Read kapsiki Nɛhɛmi 12 Bible Online

Nɛhɛmi 12 - kapsiki bible

Nɛhɛmi 12

¹Wa nyi sləa ka dzeghe Shala le ka Lɛvi nyi kezhɛneke geva zlaɓe le Zorobabɛl, wəzege ta Shɛyaltiyɛl ba'a Yɛshəwa nyi: yɛ Seraya, Zhɛrɛmi, Ɛzra,

²Amariya, Maləwk, Hatəwsh,

³Shekaniya, Rehəwm, Merɛmot,

⁴Ido, Ginetoy, Abiya,

⁵Miyamin, Ma'adiya, Bilga,

⁶Shemaya, Yoyarib, Yedaya,

⁷Saləw, Amok, Hilkiya le Yedaya. Ma te vəa Yɛshəwa ne, pɛtɛa mbeli nyi kese kambeli nyi te ghəa ka dzeghe Shala le ka Lɛvi.

⁸Ma hwa ka Lɛvi ne, yɛ: Yɛshəwa, Binəwi, Kadmiyɛl, Shɛrɛbiya, Yehəwda ba'a Mataniya. Yɛ Mataniya le ka menəhɛnyɛ ka gha cimə ketsahe Shala,

⁹nda zhɛne nda yɛ Bakbəwkiya le Əwni, ka menəhɛ nci nyi kemene slene kwa kema ta nci ke hɛ.

¹⁰Yɛshəwa ya kayitenyɛa Zhowakim, Zhowakim ya kaŋa Ɛliyashib, Ɛliyashib ya kaŋa Yoyada,

¹¹Yoyada ya kaŋa Yonatan, Yonatan ya kaŋa Yadəwa.

¹²Ma te və nya se Zhowakim kawəndə kwelea ka dzeghe Shala ne, mbeli nyi ya kambeli nyi kese te ghəa ghɛa ka dzeghe Shala: Meraya ya kaŋa ghɛa Seraya, Hananiya ya kaŋa ghɛa Zhɛrɛmi,

¹³Meshəwlam ya kaŋa ghɛa Ɛzra, Yohanan ya kaŋa ghɛa Amariya,

¹⁴Yonatan ya kaŋa ghɛa Melikəw, Zhozɛf ya kaŋa ghɛa Shebaniya,

¹⁵Adna ya kaŋa ghɛa Harim, Hɛlkay ya kaŋa ghɛa Merayot,

¹⁶Zakari ya kaŋa ghɛa Ido, Meshəwlam ya kaŋa ghɛa Gineton,

¹⁷Zikri ya kaŋa ghɛa Abiya, kaŋa ghɛa Miniyamin ne, ... Piltay ya kaŋa ghɛa Mowadiya,

¹⁸Shaməwa ya kaŋa ghɛa Bilga, Yonatan ya kaŋa ghɛa Shemaya,

¹⁹Matenay ya kaŋa ghɛa Yoyarib, Əwzi ya kaŋa ghɛa Yedaya,

²⁰Kalay ya kaŋa ghɛa Salay, Ɛbɛr ya kaŋa ghɛa Amok,

²¹Hashabiya ya kaŋa ghɛa Hilkiya, Netanɛyɛl ya kaŋa ghɛa Yedaya.

²²Te vəa yɛ Ɛliyashib, Yoyada, Yohanan le Yadəwa ne, nahe mbeli kerafeyi sləa ka Lɛvi nyi te ghəa ghɛ mbe palepa, tsagha ŋa ka dzeghe Shala pa te vəa Dariyəs, meghea ka Pɛrse.

²³Ma sləa mbeli nyi te ghəa ghɛa ka Lɛvi ne, mbe palepa nya nza wəshi nyi jama jama nyi kemenete geva rafete geva hɛ, ama deke hwa'a te vəa Yohanan, shia Ɛliyashib.

