Read kapsiki 2 Wəshi nyi Mene Ka Meghe 6 Bible Online

2 Wəshi nyi Mene Ka Meghe 6 - kapsiki bible

2 Wəshi nyi Mene Ka Meghe 6

¹Ma ke Salomon tsate lewela: «Mahwətə, gha nde zəzəte kanza mbe ŋkwa nya zhikwətəkwə təkwə.

²Nahe 'ya keŋate ŋa ghɛ kendeɗenyɛ, wərə na kanza mbe kaghala ghala!»

³Pɛtɛ ka Israyɛl nyi tsenete geva satenji meslete. Pa meghe Salomon zhɛreghe geva laka hɛ, pa wəpikɛ hɛ.

⁴Ma ke: «Hana 'ya sha Mahwətə, Shala ta ka Israyɛl! Gheŋkɛ le ghəa ŋkɛ nde viɗikɛ ghena nya meɗeyi nda ŋkɛ ke yiteyɛ ɗa David kwa geze ŋkɛ:

⁵‹Se te veci nya fəakave mbelia ɗa 'ya shave mbe Ɛzhipte ne, kentave meleme 'ya kwetɛŋe hwa meleme ta pɛtɛa ka Israyɛl kezha ŋate ɗa ghɛ mbe kancɛ nza ta ɗa hwa hɛ we ba'a kentave wəndə 'ya kameghea ka Israyɛl, mbelia ɗa we.

⁶Ama nahe 'ya kentave Zhɛrəzalɛm kezha nza slə mbe, nahe 'ya kentave ŋa, gha, David, kezha mene meghe te ka Israyɛl, mbelia ɗa.›

⁷Nahe yiteyɛ ɗa David kezəzəte kaŋa ghɛ kezha sləa Mahwətə, Shala ta ka Israyɛl.

⁸Ama ma ke Mahwətə shɛ: ‹Nahe na kezəzəte tsape tsape kezha ŋate ɗa ghɛ.

⁹Ama gha nde teŋa ghɛa shɛ we, wəzege ta ŋa. Kaganda ne, wəzege ta ŋa nya yake na nde teŋa ɗa ghɛa shɛ!›

¹⁰Tsetse, kalə Salomon le geze ta ŋkɛ mbe kema, na Mahwətə keghereŋe te meɗe mɛa ŋkɛ: 'ya ya te ŋkwa yiteyɛ ɗa David pelɛ pasla ta meghea ka Israyɛl, kala nya gezete Mahwətə, nahe 'ya keŋate ghɛ nya keveyi geva tekeleke kezha Mahwətə, Shala ta ka Israyɛl.

¹¹Nahe 'ya keveyi səndəkwə nya nza jikə geva nya menete Mahwətə le ka Israyɛl kwa.»

¹²Ma kwa sebe ta ŋkɛ ne, pa meghe slete kwa kema ta reghwetɛa Mahwətə, kwa kema ta pɛtɛa ka Israyɛl nyi ketsenete geva, pa kafete dzeve yitea ghweme kezha səkwə ghə.

¹³Nahe Salomon kemenete pasla le mze kwa tɛawetɛa nya veyi mbeli te tepe ghɛ. Bezlea ŋkɛ ne mɛtre bake pa gasle yite, tsagha bela pɛtɛ, biya ta ŋkɛ yite ghweme ne, mɛtre pa gasle yite. Tarame Salomon dzeme pelɛ ba'a gwəɗəŋənyɛ te kema ta ka Israyɛl nyi ketsenete geva pɛtɛ. Pa kafete dzeve yitea ghweme kasəkwə ghə.

¹⁴Ma ke: «Mahwətə, Shala ta ka Israyɛl, kwete Shala shɛ kala gha we, ya pelɛ ghweme ya kwake te hɛɗi. Mbanyɛ ghena ta jikə geva ta mbeli le gha yitea ghəa ŋa nya menete na le ka mene slene ta ŋa, nahe na kese dɛŋe dɛŋe te jikə geva ta ŋa laka hɛ, vəa ŋkwa nya nza hɛ kahawe va gha le pɛtɛa wənəa nci.

¹⁵Nahe na kemenete nda ke nde mene slene ta ŋa David, yiteyɛ ɗa, wəsə nya meɗeyi nda na. E'e, ma wəsə nya gezete nda na ne, nahe na keyipəyi kwa le ghəa ŋa ɓeshi.

