Read kapsiki Ɛsdras 4 Bible Online

Ɛsdras 4 - kapsiki bible

Ɛsdras 4

¹Ma kwa fate ka jaga ta ka Zhəwda le ŋa ka Bɛnjamɛn nahe mbeli nyi fəhwe nyi mbeli keghate ŋa ghɛa Shala Mahwətə ta ka Israyɛl ne,

²cape hɛ kalə sha yɛ Zorobabɛl le mbeli nyi te ghəa hwelefe, ma ke hɛ sha hɛ: «Kaɗe ghen'yɛ kakemane ŋayɛ kezha ŋa ta ghɛa Shala nya. Va nya nza nde ne, Shala nya kwetɛŋe yahawe gheɓəmə ve ba'a melɛ yadzeghe nda ghen'yɛ se te vəa nya fəke n'yɛ Asarhadon, meghea ka Asiri kase kanza teke.»

³Ama pa yɛ Zorobabɛl, Yɛshəwa le kweci mbeli nyi te ghəa hwelefe ta ka Israyɛl zhɛnete nda ke hɛ: «Kehite geva ŋkɛ kakemane n'yɛ yɛ va ŋa ta ghɛ ke Shala ta n'yɛ we. Deke ghen'yɛ le ghəa n'yɛ ka ŋa nda ke Shala Mahwətə ta ka Israyɛl, kala nya gezete n'yɛ Sirəs, meghea ka Pɛrse.»

⁴Tagha gɛ ne, pa mbeli nyi te hɛɗia shɛ tarete kamene nda meɗə ke ka Zhəwif ba'a kadake hɛ kezha baŋe hɛ kasərəakɛ ŋa ta ghɛa Shala.

⁵Pa hɛ ɗave nda cɛdɛ ke mbeli nyi yitea meghe kezha fɛake geva jive ta slene ta ka Zhəwif mbe kema, nda nzahwe nza ta ŋkɛ Sirəs, meghea ka Pɛrse te meghe pa te vəa Dariyəs, meghea ka Pɛrse.

⁶Ma kwa kelete meghe Kɛrkɛs mbe Pɛrse ne, pa ka ghema ta ka Zhəwif rafete nda palepa kezha ve nda fete ke mbeli nyi mbe Zhəwda ba'a Zhɛrəzalɛm.

⁷Ɓiyitsa, kwa nza Artasɛrsɛs ka meghea ka Pɛrse ne, pa yɛ Bishelam, Mitrɛdat, Tabɛyɛl le kweci mbelia nci rafete nda palepa ke meghe Artasɛrsɛs. Ma palepa shɛ ne, le rafe wəsə ta ka Aram ba'a le ghena Aram rafete mbeli.

⁸Pa yɛ ŋgwamna Rehəwm le Shimeshay, nde rafe wəshi rafete nda palepa te ghəa Zhɛrəzalɛm ke meghe Artasɛrsɛs kala nya:

⁹«Se va yɛ ŋgwamna Rehəwm, nde rafe wəshi Shimeshay ba'a kweci mbelia nci nyi mbe yɛ Din, Afarsatak, Tarpɛl, Afaras, Ɛrɛk, Babilone, Səze, Dɛha, Ɛlam,

¹⁰ba'a te sləa kweci mbeli nyi fəke Asnapar nya wəba ba'a nya nza zləvə te, nyi mbe yɛ meleme ta Samari keɗema mbe sla ta hɛɗi nya laka ŋkwa kepəkwə ta veci yitea Efrate.»

¹¹Wa nya ghena nya te palepa shɛ nya: «Ke meghe Artasɛrsɛs, se va ka mene slene ta ŋkɛ, nyi te hɛɗi nya laka ŋkwa kepəkwə ta veci yitea Efrate...

¹²Kaɗe ghen'yɛ kageze nda ke meghe, nahe ka Zhəwif nyi keslə mbe meleme ta ŋa kase sha ghen'yɛ mbe Zhɛrəzalɛm keghate ŋa meleme nya kefama ghena ba'a nya 'yaghwa mehele. Ŋa yaŋa dewe ta ŋkɛ hɛ kwa himte yɛ shihəa ŋkɛ hɛ.

