Read kapsiki Ɛsdras 7 Bible Online

Ɛsdras 7 - kapsiki bible

Ɛsdras 7

¹Kwa sebe ta wəshi nyighɛ, və nya nza Artasɛrsɛs kameghea ka Pɛrse ne, pɛkwe Ɛsdras, wəzege ta Seraya, wəzege ta Azariya, wəzege ta Hilkiya,

²wəzege ta Shaləwm, wəzege ta Sadok, wəzege ta Ahitəwb,

³wəzege ta Amariya, wəzege ta Azariya, wəzege ta Merayot,

⁴wəzege ta Zɛraya, wəzege ta Əwzi, wəzege ta Bəwki,

⁵wəzege ta Abishəwa, wəzege ta Pinhas, wəzege ta Ɛlazar, wəzege ta Aron wəndə kwelea ka dzeghe Shala.

⁶Same kwa Babilone Ɛsdras shɛ. Nde rafe wəshi nya keɗepemte wəshi mahalegə nyi ndeke nda Shala Mahwətə ta ka Israyɛl ke Moyize ŋkɛ. Pa meghe fəave nda wəshi nyi 'yɛwakɛ ŋkɛ va nya nza ŋkɛ kənə dzeve ta Shala Mahwətə ta ŋkɛ.

⁷Te kwa mberefaŋe ta va ta Artasɛrsɛs te meghe ne, pa kweci ka Israyɛl, ka dzeghe Shala, ka Lɛvi, ka gha cimə, ka ya degha ba'a ka mene slene mbe ghɛa Shala zhɛneghe geva kadzeme Zhɛrəzalɛm.

⁸Pa yɛ Ɛsdras ntsehe le hɛ pelɛ Zhɛrəzalɛm mbe kwa mcɛfe ta tere te kwa mberefaŋe ta va ta meghe.

⁹Gheŋkɛ nde nteyi və keslə mbe Babilone te kwa ghate ta hɛa tere kwa ghate, te kwa ghate ta hɛa tere kwa mcɛfe ntsehe ŋkɛ mbe Zhɛrəzalɛm, va nya nza dzeve ganyɛa Shala ta ŋkɛ kənə.

¹⁰Kwa nza ŋkɛ ma Ɛsdras ne, pɛtɛ ndeke nda wənəa ŋkɛ ŋkɛ ke wəshi mahalegəa Mahwətə kazele, kamene slene le hɛ ba'a kateke nda yɛ ghena nyi kegezeke geva le wəshi keshi ke ka Israyɛl.

¹¹Wa nya ghena nya mbe palepa nya ndeke nda meghe Artasɛrsɛs ke nde dzeghe Shala Ɛsdras, wəndə nya keɗepemte yɛ wəshi mahalegə le ghena nyi gezeke nda Mahwətə ke ka Israyɛl nya:

¹²'Ya Artasɛrsɛs, meghea ka meghe, ke nde dzeghe Shala Ɛsdras nya kande rafe wəshi mahalegəa Shala tehwə ghweme, kanjiŋwe ŋa 'ya...

¹³Wa nyi ghena nyi geze 'ya nyi: ma ka Israyɛl nyi te hɛɗia ɗa, ka dzeghe Shala, ka Lɛvi keɗema kweci mbeli nyi keɗe kadzeme Zhɛrəzalɛm le gha ne, wərə hɛ kadzeme.

¹⁴Ghen'yɛ le mbeli nyi yitea 'ya mberefaŋe, ghen'yɛ ka ghwene ŋa kadzeme Zhɛrəzalɛm ba'a kadzete hɛɗia Zhəwda kezha neweve tsema tsema hawe mbeli va wəshi mahalegəa Shala ta ŋa nyi yitea dzeve va gha.

¹⁵Ɓiyitsa ne, katekele mze kwa tɛawetɛa ba'a mze kwa tere tere nyi ɗe ghen'yɛ le mbeli nyi yite 'ya kave nda ke Shala ta ka Israyɛl nya nza ghɛa ŋkɛ mbe Zhɛrəzalɛm na.

¹⁶Katekele pɛtɛa mze kwa tɛawetɛa ba'a mze kwa tere tere nyi teŋ'we na na mbe pɛtɛa sla ta hɛɗia Babilone, zlaɓe le wəshi gəmə nyi tekele yɛ mbeli le ka dzeghe Shala kase kezha ghɛa Shala ta nci nya mbe Zhɛrəzalɛm.