¹⁶Yawa, ma tsetsenya gɛ, Mahwətə, Shala ta ka Israyɛl, yipəte ghena shɛ kala nya meɗeyi nda na ke nde mene slene ta ŋa David, yiteyɛ ɗa, kwa geze na shɛ: Ma keyate dzeghwa ta nci hwelefe ta ŋa kayɛ fete yitea wəsə mahalegəa ɗa ne, kala nya menete na, gha le ghəa ŋa ne, fəyitekeghə geze ŋa 'ya katenza wəndəa nci kameghea ka Israyɛl kwa sebe ta ŋa.

¹⁷Tsetsenya gɛ Mahwətə, Shala ta ka Israyɛl, yipəyi meɗe mɛa ŋa kwa kala nya meɗeyi nda na ke nde mene slene ta ŋa David!

¹⁸Ama kanzate nza Shala kaganda hwa mbeli kwake te hɛɗi na? Ŋkwa nya pelɛ ghweme ya tsema wəba ta ŋkɛ ne, shaŋe kazereghete! Keɓɛhwɛ mbarave ghɛ nya ŋate nya 'ya wəka?

¹⁹Ya ma gɛ, Shala Mahwətə ta ɗa, zhɛrete geva laka 'ya, fate səkwə ghə ta nde mene slene ta ŋa le gwedə, kaganda ne, fate heka nya heka ŋa 'ya.

²⁰Pelemte ntsə ta ŋa! Zəzəte ghɛ nya kawəsə ganyɛ veci le viɗi, kwa nza ŋkɛ kaŋkwa nya gezete na ne, kateve sləa ŋa te ŋkɛ. Fate səkwə ghə nya səkwə 'ya te ŋkwa nya.

²¹Fate heka ta ɗa ba'a heka ta ka Israyɛl, mbelia ŋa, kenza ghen'yɛ kasəkwə ŋa te ŋkwa nya. Fate səkwə ta n'yɛ, Mahwətə, pelɛ ghweme, te ŋkwa nya nza na. Fate səkwə ta n'yɛ ba'a kelemte n'yɛ te wənə.

²²Ma kekeleke wəndə nya kebezemte nda ghena ke nde ghedəkwəa ŋkɛ mbeli ne, wərə mbeli kaŋka wəndə shɛ kadzeyitea fela kwa ndiremi. Ma kese ŋkɛ kazemte fela teke mbe kema ta reghwetɛ ki ghɛa ŋa nya ne,

²³ma gha nya pelɛ ghweme gɛ, ŋkate sleme yite, se nehemte ghwə kwelɛ ka mene slene ta ŋa, kezha 'yɛ wəndə nya nza fete ve mbeli ba'a kezha ɗepete mbeli kaɗema fete va wəndə nya tiɗiɗi.

²⁴Ma keɗate ka Israyɛl ka ghema ta nci kwa yɛtema ŋa fete hɛ, ma kegeze hɛ ŋa n'yɛ fete ke hɛ sha gha ne, kenza hɛ katsahe ŋa, kenza hɛ kasəkwə ŋa le gwedə teke ki ghɛa ŋa nya,

²⁵ma gha nya pelɛ ghweme gɛ, ŋkate sleme yite, kelemte nda beze ghena ta nci te wənə ke hɛ ba'a pa na ndeke nda hɛɗia nci nya ndeke nda na ke ka shihɛ nci kaghate ba'a ke hɛ le ghəa nci, kwa nza hɛ kambelia ŋa.

²⁶Keɗema keŋzlete geva ŋkwa nya pelɛ ghweme kaɗema va kame va nya yɛtema ŋa fete ka Israyɛl ne, ma kezhɛreke geva hɛ kase teke te ŋkwa nya kasəkwə ŋa, kenza hɛ katsahe ŋa, kashifə ghəa nci, va nya vate ndiremi na te hɛ,

²⁷ma gha nya pelɛ ghweme gɛ, ŋkate sleme yite ba'a pa na kelemte nda beze ghena ta nci te wənə ke hɛ, kwa nza ŋkɛ ka mene slene ta ŋa hɛ, mbelia ŋa hɛ. Za ma ɓiyitsa ne, tekete nda ke hɛ kezha ɗepete dzeghwa megela, ɓiyitsa ne, me nda va ke hɛɗi nya kaŋa ŋa nya, nya ndeke nda nya na ke hɛ kawəsə kezeme ghɛ.