¹³Pa meghe ɗepete, ma kendave meleme nya kaŋamte geva ba'a kehimte geva zlia ŋkɛ ne, mba mbeli nyi mbe kateŋki wəsə te wəshi fəli, yɛ jaɓeregwale ba'a hweŋkwa nda dzeghwa hɛ we. Katefɛa wəshi ŋkɛ kedzawa səndəkwəa meghe.

¹⁴Vatse ɗema ghen'yɛ nyi kaka mene slene ta meghe kasəwəte kakelemte zləvə mbeli te gha. Vatse geze ŋa wəshia shɛhɛ ghen'yɛ,

¹⁵kezha neweve wəshi nyi kemenete geva na mbe yɛ palepa ta yɛ ghena ta ka meghe nyi mpelɛa ma ke gha. Katenakɛ na mbe kameleme nya kefama ghena Zhɛrəzalɛm. Kegha nde kafɛa yitea ve teɗe kadzete yɛ meghe le ka ŋgwamna we, se vəashi nza ŋkɛ kameleme nya nza kaka fama ghena mbe. Va wəshi nyi kala nyi nda se melemea shɛ kaŋzlamte geva.

¹⁶Kaɗe ghen'yɛ kageze nda ke meghe: ma kendave mbeli kaŋate melemea shɛ ba'a kaŋamte zli nya yite ne, mba na katenza kande sleke ŋkwa nya laka ŋkwa kepəkwə ta veci yitea Efrate we.»

¹⁷Pa meghe ghweneghe zhɛne ta ŋkɛ kala nya: «Ke yɛ ŋgwamna Rehəwm, ke Shimeshay, nde rafe wəshi ba'a ke kweci mbelia nci nyi mbe Samari ba'a mbe bela ta hɛɗi nya laka ŋkwa kepəkwə ta veci yitea Efrate. Kanjiŋwe ŋayɛ 'ya...

¹⁸Ma palepa nya ghweneke ɗa yɛ ne, nahe mbeli kejaŋgate ɗa, kwa sebe ta nya zhɛrete mbeli.

¹⁹Nahe 'ya kegezete nda ke mbeli kezha neweve wəshi nyi kemenete geva vəashi, pa mbeli ntsate kaganda shɛ nza Zhɛrəzalɛm kameleme nya kefama nda ghena ke ka meghe, yɛ heɗe ŋkwa le taze ŋkwa yamene mbeli nyi mbe.

²⁰Nahe ka meghe nyi berete berete kese mbe Zhɛrəzalɛm, nyi kese kasleke hɛɗi nya laka ŋkwa kepəkwə ta veci yitea Efrate. Nahe mbeli kese kaŋki nda wəshi ke hɛ te fəli, yɛ jaɓeregwale ba'a kaŋki hweŋkwa nda dzeghwa mbeli.

²¹Ma tsetsenya ne, geze nda mə ke ka Zhəwif kasərəakɛ slene ta nci hɛ: kazhɛne mbeli kaŋa melemea shɛ keɗema 'ya le ghəa ɗa kepelakɛ hweŋkwa we.

²²Mba yɛ kepele se kadzeyitea wəsə mbe ghena nya, yagha wəsə kwa ndiremi kambakete geva ba'a kavate ɗa te ka meghe.»

²³Jaŋgate ma ta mbeli ke palepa ta meghe Artasɛrsɛs te kema ta yɛ ŋgwamna Rehəwm, Shimeshay, nde rafe wəshi le kweci mbelia nci ne, cape hɛ kahe kahe kadzeme Zhɛrəzalɛm sha ka Zhəwif kezha fɛake slene ta nci le berete ba'a le nehe ntsə.

²⁴Ma pelɛ Zhɛrəzalɛm ne, nahe slene ta ŋa ta ghɛa Shala keghereŋete geva. Pa te kwa bake ta va ta Dariyəs, meghea ka Pɛrse ghereŋete geva ŋkɛ.