Read kapsiki 2 Wəshi nyi Mene Ka Meghe 35 Bible Online

2 Wəshi nyi Mene Ka Meghe 35 - kapsiki bible

2 Wəshi nyi Mene Ka Meghe 35

¹Pa Zhoziyas menete gəsəkəa Pake mbe Zhɛrəzalɛm kazləvəa Mahwətə. Mbe kwa meŋe wəfaɗeghəmbe ta hɛa tere kwa ghate mbe va ne, pa mbeli hehenemte wəshi keseɗa yitea gəsəkə.

²Pa Zhoziyas zhɛne kaveyi ka dzeghe Shala te slene ta nci ba'a kamtsehete nda berete ke hɛ kamene slene ta nci ki Ghɛa Mahwətə.

³Kwa sebe ta ŋkɛ, pa geze nda ke ka Lɛvi, ghenci nyi nza hweŋkwa va hɛ kateke nda wəshi ke mbeli ba'a nyi keveyi geva tekeleke kezha slene ta Mahwətə. Ma ke sha hɛ: «Veyi mə səndəkwə nya keveyi geva tekeleke kaŋa Mahwətə ki ghɛa ŋkɛ nya ŋate meghea ka Israyɛl Salomon, wəzege ta David. Mba yɛ kazhɛne kakele ŋkɛ te bazla ta ŋayɛ zhɛkwa we. Tsetsenya ne, nza mə kaka mene slene ta Shala Mahwətə ta ŋayɛ ba'a ŋa ka Israyɛl, mbelia ŋkɛ.

⁴Nehete mə geva keyita keyita ba'a kala wəvəsəa slene ta ŋayɛ, kala nya kese mbe palepa nyi rafete David, meghea ka Israyɛl ba'a ŋa wəzege ta ŋkɛ Salomon.

⁵Slete yayata peləa ka Lɛvi mbe ghɛa Shala, kezha mene nda slene ke kweci ka Israyɛl, kala nehe ta nci kwa yita ta nci.

⁶Gheyɛ ka hi kahene wəshi keseɗa kezha Pake, yaɓemte mə ghəa ŋayɛ, nda temene yɛ kezha ka Israyɛl ka menəhɛ ŋayɛ yitea mene geva gəsəkə kala ghena nyi gezave nda Mahwətə ke Moyize.»

⁷Pa Zhoziyas fəke zhɛgwəa lɛməa timɛti le kwi 30.000 shave hwa wəshia ŋkɛ kala nya kehi kezha ka Israyɛl nyi tagha, kwa ɗe hɛ hɛ kezha mene gəsəkə Pake, tsagha mcɛmcɛli 3.000.

⁸Pa mbelia jama nyi yite fəke wəshi keseɗa kezha mbeli, kezha ka dzeghe Shala ba'a kezha ka Lɛvi le ɗe ta ghəa nci. Pa yɛ Hilkiya, Zakari ba'a Yɛhiyɛl, nyi nza ghɛa Shala te dzeve va hɛ, fəke nda zhɛgwəa lɛməa timɛti le ŋa kwi 2.600 ke ka dzeghe Shala kezha gəsəkəa Pake, tsagha mcɛmcɛli gwəmsə mahekene.

⁹Ma mbeli nyi te ghəa ka Lɛvi, yɛ Konaniya, le ka kesaka meghekɛ Shemaya ba'a Netanɛyɛl, Hashabiya, Yɛyiyɛl ba'a Yozabad fəave nda zhɛgwəa lɛməa timɛti le ŋa kwi 5.000 ba'a mcɛmcɛli gwəmsə mcɛfe ke ka Lɛvi.

¹⁰Wa nya tsetse hite geva gəsəkə: slete ka dzeghe Shala te ŋkwa slene ta nci, ka Lɛvi te ŋa nci wəvəsə kala nya gezeke meghe.

¹¹Zhibədikə mbeli kasla ghə te yɛ zhɛgwəa lɛməa timɛti le ŋa kwi. Pa hɛ ndeke nda mimia wəshi keseɗa nyi ke ka dzeghe Shala kezha sheke hɛ te reghwetɛ. Ma ka Lɛvi le ŋa nci ne, hweta yakwaɓe hɛ seyi kənəa wəshi keseɗa.

¹²Pa mbeli tseneyi wəshi keseɗa, za ma mcɛmcɛli nyi tedzeghe nda melɛ kwa tere tere mbeli le ke Mahwətə va bela, kala nehe geva ta ka yita ta ka Israyɛl, kala nya kerafete geva mbe palepa ta Moyize.

¹³Kala wəsə keshi ne, pa mbeli pesakɛ zhɛgwəa təməa Pake te ghwə, mbe və nya ta kweci mbeli wəshi gəmə kwa yɛ shaga kwa dəghwə, yɛ shaga kwa dəghwəa rekɛ keɗema yɛ shaga dəghwəa lɛ. Kwa sebe ta ŋkɛ, pa hɛ keleke nda kahe kahe kase ke ka Israyɛl.

