nda ke mbelia jama ta ŋkɛ ba'a ke ka sewajɛa ŋkɛ kezha zhiɓəmte ɗasle nyi pelɛke te wəmbəa meleme. Pa yɛte zəzə ta ŋkɛ.

⁴Pa hɛ tsenete geva kwele kwele ba'a zhizhiɓəmte pɛtɛa yɛ ɗasle, tsagha le ntsə ta yɛmə nya kehwɛ dzeyi mbe hɛɗi. Kwa nza ŋkɛ ma ke hɛ: «Yagha ka Asiri kakemave yɛmə kwele kwele kese hɛ.»

⁵Pa Ɛzɛkiyas sahwe hwəa ŋkɛ kazhɛne sekawete zli nya yitea meleme, pa mtsehete biya ta cɛa ka ya ŋkwa, zhɛne, pa ŋate kwete zli ki ghɛ ki ghɛ. Pa mtsehete nda berete ke Milo nya mbe meleme ta David ba'a pa gezlate yɛ megha le yɛ gelə kwele kwele.

⁶Pa nteyi mbelia jama ta ka sewajɛ kezha sleke mbeli nyi mbe meleme. Pa tsenete mbeli pɛtɛ te ŋwela nya mɛa degha ta meleme kamtsehete nda berete ke hɛ, ma ke hɛ sha hɛ:

⁷«Nza mə kaka sahwe ba'a le berete. Ghazlənəma yɛ ma, dakema yɛ te kema ta meghea ka Asiri ba'a va mbeli nyi kwele kwele kwa sebe ta ŋkɛ ma. Kwa nya ŋkɛ, berete ma laka ŋa ɓəmə bela ke ŋa ŋkɛ.

⁸Deke berete ta wəndə ŋelɛ ya ve nahe, ama gheɓəmə ne, Shala Mahwətə ta ɓəmə ya shɛ, gheŋkɛ nde kekemane ɓəmə ba'a kampa yitea gheɓəmə.» Ghena ta Ɛzɛkiyas, meghea ka Zhəwda nyi ka mtsehete nda berete ke mbeli nyi mbe meleme.

⁹Ma temə vireɗi kwetere wəmbəa ŋkɛ, pa yɛ Sɛnakɛrib, meghea ka Asiri le ka sewajɛa ŋkɛ pɛtɛ menete ghedəkwəa nci mbe meleme ta Lakish. Se tagha, pa ghwenakɛ nda kweci mbelia jama ta ka sewajɛ ke meghe Ɛzɛkiyas ba'a ke ka Zhəwda nyi mbe Zhɛrəzalɛm pɛtɛ. Ghena nya yakeleke nda ŋkɛ ke hɛ:

¹⁰«Wa nya ghena nya gezete Sɛnakɛrib, meghea ka Asiri nya: Te wa veyi zəzə ta ŋayɛ yɛ nda ntishɛ ŋayɛ yɛ gweŋe mbe Zhɛrəzalɛm hwa mpa wa?

¹¹Nahe Ɛzɛkiyas kegezete ŋayɛ katembele ŋayɛ Shala ta ŋayɛ shave mbe dzeve ta ɗa, ama gheyɛ yaghwete ŋkɛ, pɛtɛ tempə yɛ va ma ba'a ndere.

¹²Ashɛ Ɛzɛkiyas shɛ nde mpəmte kələŋə ba'a reghwetɛ nyi keveyi geva kaŋa Mahwətə, kwa ndeke nda hweŋkwa ŋkɛ ke ka Zhəwda le ka Zhɛrəzalɛm kase kasəkwə Shala kwa kema ta reghwetɛ kwetɛŋe ba'a kadzeghe melɛa nci tagha nahe wəka?

¹³A yɛ keɗepe wəsə nya menete nda n'yɛ le ka shihɛ ɗa ke mbeli nyi te hɛɗi pɛtɛ wəka? Nahe yɛ shala ta nyighɛ hwelefe shɛhɛ kezləgwəke hɛɗia nci shave mbe dzeve ta ɗa na?

¹⁴Hwa shala nyi te hɛɗi nyi zehwe ka shihɛ ɗa pɛtɛ ne, kwete shɛ ya kwetɛŋe kembelete mbelia ŋkɛ we. Tsema nza Shala ta ŋayɛ kazləgwəke ŋayɛ shave mbe dzeve ta ɗa?

¹⁵Tsetsenya ne, mba yɛ kesərəakɛ Ɛzɛkiyas kasla ŋayɛ tseŋwə ba'a kaghwete ŋayɛ kala nya, yɛma ghena ta ŋkɛ yɛ ma! Kageze ŋayɛ 'ya zhɛkwa kwetɛŋe zhigə, shala shɛ ya kwetɛŋe va kwete hwelefe keɗema va kwete hɛɗi nya kezləgwəke mbelia ŋkɛ va ka shihɛ ɗa keɗema va 'ya we. Tsagha ne, katembelete ŋayɛ yɛ shala ta ŋayɛ we.»

¹⁶Mba mbeli nyi ghweneke meghea ka Asiri kaŋele Shala Mahwətə le nde mene nda slene Ɛzɛkiyas shanda.

¹⁷Pa meghea ka Asiri rafete palepa kezha ŋele Shala Mahwətə ta ka Israyɛl. Wa nya ghena nya geze ŋkɛ te nya: «Shaŋe yɛ shala ta kweci hwelefefi nyi te hɛɗi kazləgwəke mbelia nci va 'ya. Ashɛ Shala ta Ɛzɛkiyas kazləgwəke mbelia ŋkɛ va 'ya perə we.»

