Read kapsiki 2 Wəshi nyi Mene Ka Meghe 33 Bible Online

2 Wəshi nyi Mene Ka Meghe 33 - kapsiki bible

2 Wəshi nyi Mene Ka Meghe 33

¹Ma nda dzembe meghe Manasɛ ne, va ta ŋkɛ meŋe bakeghəmbe, pa ŋkɛ menete va mcɛfemsə mcɛfeghəmbe kameghe mbe Zhɛrəzalɛm.

²Wəshi nyi kehitema geva sha Mahwətə yamenete ŋkɛ, laka teke mene wəshi nyi ndiremi ndiremi ta hwelefe nyi ŋkamte Mahwətə te hɛɗia shɛ kezha ve nda ke ka Israyɛl.

³Pa zhɛne kaŋate ŋkwa kedzeghe melɛ nyi mpəmte Ɛzɛkiyas, yitenyɛ hwa yɛ kələŋə. Pa pate yɛ reghwetɛ kazləvəa Ba'al, kamɓete yɛ selə nyi keveyi geva tekeleke ba'a kahawe va wəshi nyi pelɛ ghweme.

⁴Pa pate kweci reghwetɛa ka ɗepema Shala mbe ghɛa Shala mbe Zhɛrəzalɛm, ma ke Mahwətə gezete te ghəa ŋkɛ: «Mbe Zhɛrəzalɛm tenza sləa ɗa kaghala ghala.»

⁵Ma te ŋwela nyi bake yitea ghɛa Shala ɓiyitsa ne, pa pate yɛ reghwetɛ kazləvəa wəshi nyi pelɛ ghweme.

⁶Pa le ŋwalea ŋkɛ dzeghekɛ melɛ ŋkɛ le hɛ kwa zlərəa Hinom, kamene yayata ghwɛ ba'a meŋele nyi le ghwɛ, kaveyi ka gepe ŋkwa kwa weta le ka mene ghwə. Pa hwepete nda wənə ke Mahwətə le wəsə kwa ndiremi nyi mene ŋkɛ kwa kema ta ŋkɛ.

⁷Pa feɗete wəsə nya zhɛrete mbeli kashala kaveyi mbe ghɛa Shala. Ndagwara nahe Shala kegezete nda ke David ba'a ke wəzege ta ŋkɛ Salomon: «Teke mbe ghɛa Shala nya mbe Zhɛrəzalɛm, meleme nya ntave 'ya za ma ke nyi ketene te hɛɗia ka Israyɛl, kancɛ nza ta ɗa hwa mbeli kaghala ghala.

⁸Ma kenza ka Israyɛl kahawe va ghena nyi gezeke 'ya, wəshi mahalegəa, ghena nyi hwepete mbeli ba'a wəshi keshi nyi ndeke nda 'ya ke hɛ laka Moyize, kazhɛne 'ya kaŋkamte hɛ tɛape te hɛɗi nya ndeke nda 'ya ke ka shihɛ nci we.»

⁹Ama pa Manasɛ feɗeghete ka Zhɛrəzalɛm ba'a ka Zhəwda kamene wəsə kwa ndiremi ndiremi za ma ke mbeli nyi kese te hɛɗia shɛ, nyi zamte sebe Mahwətə te hɛ kezha ve mbelia ŋkɛ te.

¹⁰Pa Mahwətə gezete nda ghena ke yɛ Manasɛ le mbelia ŋkɛ, ama kese hɛ kave sleme yite we.

¹¹Vatse ghwenakɛ mbelia jama ta ka sewajɛa Asiri Mahwətə. Pa hɛ kesehwe Manasɛ ba'a n'yiame nda kweci kala dzara mbe ghweleme, hwepete ŋkɛ megela le zewe lɛ ba'a keleghe ŋkɛ kadzeme Babilone.

¹²Ma mbe tepe ta yaka ta ŋkɛ ne, pa Manasɛ səkwəte Shala Mahwətə ta ŋkɛ: pa ɗepete yɛ fete ta ŋkɛ pɛtɛ kwa kema ta Shala ta ka shihɛnyɛ.

