Read kapsiki Nɛhɛmi 13 Bible Online

Nɛhɛmi 13 - kapsiki bible

Nɛhɛmi 13

¹Ma vəa ŋkwa shɛ, kwa jaŋga palepa ta Moyize mbeli kwa kema ta mbeli pɛtɛ ne, pa mbeli ntsate ŋkwa nya rafete geva ŋkɛ te: «Ka Amon le ka Mowab ne, kadzehwa tsene mbelia Shala tɛape we.»

²Kwa nza ŋkɛ vəashi ne, kekemaneve ka Israyɛl hɛ le ɗafa ba'a yɛmə we. Ɓiyitsa, ka Mowab shɛhɛ ka ŋkikɛ nda ke Balam kezha se ŋkɛ kabezla ka Israyɛl, ama pa Shala ta ɓəmə zhɛrete bezla kawəpi.

³Ma kwa fate ghena ta wəsə mahalegə nyagha ka Israyɛl ne, pa hɛ zəzəte kaŋka pɛtɛa kweci hwelefefi shave hwa ghəa nci.

⁴Ma te kwete və vəashi ne, nahe mbeli keveyi nde dzeghe Shala Ɛliyashib kawəndə nya te ghəa cɛ nyi vare ghɛa Shala ta ɓəmə. Ma kwa nza hɛ kamenə le Tobiya,

⁵pa ŋkɛ ndeke nda cɛ nya wəba nya bete wəshi gəmə nyi kese te wəve, 'wərdə kwa hə hə ba'a wəshi kemene slene mbe ghɛa Shala mbeli mbe, tsagha wəshia ka dzeghe Shala ba'a kwa meŋe ta bela ta ha, ŋa tɛ mɛnɛfɛ le ŋa n'yi nyi keveyi geva tekeleke ke ka Lɛvi, ka gha cimə ba'a ka ya degha.

⁶Ma vəa ŋkwa nya menete geva wəshia shɛhɛ ne, mbe Zhɛrəzalɛm 'ya we: nahe 'ya kelə ɗa sha Artasɛrsɛs, meghea Babilone te kwa mahekenemsə bakeghəmbe ta va ta ŋkɛ mbe meghe. Kwa sebe ta və ɓɛhwɛ, pa meghe ndeke ɗa hweŋkwa,

⁷kazhɛne geva kadzembe Zhɛrəzalɛm. Pa 'ya nakɛ wəsə kwa ndiremi nya menete Ɛliyashib kwa ndeke nda cɛ nya te ŋwela ta ghɛa Shala ke Tobiya.

⁸Pa wənəa ɗa hwepenyɛ kwele kwele, kəliɓə 'ya fəakave wəshia Tobiya shave mbe cɛa shɛ.

⁹Kwa sebe ta ŋkɛ, pa 'ya gezete kayaɓemte cɛa shɛhɛ megela, kezha zhɛne mbeli kabete wəshi kemene slene nyi mbe ghɛa Shala, wəshi gəmə ba'a 'wərdə kwa hə hə mbe.

¹⁰Pa 'ya fate ɓiyitsa keɗema ka Lɛvi kekemave ŋa nci bela ta wəshi kezeme. Vatse hwɛnji ka Lɛvi le ka gha cimə nyi kemene slene kalə kadzembe wəvea nci.

¹¹Pa 'ya ŋelete mbelia jama, ma 'ya sha hɛ: «Va wa wəfəyite geva ghɛa Shala wa?» Kwa sebe ta ŋkɛ, pa 'ya tsenete ka Lɛvi le ka gha cimə, kazhɛnate hɛ te slene ta nci.

¹²Ntake ka Zhəwif kagha kele kwa meŋe ta bela ta ha, ŋa tɛ mɛnɛfɛ ba'a ŋa n'yi kase kadzembe ŋkwa nyi veyi mbeli kaŋa nci.

¹³Pa 'ya ntave yɛ Shɛlɛmiya, nde dzeghe Shala, Sadok, nde rafe wəshi ba'a Pedaya, nde Lɛvi, kasləwəfəa nci, Hanan, wəzege ta Zakəwr, wəzege ta Mataniya kezha nza te ghəa cɛa shɛhɛ. Pɛtɛa nci kambeli nyi gezleŋema ghə mbeli va hɛ. Nehe nda wəshi nyi fəke mbeli ke ka menəhɛ nci ya kaslene ta nci.

¹⁴«Shala yawe, zəzəte ɗa te wəshi nyi menete nyi 'ya! Zaghəma ganyɛ nya menete slene 'ya le kezha ghɛa ŋa ba'a slene nyi mbe na ma.»

¹⁵Ma te vəa shɛnyɛ, pa 'ya nakɛ kweci mbeli te hɛɗia Zhəwda nyi kezleɗe rɛzɛŋe te keleɓa te veci kezhɛne mpi. Ma kweci, yɛ ha, tɛ, yɛ rɛzɛŋe, yɛ ya ta dasekwa ba'a kweci mama ta wəshi yafə hɛ te kwara kase kadzembe Zhɛrəzalɛm te veci kezhɛne mpi. Pa 'ya ŋelete hɛ te veci nya pamte wəshia nci hɛ.

¹⁶Ma ka Tir nyi mbe Zhɛrəzalɛm ne, kakele kelepe le mama ta wəshi kepamte hɛ kase kapamte mbe Zhɛrəzalɛm ba'a ke ka Zhəwda te veci kezhɛne mpi.