¹⁴Ma kwa sebe ta ŋkɛ, pa ka Lɛvi takɛ nda ŋa nci ke ka dzeghe Shala ba'a kaŋa ghəa nci. Kwa nza ŋkɛ, ma ka dzeghe Shala nyi kahwelefe ta Aron ne, mba hɛ kadzeghe melɛ kwa tere tere ba'a katere merege ta kweci wəshi keseɗa pa va tɛhwɛɗi. Vatse nda ta wəshi kezeme ka Lɛvi.

¹⁵Ma ka gha cimə nyi kahwelefefia Asaf ne, meslete hɛ te ŋkwa slene ta nci, kala nya gezeke yɛ David le yɛ Asaf, Hɛman ba'a Yedəwtəwn nyi kaka ncɛ nda ntsehwele. Te ŋkwa nci ka ya degha shanda. Kwete hwa hɛ shɛ keslənyɛ te slene ta ŋkɛ we, kwa nza kweci ka Lɛvi kata nda wəshi kezeme ke hɛ perə.

¹⁶Tsetse hite gəsəkə nya te vecia shɛ mbeli kazləvəa Mahwətə, mene ta gəsəkəa Pake tsagha ŋa wəshi gəmə kemene melɛ te reghwetɛa Mahwətə, yipə yipə le ghena nya gezeke meghe Zhoziyas.

¹⁷Ma kwa sebe ta gəsəkəa Pake ne, pa ka Israyɛl nyi tagha, menete gəsəkəa ɗafa nyi ɗema tenjɛne hwe kahɛ mberefaŋe.

¹⁸Te hɛɗia Israyɛl ne, kezhɛne mbeli kamenete gəsəkəa Pake kala nyagha se te vəa nde mɛ ŋkwa Saməyɛl we. Kwete shɛ hwa ka meghea kɛfi ka Israyɛl nya kemenete kala nya hite nya Zhoziyas zlaɓe le kemane ta ka dzeghe Shala, ka Lɛvi, ka Zhɛrəzalɛm, ka Zhəwda ba'a kweci ka Israyɛl nyi tagha we.

¹⁹Mbe kwa meŋe degheseghəmbe ta va ta Zhoziyas mbe meghe menete geva gəsəkəa shɛ.

²⁰Ma te kwete hɛ kwa sebe ta nya nahemte hi ta ghɛa Shala Zhoziyas ne, cape Nɛko, meghea ka Ɛzhipte kadzeme fəghe kampa le meleme ta Karkɛmish, mɛa hələa Efrate. Pa Zhoziyas ɗe kafɛa nda hweŋkwa ke ka Ɛzhipte.

²¹Pa Nɛko ghwenakɛ mbeli le ghena kala: «Meghea ka Zhəwda, yitea wa ɗe na keve ɗa tehene kwa hweŋkwa wa? Kezha gha sheke 'ya yitea mpa ɓeshi we, ama kezha kwete nde ghema, kwiɗi kahe kahe ke Shala sha 'ya. Le 'ya Shala, sərəakɛ zhɛne nda ghə, keɗema tsagha ne, katepesle ŋa ŋkɛ.»

²²Ya tsagha ŋkɛ ne, kese Zhoziyas kafɛa yitea mpa le Nɛko we. Hɛreɗɛ ɗema fa ghena nya gezeke ŋkɛ, ndagwara se va Shala le ghəa ŋkɛ se ghena shɛ. Pa mbeɗemte lekwesa meghe yitea ɗepetema mbeli, cape kadzawa ŋwela ta Mɛgido kezha mpa.

²³Ma kwa mpa ne, pa ka sewajɛ hekɛ meghe Zhoziyas le have, ma ke sha mbelia ŋkɛ: «Kelemte ɗa mə, kwa nza ŋkɛ nahe wəsə keɗakɛ ɗa kwele kwele.»

²⁴Tseɗake mbelia ŋkɛ kelakawa ŋkɛ sawa pelɛ wəmata gədəwəa ŋkɛ, veyi ŋkɛ pelɛ kwete wəmata gədəwə, keleghe ŋkɛ kadzeme Zhɛrəzalɛm. Pa ŋkɛ mtenyɛ mbe, ma vəa ŋkwa nya lamte mbeli kwa kwele ta ka shinyɛ ne, pɛtɛ ka Zhəwda le ka Zhɛrəzalɛm kenehwenekɛ Zhoziyas.

²⁵Pa nde mɛ ŋkwa Zhɛrɛmi ghate kwete nehwene za kənəa Zhoziyas. Se mɛa vecia shɛ pa va ɓeshi ne, pɛtɛ ka gha cimə nyi kazhili le nyi kami kageze ghena ta Zhoziyas mbe nehwene ta nci, pa nde zhɛrenyɛ ke wəsə keshi sha ka Israyɛl. Kerafe rafe nehwenea shɛhɛ mbe palepa ta nehwene ghə.

²⁶Ma nyi ketene slene ta Zhoziyas ba'a wəshi ganji nyi menete ŋkɛ kala nya kerafete geva mbe wəsə mahalegəa Mahwətə,

²⁷ka ghate le ka keɗaŋe ta yɛ slene ta ŋkɛ ne, nahe hɛ kenza kerafe rafe mbe palepa ta slene ta ka meghea ka Israyɛl le ŋa ka Zhəwda.