¹³Pa ŋkɛ səkwəte Mahwətə kezha zhɛakɛ heli ŋkɛ yite. Pa Shala fate səkwə ta ŋkɛ ba'a zhɛneyi ŋkɛ te meghea ŋkɛ mbe Zhɛrəzalɛm. Se mɛa və nyagha, nahe Manasɛ keɗepete deke Mahwətə ya kaShala nya kaganda.

¹⁴Ma kwa sebe ta ghena nyi ne, pa Manasɛ ŋate zli pelɛke yitea meleme ta David kebiyanyɛ kadzeme yitea ghweme. Kadzeyi zlia shɛ laka bela kepəkwə ta veci sha hələa Gihon, kadzawa kwa zlərəa Sɛdron hwa'a laka mɛa degha ta kelepe, kwa ntəsləte Ofɛl ŋkɛ. Pa fəyi mbelia jama ta ka sewajɛ mbe meleme nyi berete berete nyi mbe Zhəwda perə.

¹⁵Pa fəmte wəshi zhɛrete mbeli kashala shave mbe ghɛa Shala le wəsə nya feɗete ŋkɛ kashala kaveyi mbe. Pa mpəmte yɛ reghwetɛ nyi pate ŋkɛ pelɛ ghweme ta ghɛa Shala ba'a mbe Zhɛrəzalɛm, pa betakɛ kwetiɓəa nci pelɛke pelɛke ta meleme.

¹⁶Pa ŋkɛ zhɛne reghwetɛa Mahwətə te ŋkwa ŋkɛ, dzeghekɛ nda melɛ kejikə ghə ba'a melɛ ketsa hana ba'a gezete nda ke ka Zhəwda kahawe va Shala Mahwətə ta Israyɛl.

¹⁷Ndagwara mba kweci mbeli kadzeghe melɛ dzeme hwa kweci kələŋə nyi keveyi geva tekeleke te hɛɗia shɛ, ama deke kazləvəa Shala Mahwətə ta nci.

¹⁸Ma nyi ketene slene ta Manasɛ ne, nahe hɛ kenza kerafe rafe mbe palepa ta slene ta ka meghea ka Israyɛl. Mbe palepa shɛ səkwə ghə nya menete nda ŋkɛ ke Shala ta ŋkɛ ba'a ghena nyi gezete nda ka mɛ ŋkwa se va Mahwətə, Shala ta ka Israyɛl.

¹⁹Səkwə ghə ta ŋkɛ ba'a tsema tsema fate Shala, ghena ta fete nyi menete ŋkɛ ba'a nzama ta ŋkɛ dɛŋe dɛŋe te Shala, sləa kələŋə nyi ŋate ŋkwa kadzeghe melɛ ŋkɛ hwe, yɛ selə le yɛ pa ta wəshi nyi zhɛrete mbeli kashala, nda teɗepete fete nyi menete ŋkɛ kwa kema ta Shala ne, pɛtɛa hɛ kerafete geva mbe slene ta Hozay.

²⁰Ma kwa mte Manasɛ ne, pa mbeli lamte te wəvea ŋkɛ. Amon, wəzege ta ŋkɛ nde kelete meghe te ŋkwa ŋkɛ.

²¹Va ta Amon bakemsə bakeghəmbe nda kelete meghe ŋkɛ. Pa ŋkɛ menete va bake mbe meghe mbe Zhɛrəzalɛm.

²²Wəsə nya kehitema geva sha Mahwətə yamenete ŋkɛ kala yitenyɛ Manasɛ: ntake kadzeghe nda melɛ ke wəshi nyi zhɛrete mbeli kala Shala nyi menete yitenyɛ ba'a kahawe va hɛ.

²³Ama keɗepete fete ta ŋkɛ kwa kema ta Mahwətə kala nya menete Manasɛ we. Nya tekeleke ma ne, pa ŋkɛ menete jaɗafa kwele ma zhɛkwa ke ŋa ŋkɛ.

²⁴Pa mbelia jama ta ka sewajɛa ŋkɛ tsate ghena yite, peslekɛ ŋkɛ ki ghɛa ŋkɛ.

²⁵Ama pa ka Zhəwda mpəmte mbeli nyi kepeslekɛ meghe Amon, ntave Zhoziyas, wəzege ta ŋkɛ te ŋkwa ŋkɛ.