¹⁸Ma mbeli nyi ghwenakɛ Sɛnakɛrib ne, ntake hɛ kazlape ghena le berete le ghena ta ka Ɛbrə ke mbeli pelɛ slia Zhɛrəzalɛm. Ghenci ɗe kadake hɛ ba'a kataze nda mehele ke hɛ yitea nza hɛ kakelehwe meleme kahe kahe.

¹⁹Kala nya geze ghena ŋkɛ te kweci shala geze ghena ta Shala ta Zhɛrəzalɛm Sɛnakɛrib, deke wəshi nyi menete mbeli le dzeve gəmə ŋa nci.

²⁰Ntake yɛ meghe Ɛzɛkiyas le nde mɛ ŋkwa Ɛzayi, wəzege ta Amots kasəkwə Shala kezha kemane ta ŋkɛ.

²¹Pa Mahwətə ghwenakɛ nde ghwene ta ŋkɛ kwetɛŋe kadzembe ghedəkwəa ka Asiri kampəmte ka katsala le mbelia jama ta ka sewajɛ. Cape meghea ka Asiri zhɛnete geva kalə sha hɛɗia ŋkɛ bətə mbe hawe. Ma te kwete hɛ kwa dzembe ghɛa shala ta ŋkɛ ŋkɛ ne, pa ŋwalea ŋkɛ peslekɛ ŋkɛ.

²²Tsetse zləgwəke yɛ Ɛzɛkiyas le ka Zhɛrəzalɛm Mahwətə shave mbe dzeve ta Sɛnakɛrib, meghea ka Asiri ba'a va kweci ka ghema ta nci. Pa ŋkɛ ndeke nda zhɛne mpi ke hɛ laka yayata bela.

²³Kwele kwele mbeli fəke nda wəshi gəmə ke Mahwətə kadzembe Zhɛrəzalɛm ba'a ke Ɛzɛkiyas, meghea ka Zhəwda. Se mɛa vəa shɛ ne, pɛtɛ mbeli nyi kwa ghala ta ŋkɛ kahawe ve.

²⁴Ma te va shɛ ne, ntake zereghwe kemte keseve meghe Ɛzɛkiyas. Pa səkwəte Mahwətə, nya kencɛte nda laka wəsə kencɛ wəsə katembele ŋkɛ.

²⁵Ama Ɛzɛkiyas ne, kese kaɓela ganyɛ nya menete nda Shala we, kakwa tekeleke ne, pa kelete ghəa ŋkɛ, nda hwepete wənə Mahwətə ve, va Zhɛrəzalɛm ba'a hɛɗia Zhəwda.

²⁶Ama ya tsemanyɛ kele ghəa ŋkɛ ne, pa yɛ Ɛzɛkiyas le ka Zhɛrəzalɛm ɗepete fete ta nci kwa kema ta Mahwətə, vatse ɗema Mahwətə kese kaɗa hɛ mbe vəa meghea Ɛzɛkiyas.

²⁷Pa Ɛzɛkiyas kemave mcɛlə le zləvə kwele kwele. Pa ŋate yɛ cɛ kebete mze kwa ghwə ghwə, mze kwa tere tere, pelɛ nyi nza zləvə te hɛ, yɛ n'yia 'wərdə, yɛ gelə ba'a kweci wəshi nyi nza zləvə te pɛtɛ.

²⁸Pa ŋate yɛ cɛ kebete ha, tɛ ba'a n'yi, tsagha yɛ zlema sla le yɛ ŋa timɛti.

²⁹Pa ŋate kweci meleme ba'a pa kemave yɛ wəvəsəa timɛti, kwi ba'a yɛ sla kwele kwele, kwa nza ŋkɛ, nahe Shala kendeke nda mcɛlə tsape tsape.

³⁰Ɛzɛkiyas perə nde zhɛremte hələa Gihon kezha hwɛ yɛməa ŋkɛ kwagha kwagha, laka ŋkwa kepəkwə ta veci mbe meleme ta David. Ɛzɛkiyas ne, pɛtɛ slene ta ŋkɛ kewəpikɛ geva.

³¹Vatse gɛ, kwa ghweneke nda geva mbelia jama ta ka Babilone ka'yɛwe ghena te wəsə meŋele nya kemenete geva te hɛɗia ŋkɛ ne, pa Shala pelakɛ kamene kala nya ɗe ŋkɛ, kezha dzeghakɛ ba'a kanewe mehele ta ŋkɛ.

³²Ma nyi ketene slene ta Ɛzɛkiyas ne, nahe hɛ kenza kerafe rafe mbe palepa ta wəshi nyi nakɛ nde mɛ ŋkwa Ɛzayi, wəzege ta Amots kala shiwə ba'a mbe palepa ta ka meghe ka Zhəwda le ŋa ka Israyɛl. Nza ta ŋkɛ dɛŋe dɛŋe te Shala yaɓela palepa shɛhɛ.

³³Ma kwa mte ŋkɛ, pa mbeli lamte te ŋkwa nya pelɛ te ghə va kwele ta hwelefe David. Ma vəa ŋkwa shɛ ne, pɛtɛ ka Zhɛrəzalɛm le kweci ka Zhəwda kazlama yite. Manasɛ, wəzege ta ŋkɛ nde kelete meghe te ŋkwa ŋkɛ.