¹⁷Ma pelɛa gha gɛ, pa na zəzəte kezha pave yɛ mcɛmcɛli, gamea lɛmə, zhɛgwəa lɛməa timɛti, yayata wəsə nya kehite geva kezha wəshi gəməa wəshi nyi kese te wəve ba'a ŋa tɛ le cɛdɛ nya. Pa dzeghekɛ melɛ le hɛ te reghwetɛ nya mbe ghɛa Shala ta ŋayɛ pelɛ Zhɛrəzalɛm.

¹⁸Ma wəsə nya nakɛ yɛ le ka menəhɛ ŋa ganyɛke kamene le mze kwa ghwə ghwə ba'a mze kwa tere tere nyi ketene ne, kala nya ɗe Shala ta ŋayɛ mene yɛ le hɛ.

¹⁹Pa na fəyi wəshi kemene slene nyi tefə ŋa mbeli mbe ghɛa Shala nya mbe Zhɛrəzalɛm.

²⁰Ma kweci wəshi nyi ɗe na kamene kadzembe ghɛa Shala ne, le cɛdɛ nya ki ghɛa meghe ŋki hɛ na.

²¹'Ya meghe Artasɛrsɛs, kageze nda 'ya ke ka kese cɛdɛ nyi te hɛɗi nya laka ŋkwa kepəkwə ta veci yitea Efrate pɛtɛ kezha mene yayata wəsə nya 'yɛwete nde dzeghe Shala Ɛsdras nya kande wəshi mahalegəa Shala tehwə ghweme.

²²Pa hɛ ndeke nda pa te yɛ mze kwa ghwə ghwə kakiləwə 3.000, ha kakiləwə 30.000, tɛ kalitrə 4.000, n'yi kalitrə 4.000 le ghwene kala nya ɗe ŋkɛ.

²³Yayata wəsə nya gezeke Shala tehwə ghweme kezha ghɛa ŋkɛ ne, nda mbeli kamenete tserame, yagha Shala kahwepete wənə va hɛɗia ɗa, keɗema va 'ya le ghəa ɗa ba'a va ŋwalea ɗa.

²⁴Ɓiyitsa ne, kageze ŋayɛ ghen'yɛ yagha ka kese cɛdɛ ka'yɛwe ŋki ta cɛdɛ te wəshi, tsehe ta jaɓeregwale keɗema ŋki ta hweŋkwa va ka dzeghe Shala, ka Lɛvi, ka gha cimə, ka ya degha ba'a ka mene slene mbe ghɛa Shala.

²⁵Ma gha le ŋa ŋa gɛ Ɛsdras, kala ntsehwelea Shala ta ŋa nya terafe yitea dzeve va gha, tsehave ka meha ghwə le mbeli nyi te ghəa mbeli kezha meha ghwə hɛ tiɗiɗi te mbeli nyi te hɛɗi nya, mbeli nyi keɗepe ghena nyi gezeke Shala ta ŋa. Pa yɛ tekete nda ke mbeli nyi keɗepema.

²⁶Ma wəndə nya keɗema kahawe va wəsə mahalegəa Shala ta ŋa keɗema va wəsə mahalegəa meghe tiɗiɗi ne, pa mbeli vate ɗa te kala nya kehi ve: keɗema mte, keɗema ŋkamte te hɛɗi, keɗema fəhwe wəshia ŋkɛ, keɗema ve kwa daŋgayɛ.

²⁷Ma ke Ɛsdras: «Hana 'ya sha Shala Mahwətə ta ka shihɛ ɓəmə! Gheŋkɛ nde ndeke nda zəzə ke meghe kezha ve zləvə te ghɛa Shala nya mbe Zhɛrəzalɛm.

²⁸Kwa kema ta yɛ meghe, mbeli nyi yite le mbelia jama nyi dzasle yite ne, nahe Mahwətə kencɛte ɗa ganyɛa ŋkɛ. Ma 'ya le ŋa ɗa kwa yakɛ ɗa ŋkɛ ne, pa 'ya tsenete mbeli nyi te ghəa ka Israyɛl kezha slə le 'ya.»