²⁴Pa mbelia jama ta ka Lɛvi, yɛ: Hashabiya, Shɛrɛbiya ba'a Yɛshəwa nya kawəzege ta Kadmiyɛl ghereŋenji kwa kema ta kweci ka menəhɛ nci kezha gha cimə ketsahe Shala ba'a nya keve zləvə te, kenza və kemene slene kaŋa nci. Kala nya gezeke David, wəndəa Shala.

²⁵Ma ka ya degha Mataniya, Bakbəwkiya, Obadiya, Meshəwlam, Talmon ba'a Akəwb ne, slene ta ya cɛ kebete wəshi kezeme nyi takwa yitea mɛa degha ta ghɛa Shala yamene hɛ.

²⁶Te vəa Zhowakim, wəzege ta Yɛshəwa ba'a shia Yosadak ba'a te vəa Nɛhɛmi nya kaŋgwamna le Ɛsdras, nde dzeghe Shala nya kande rafe wəshi mahalegə se hɛ kamene slene.

²⁷Ma kwa nahemte ŋa ta zlia Zhɛrəzalɛm mbeli ne, pa mbeli hekakɛ ka Lɛvi se te ŋkwa nyi nza hɛ pɛtɛ kezha mene gəsəkə zlama mbe Zhɛrəzalɛm le cimə ketsahe Shala nyi tsa yɛ ciŋəci, yɛ gagera ba'a yɛ getsepele mbeli yite.

²⁸Pa ŋwalea ka gha cimə tseneke geva se te hɛɗi nya dzeyi yitea Zhɛrəzalɛm ba'a se mbe yɛ meleme ta ka Netofa,

²⁹se mbe Bɛt-Gilgal ba'a se te hɛɗia yɛ Gɛba le Azmavɛt, kwa nza ŋkɛ nahe ka gha cimə keŋate yɛ meleme ta nci dzeyi yitea Zhɛrəzalɛm.

³⁰Pa ka dzeghe Shala le ka Lɛvi pɛmte geva wɛŋe wɛŋe. Pa hɛ gezete nda ke mbeli pɛtɛ kezha pɛ geva wɛŋe perə, pa hɛ yaɓemte yɛ gelembe ba'a zli nya yitea meleme wɛŋe wɛŋe.

³¹Pa 'ya tsenete mbeli nyi te ghəa ka Zhəwda pelɛ zli. Pa 'ya veyi wəvəsəa ka gha cimə nyi jama jama bake. Ntəŋə kwa ghate dzeyi laka bela kwa zeme te zli laka mɛ degha ta Dədə.

³²Kwa sebe ta ka gha cimə dzeghwa yɛ Hoshaya le kwete bela ta mbeli nyi te ghəa ka Zhəwda,

³³zhɛne yɛ Azariya, Ɛzra, Meshəwlam,

³⁴Yehəwda, Bɛnjamɛn, Shemaya ba'a Zhɛrɛmi.

³⁵Kwa sebe ta nci ka dzeghe Shala nyi kevɛ veke, Zakari nya kahwelefe ta Asaf laka Zakəwr, Mikaya, Mataniya, Shemaya ba'a Yonatan,

³⁶le ka menəhɛnyɛ Shemaya, Azarɛl, Milalay, Gilalay, Ma'ay, Netanɛyɛl, Yehəwda ba'a Hanani katəkwə təkwə hɛ. Wəshi ketsa nyi feɗete David, wəndəa Shala ya va hɛ. Ɛsdras, nde rafe wəshi mahalegə ya te ghəa wəvəsəa shɛ.

³⁷Ma kwa ntsehe hɛ mɛa mɛ degha ta Meja ne, hwa'a hɛ yitea yɛ taŋa nyi kedzeme meleme ta David. Pa hɛ dzemenji te zlia shɛ pelɛ te ghəa ghɛa David, kwa sebe ta ŋkɛ, ntəŋə hɛ mbe kema pa mɛa mɛ degha ta Yɛmə nya laka ŋkwa kesame ta veci.

