Read kapsiki 2 Wəshi nyi Mene Ka Meghe 8 Bible Online

2 Wəshi nyi Mene Ka Meghe 8 - kapsiki bible

2 Wəshi nyi Mene Ka Meghe 8

¹Kwetere wəmbəa va bakemsə ne, pa Salomon nahemte ŋa ta ghɛa Mahwətə ba'a ghɛa meghe.

²Pa ŋkɛ zhɛne kaŋate meleme nyi ndeke nda Hiram, pa fəyi ka Israyɛl mbe hɛ le nza ta nci.

³Kwa sebe ta ŋkɛ, pa ŋkɛ lə kezha ha nda mpa ke meleme ta Hamat-Soba, pa kelehwe ŋkɛ.

⁴Pa ŋkɛ ŋate Tadmor, laka ŋkwa nya te ɓerama, kala kweci meleme nyi ŋeŋate ŋkɛ laka hɛɗia Hamat kezha bete wəshi kezemea ŋkɛ.

⁵Pa ŋkɛ ŋate Bɛt-Horon nya pelɛ ghəa ŋkwa ba'a Bɛt-Horon nya kwake kwake, meleme nyi le berete, nyi dzasle kwa zli ba'a nyi ŋzlete degha ta nci mbeli le gelembe nyi nza wəshi keŋzle te hɛ,

⁶tsagha Ba'alat ba'a pɛtɛa meleme nyi bete wəshi kezemea ŋkɛ ŋkɛ mbe, nyi ghereŋe wəmata gədəwəa ŋkɛ ŋkɛ mbe ba'a nyi bete gədəwə ŋkɛ mbe. Pa ŋate kweci ŋkwa nyi zəzəte ŋkɛ mbe Zhɛrəzalɛm, pelɛ ghweme ta Liban ba'a te yayata ŋkwa nya te hɛɗia meghea ŋkɛ pɛtɛ.

⁷Le kweci ka Hɛt, ka Amor, ka Pɛrɛs, ka Hava ba'a ka Zhɛbəs nyi ketene te hɛɗia ŋkɛ, geze ta ŋkɛ, mbeli nyi keɗema kaka Israyɛl.

⁸Ma nda nza hɛ mba tagha ne, va nya ɗema ka Israyɛl kezamte hɛ. Ke ghenci ndeke nda kweci slene Salomon le berete, mba hɛ kamene slene shɛ pa ɓeshi.

⁹Ama kendeke nda slene mava Salomon ke kwete hwa ka Israyɛl we. Pa veyi hɛ kaka sewajɛ kempa nyi jama jama, kaka zleɗe wəmata gədəwə ba'a kaka zleɗe gədəwə.

¹⁰Wa nyi mbeli nyi ntave mbeli kanza te ghəa mbelia jama ta meghe Salomon nyi: gwəmsə bake ba'a mcɛfemsə mbeli nyi te ghəa ka mene slene.

¹¹Laka ghena nya gezeke Salomon, ntəŋə male ta ŋkɛ nya kawəzha ta Farawon shave mbe meleme ta David, kantishɛ nda ki ghɛ nya ŋate nda mbeli. Ma ke meghe: Ya male ta ɗa nde ne, kanza nde ki ghɛa David meghea ka Israyɛl we, kwa nza ŋkɛ ma ŋkwa nyi veyi geva səndəkwəa Mahwətə te ne, nahe hɛ keveyi geva tekeleke kaŋa Shala.

¹²Se te vecia shɛ ne, pa Salomon dzeghekɛ nda melɛ kwa tere tere ke Mahwətə te reghwetɛ nya ŋate ŋkɛ te kema ta ŋkwa nya mɛa ta ghɛa Shala.

¹³Kala ghena nya hwepeyi Moyize kezha veci nya kentave geva tekeleke, pa yɛ dzeghekɛ melɛ te veci kezhɛne mpi, te kwa ghate ta hɛ mbe tere, ba'a te vecia gəsəkə nyi jama jama mahekene mbe va, ŋa ɗafa kwalekwala, ŋa Pantekote ba'a ŋa ghwəli.

¹⁴Pa Salomon yipəyi ghena nyi se yitenyɛ David kamene kwa, kaveyi ka dzeghe Shala te slene ta nci nyi mene hɛ keveci keveci, pa ka Lɛvi nyi ketsahe Shala keveci keveci kadzeyitea ka dzeghe Shala mbe slene ta nci ba'a ka ya degha kala wəvəsəa nci mɛa yayata degha. Nya ghena nya gezeke David, wəndəa Shala.

¹⁵Kezlakemte hweŋkwa nyi ncɛte nda David ke ka dzeghe Shala le ka Lɛvi mbeli ya kwetɛŋe we, ya te ghəa wəshi nyi nza zləvə te hɛ.

¹⁶Pɛtɛ slene nyi zəzəte Salomon kamene keyipəte geva, se te gha shihəa ŋa ta ghɛa Shala hwa'a te kwa keɗaŋe ta slene ta ŋkɛ: kendeɗenyɛ ghɛa Mahwətəa shɛ fate fate.

¹⁷Cape Salomon kadzembe Ɛsiyon-Gɛbɛr ba'a Ɛlat, ŋkwa nyi ghereŋe kwambelə te mɛa ndərəa kweci gwəzə kala bəremə te hɛɗia Ɛdom.

¹⁸Pa meghe Hiram ghwenave nda kwambelə nya zleɗe sewajɛa ka Fɛnisi nya keseneve dzate te yɛmə megela. Cape ka sewajɛa shɛhɛ le mbelia Salomon kadzete hɛɗia ka Ofir, mze kwa tere tere kwele ma ke kiləwə 13.000 yakeleke nda hɛ ke Salomon.