¹⁷Pa 'ya ŋelete mbelia jama ta ka Zhəwda, ma 'ya sha hɛ: «Wa nya slene kwa ndiremi menete yɛ le zhɛre veci kezhɛne mpi wale wale wa?

¹⁸Tsetse se ka shihɛ ŋayɛ kamene, vatse vate ndiremi nyi kala nyi Shala ta ɓəmə te gheɓəmə ba'a te meleme ta ɓəmə. Ama gheyɛ kwa hawema yɛ va vecia Saba ne, wənəa Shala ta ka Israyɛl yamtsehe nda hwepe yɛ!»

¹⁹Se mɛa vəa nyagha gɛ, pa 'ya gezete kaŋzle yɛ mɛ degha ta Zhɛrəzalɛm mbeli pəkwəma ta veci, nda tegha geva veci kezhɛne mpi, pa 'ya gezete zhɛkwa kezha ɗema mbeli kaghwene kenahema veci kezhɛne mpi. Pa 'ya nteyi kweci ka mene slene ta ɗa mɛa yɛ mɛ degha yagha wəsə kepamte tedzembe te veci kezhɛne mpi.

²⁰Ma ka zhɛre dzeve le ka pamte mama ta wəshi ne, kwetɛŋe zhigə keɗema bake zhigə menete hɛ hɛ pelɛke vare zlia Zhɛrəzalɛm.

²¹Pa 'ya gezave nda ghena ke hɛ kala nya: «Wa raberə nda hɛ yɛ pelɛke yitea zli wa? Ma kezhɛne yɛ kamenete ne, katekese ŋayɛ 'ya.» Se mɛa nyagha və ne, kezhɛne hɛ kase te veci kezhɛne mpi we.

²²Pa 'ya gezete nda ke ka Lɛvi kezha pɛmte ghəa nci hɛ wɛŋe wɛŋe, nda lə hɛ kaya yɛ mɛ degha ta meleme, yitea hawe mbeli va veci kezhɛne mpi nya keveyi geva tekeleke. «Shala yawe, zəzəte ɗa te wəshi nyi menete nyi 'ya ɓiyitsa. Gha nya ganyɛa mehele ne, zhɛakɛ heli yitea 'ya!»

²³Ma te vəa shɛnyɛ zhɛkwa ne, pa 'ya ntsate kweci ka Zhəwif nyi kewəmeve mia ka Asdod, ŋa ka Amon ba'a ŋa ka Mowab.

²⁴Ma bela ta ŋwalea nci ne, ghena ta ka Asdod yageze hɛ, ma kweci ne, ghena ta kwete hwelefe keɗema ŋa kwete yageze hɛ, ama keɗepe geze ghena ta ka Zhəwif kwete hwa hɛ ya kwetɛŋe we.

²⁵Pa 'ya ŋeŋelete hɛ ba'a bebezlamte hɛ. Pa 'ya mpempave kweci hwa hɛ ba'a kaŋkwəŋkwətsakɛ sleme va ghə va hɛ. Ɓiyitsa, pa gezete nda ke hɛ kazeme fela le Shala kezha ɗema hɛ kave nda ŋwalea kwɛa nci ke kweci hwelefefi, ya kawəme nda ŋwalea kwɛa kweci hwelefefi ke ŋwalea nci keɗema ke ghəa nci.

²⁶Ma 'ya sha hɛ: «Ashɛ wəsə nya kala nya nde ghwetame Salomon, meghea ka Israyɛl mbe mene jaɗafa wəka? Hwa kweci pɛtɛa hwelefefi ne, meghe shɛ kala gheŋkɛ we. Nahe Shala ta ŋkɛ keɗehwe, vatse veyi ŋkɛ Shala kameghea te ghəa Israyɛl pɛtɛ. Ndagwara gheŋkɛ yaghwetame mia kweci hwelefefi mbe mene jaɗafa.

²⁷Kaɗe mə kafa zhɛkwa nahe yɛ kemenete nda jaɗafa nya dzawe ke Shala ta ɓəmə laka wəme mia kweci hwelefefi we.»

²⁸Ma kwete hwa ŋwalea Yoyada, shinyɛ Ɛliyashib, wəndə kwelea ka dzeghe Shala ne, mekwe Sanebalat, nde Horon ŋkɛ. Vatse ŋkamte 'ya shave mbe Zhɛrəzalɛm.

²⁹«Shala yawe, zaghəyitema zləvə nya kelemte nya mbeli te slene ta ka dzeghe Shala ba'a jikə geva nya menete nya na le ka dzeghe Shala ba'a ka Lɛvi na tɛape ma.»

³⁰Pa 'ya pɛmte mbeli wɛŋe wɛŋe va wəshia kweci hwelefefi, pa 'ya zhɛneyi yɛ slene ta ka dzeghe Shala le ŋa ka Lɛvi te ŋkwa nci, yayata wəndə te slene ta ŋkɛ.

³¹Ɓiyitsa, pa 'ya zhɛneyi ghena ta kele ta yɛ sheghwə kase te hɛ nya sləyi mbeli le wəshi gəmə ka ghate ta nyi kese te wəve te ŋkwa ŋkɛ. «Shala yawe, zəzəte ɗa ba'a mene ɗa ganyɛa mehele ta ŋa.»