²⁸Ma keme ma te hɛ keɗema ba, keghwelenyɛ ha keɗema kezhɛrenji hɛ kawəbəghə, ma kese dzale keɗema zhamaya kwele kwele, ma kenza ka ghema ta nci kasa nda yaka ke ka Israyɛl kase hwa'a mbe meleme ta nci nyi nza berete mbe, ya nyama nyama ta ndiremi keɗema zereghwe nya kemenete geva ne,

²⁹ma kedzeghəa kwete wəndə keɗema ka Israyɛl, mbelia ŋa yaka nyi jama jama ne, ma kenza hɛ kasəkwə le mpi dzeve laka ghɛ nya, kwa sletete dzeve ta nci hɛ yitea ghweme,

³⁰ma gha nya kenza pelɛ ghweme le nza ta ŋa, veyite sleme yite, kelemte nda fete ta nci te wənəa ŋa ke hɛ, pa na kamene nda ke yayata nci kala dzeghwa ta ŋkɛ, kwa nza ŋkɛ nahe na keɗepe wənəa ŋkɛ. Kwa nza ŋkɛ gha kwetɛŋe ŋa nde ɗepe wənəa mbeli.

³¹Menete tsagha nda nza ka Israyɛl kadzeghwate dzeghwa kala nya zəzə na, ma tsagha ne, kahawe hɛ va gha keveci keveci, kala yayata və nya nza hɛ te hɛɗi nya ndeke nda nya na ke ka shihɛ n'yɛ.

³²Ma kese mentiɓə te hɛɗi nya cakeɗake, nya keɗema kande Israyɛl, mbelia ŋa, kasəkwə ŋa ki ghɛ nya kwa fate zləvəa sləa ŋa ŋkɛ ba'a berete nya mene slene na le,

³³ma gha gɛ, Mahwətə, gha nya pelɛ ghweme le nza ta ŋa, veyite sleme yite, ndeke nda wəsə nya 'yɛwete ŋkɛ. Kala nya nda nza mbeli nyi te hɛɗi pɛtɛ kaɗepete ŋa, nda teteke hawe hɛ va gha kala ka Israyɛl, mbelia ŋa nyi kehawe va gha, kateɗepete hɛ kaganda nza ghɛ nya ŋate ŋa 'ya, na keveyi geva kaŋa ŋa.

³⁴Ma kelə ka Israyɛl kampa le ka ghema ta nci, kala ghena nya gezave nda na ke hɛ, ma kezhɛrete geva hɛ laka meleme nya ntave nya na ba'a laka ghɛ nya ŋate ŋa nya 'ya, ma kenza hɛ kasəkwə ghə yitea gha,

³⁵veyite sleme yite pelɛ ghweme na, fate səkwə ghə le mpi dzeve ta nci, se kakemane hɛ.

³⁶Ma kefatema ŋa ghena ka Israyɛl, kwa nza ŋkɛ, wəndə shɛ ya kwetɛŋe nya keɗema kamene jaɗafa tɛape we, nda kwete katehwepe wənə na va hɛ, katepele nda hɛ na ke ka ghema ta nci kakese hɛ kaka mavashi kalə te hɛɗia nci nya dekwede keɗema nya cakeɗa.

³⁷Ma te hɛɗi nya nza hɛ kaka mavashi ne, pa hɛ zəzəve ghena, mpiyi ŋa dzeve ba'a səkwəte ŋa, ma ke hɛ gezete: Nahe ghen'yɛ kebezemte ŋa ghena, jaɗafa yamenete ghen'yɛ, nahe fete kekeseve n'yɛ ke hɛ ne,

³⁸ma kezhɛreke geva hɛ sha gha le wənəa nci pɛtɛ ba'a mehele ta nci pɛtɛ kwa nza hɛ kaka mavashi, ma kesəkwəte ŋa hɛ laka hɛɗi nya ndeke nda nya na ke ka shihɛ nci, laka meleme nya ntave na, laka cɛ nya ŋate ŋa nya 'ya,

³⁹ma gha gɛ, nya pelɛ ghweme le nza ta ŋa, veyite sleme yite, fate səkwə le mpi dzeve ta nci, se kemanakɛ hɛ ba'a pa na kelemte nda jaɗafa nya menete ŋa hɛ te wənə.

⁴⁰Shala ta ɗa, pelemte ntsə ta ŋa! Veyite sleme yitea səkwə nya səkwə nya 'ya te ŋkwa nya tsetsenya.

⁴¹Ma tsetsenya, Shala Mahwətə, beghakɛ səndəkwə nya keveyi geva kaŋa ŋa kadzete ŋkwa nya nza berete ta ŋa te, nde kanza te ŋkwa nya kehite geva kezha zhɛne mpi na te. Pa ka dzeghe Shala ta ŋa nyi, Shala Mahwətə seɗete mbele ŋkwa ta ŋa kala nya seɗe lekwesa ta nci hɛ. Pa mbelia ŋa ncɛte zlama ta nci le zeɗe nza ta nci.

⁴²Shala Mahwətə, tsəkwəmtema meghe nya ntave na na ma, zəzəte wəshi ganjia ŋa nyi menete nda na ke nde mene slene ta ŋa David.»