³⁸Ntəŋə kwa bake ta bela ta ka gha cimə dzeyi laka bela kwa gwela, kwa sebe ta nci ghen'yɛ le kwete bela ta mbeli dzate te zli, kənəa ŋkwa keya ŋkwa ta cɛ keta ɗafa hwa'a te ŋkwa nya nza zli kebezlenyɛ.

³⁹Pa ghen'yɛ dzeyi n'yɛ kənəa mɛ degha ta Ɛfrayim, ŋa Yeshana ba'a ŋa Kelepe. Ma kwa sebe ta yɛ cɛa ka ya ŋkwa ta Hananɛyɛl le ŋa Gwəmsə ne, pa ghen'yɛ zlakemte mɛ degha ta Timɛti kezha ntsehe mɛa mɛ degha ta ka ya ŋkwa.

⁴⁰Kwa sebe ta ŋkɛ, pa wəvəsəa ka gha cimə nyi bake nyighɛ ghereŋenji mbe ghɛa Shala. Pa 'ya ghereŋe ɗa perə, tsagha kwete bela ta mbeli nyi te ghə mbeli nyi kwa sebe ta ɗa.

⁴¹Yɛ Ɛliyakim, Masɛya, Miniyamin, Mikaya, Ɛliyohɛnay, Zakari ba'a Hananiya nyi kaka dzeghe Shala ka vɛ veke.

⁴²Tagha yɛ Masɛya, Shemaya, Ɛlazar, Əwzi, Yohanan, Malkiya ba'a Ɛzɛr. Ma kwa gaka cimə ne, Izrahiya ya te kema ta nci.

⁴³Ma te vecia shɛ, kwele kwele dzeghekɛ melɛ mbeli mbe zlama ta gəsəkə. Kwa nza ŋkɛ nahe Shala keviɗikɛ wənəa mbelia ŋkɛ le zlama nya wəba. Mbe Zhɛrəzalɛm ne, kazlama yɛ mi le ŋwale kwele kwele perə, kafefa gaka ta nci mbeli cakeɗake.

⁴⁴Ma te vəa shɛnyɛ, pa mbeli dapave nda ya yɛ cɛ kebete wəshi gəməa ka ghate ta ya ta wəfe ba'a kwa meŋe ta bela ta wəshi kwa wəza wəza ke kweci mbeli. Ma mbelia shɛhɛ ne, ghenci ka bete wəshi nyi kese mbe wəve nyi dzeyi yitea yɛ meleme mbe cɛa shɛhɛ, wəshi nyi gezete wəsə mahalegə kaŋa ka dzeghe Shala le ka Lɛvi. Kwa nza ŋkɛ pɛtɛ ka Zhəwda kazlama te slene nya menete ka dzeghe Shala le ka Lɛvi,

⁴⁵nyi kemene slene ta Shala ta nci ba'a slene ta yaɓe wəshi wɛŋe wɛŋe kala wəsə keshi. Ma ka gha cimə le ka ya degha perə ne, kala nya gezete meghe David le wəzege ta ŋkɛ Salomon mene hɛ.

⁴⁶Kwa nza ŋkɛ vəashi, te vəa yɛ David le nde gha cimə Asaf ne, mbeli nyi te ghə cimə ka gha cimə ketsahe Shala ba'a kwa tsa nda hana.

⁴⁷Te vəa Zorobabɛl, kala nya te ŋa Nɛhɛmi ne, pɛtɛ ve nda ŋa nci bela ta wəshi ka Israyɛl keveci keveci ke ka gha cimə le ka ya degha. Pa hɛ ndeke nda wəshi gəmə nyi keveyi geva tekeleke ke ka Lɛvi ɓiyitsa, pa ka Lɛvi ndeke nda ŋa nci bela ke ka dzeghe Shala nyi kahwelefefia Aron.