Read kapsiki Ɛsdras 3 Bible Online

Ɛsdras 3 - kapsiki bible

Ɛsdras 3

¹Ma kwa dzembe kwa mberefaŋe ta tere mbeli mbe va ne, pɛtɛ ka Israyɛl nyi kese mbe meleme ta nci tsenete geva kanya kwetɛŋe mbe Zhɛrəzalɛm.

²Ntake yɛ Yɛshəwa, wəzege ta Yosadak sate te ŋkwa zlaɓe le kweci ka menəhɛnyɛ nyi kaka dzeghe Shala, tsagha yɛ Zorobabɛl, wəzege ta Shɛyaltiyɛl le kweci ka menəhɛnyɛ, kezha ŋa reghwetɛa Shala ta ka Israyɛl yitea dzeghe nda yɛ melɛ kwa tere tere mbeli te kala nya kerafete geva mbe wəsə mahalegəa Moyize, nya kawəndəa Shala.

³Ya ghazlənə nza kazhɛ nda ke hɛ va mbeli nyi te hɛɗia shɛ ne, pa hɛ ŋate reghwetɛa shɛ te shihəa ŋkɛ nya vəashi shanda. Ntake hɛ kadzeghe nda yɛ melɛ kwa tere tere te ke Mahwətə masheke le tɛhwɛɗi.

⁴Kwa sebe ta ŋkɛ ne, ntake hɛ kamene gəsəkəa yɛ ghwəli kala nya kerafete geva. Keveci keveci dzeghe melɛ kwa tere tere hɛ kala nya 'yɛwete wəsə keshi te vəghwə.

⁵Ma se te vəa shɛ ne, ntake hɛ kadzeghe melɛ kwa tere tere nya keveci keveci, yɛ melɛ kwa tere terea dzemɛa ghweme ta tere ba'a nyi kaŋa vəa gəsəkə nyi keveyi geva tekeleke kaŋa Mahwətə, tsagha kaŋa mbeli nyi kekele nda kweci wəshi gəmə le ɗe ta nci ke Mahwətə.

⁶Te kwa ghate ta hɛa tere kwa mberefaŋe ne, pa hɛ ghate kadzeghe nda yɛ melɛ kwa tere tere ke Mahwətə, ya kwela ɗema yɛ shihəa ghɛa Mahwətə kenaka kaveyi geva.

⁷Ma kwa sebe ta ŋkɛ ne, ntake hɛ kaŋki nda cɛdɛ ke ka tsehe pelɛ le ka sla sheghwə. Zhɛne ne, kəliɓə hɛ fəave nda wəshi kezeme, wəshi kesa ba'a n'yi ke ka Sidon le ka Tir yitea fəke nda sheghwə lekelekea Liban hɛ ke hɛ jive te ndərə hwa'a mbe Jafa, kala nya ndeke nda hweŋkwa Sirəs, meghea ka Pɛrse ke hɛ.

⁸Ma te kwa bake ta va kwa sebe ta dzembe Zhɛrəzalɛm ta nci, meleme nya nza ghɛ Shala mbe, te kwa bake ta tere ne, ntake yɛ Zorobabɛl, wəzege ta Shɛyaltiyɛl, Yɛshəwa, wəzege ta Yosadak le kweci ka menəhɛnyɛ hɛ nyi kaka dzeghe Shala, ka Lɛvi ba'a kweci mbeli nyi kezhɛneke geva se mbe slene mava kadzembe Zhɛrəzalɛm ghate slene. Pa hɛ ntave ka Lɛvi nyi nza va ta nci se te bakemsə kajive te kema kezha nza te ghəa slene ta ŋa ghɛa Mahwətə.

⁹Ma yɛ Yɛshəwa le ŋwalea ŋkɛ ba'a ka menəhɛnyɛ, yɛ Kadmiyɛl le ŋwalea ŋkɛ kwa yita ta Hodaviya ne, zlaɓe hɛ te ghəa ka mene slene mbe ghɛa Shala. Ka Lɛvi nyi kwa yita ta Hɛnadad ka se kakemane hɛ.

¹⁰Ma kwa ghate shihəa ghɛa Mahwətə ka ŋa ŋkwa ne, pa mbeli veyi ka dzeghe Shala te kema mbe lekwesa gəsəkə ba'a le yɛ veke. Tsagha ka Lɛvi nyi kahwelefefia Asaf le ciŋəci kezha tsahe Mahwətə kala nya gezeyi David, meghea ka Israyɛl.

¹¹Ntake hɛ kageze zləvəa Mahwətə ba'a katsahe kwa cimə nya zhɛne hɛ kwelɛ ghəa nci kala nya: «Ganyɛke Mahwətə, kakiɗi ɗe ta ŋkɛ kaŋa ka Israyɛl we!» Pɛtɛ mbeli katsahe Mahwətə perə, katsa gaghwe kwele kwele kwa nza mbeli kagha shihəa ghɛa Mahwətə.

¹²Kwele kwele ka dzeghe Shala, ka Lɛvi le mbeli nyi te ghəa hwelefe hwa mbeli nyi kentsə ntsə nyi kenakɛ ghɛa Shala nya vəashi nyi kenehwene le berete kwa nza mbeli kagha shihə yitea ghɛa Shala nya kamɛnɛfɛ zhɛkwa kwa ntsə ta nci. Ama kwele kwele mbeli nyi kencɛ zlama ta nci le ketsa gaghwe le berete.

¹³Ma tsagha, kaneheve yɛ cimə zlama ta kweci mbeli mbeli le yɛ nehwene ta kweci we, kwa nza nde pɛtɛ mbeli katsa gaghwe kwele kwele kafefa mbeli cakeɗake.