Read kapsiki Nɛhɛmi 2 Bible Online

Nɛhɛmi 2 - kapsiki bible

Nɛhɛmi 2

¹Mbe kwa bakemsə ta va ta Artasɛrsɛs mbe meghe, te terea Nisan, te vəa nya zeme wəsə kezeme meghe ne, pa 'ya kelete tɛ ba'a gəyi nda kwa wəsə. Teheɗe kema va 'ya, wəsə nya keghama kamenete ɗa geva kwa kema ta ŋkɛ.

²Ntake meghe ka'yɛwe va 'ya: «Va wa nza kema ta ŋa teheɗe kala wəndə nya shewə ɓeshi wa? Wa wəsə nya kebezemte ŋa wənə wa?» Pa ghazlənə keseve ɗa kwele kwele.

³Ya tsagha shɛ ŋkɛ, pa 'ya zhɛnete nda ke meghe: «Meghe yawe, pa Shala nza le gha! Tsema shɛma 'ya nza le kema teheɗe kakwəfi meleme nya lamte ka shihɛ ɗa mbeli mbe ba'a ketere tere gelembe nyi mɛa degha ta ŋkɛ wa?»

⁴Ma ke meghe 'yɛwete va 'ya: «Wa yaɗe na kamene ŋa 'ya tse gɛ?» Taghanyɛ, pa 'ya səkwəte Shala nya pelɛ ghweme,

⁵pa 'ya zhɛnete nda ke meghe kwa sebe ta ŋkɛ: «Ma keɗe meghe kamene ɗa ganyɛ, pa pelave ɗa hweŋkwa kalə kadzembe sla ta hɛɗia Zhəwda, kadzembe meleme nya lamte ka shihɛ ɗa mbeli, kezha zhɛne 'ya kaŋate.»

⁶Kwa kema ta male ta ŋkɛ nya tagha vare, pa meghe 'yɛwakɛ ŋkɛ va 'ya zhɛkwa: «Tsema tetemə dzeghwa ta ŋa wa? Hweŋkwa tezhɛne geva na kase wa?» Pa meghe yɛte kalə 'ya, pa 'ya gezete nda hɛ nya tezhɛne geva 'ya kase te.

⁷Ma 'ya sha meghe zhɛkwa: «Kampi ŋa dzeve 'ya maze yawe, kezha ndeke ɗa yɛ palepa na ke ka ŋgwamna ta hɛɗi nya laka ŋkwa nya pəkwə veci yitea Efrate, kezha pelakɛ ɗa ŋkɛ kajive Zhəwda.

⁸Pa kwete palepa perə ke Asaf, wəndə nya te ghəa wəfe ta meghe, yitea mpəave ɗa sheghwə ŋkɛ nyi kenza wərə kezha gelembe nyi mɛa cɛ keya ŋkwa nya takwa yitea ghɛa Shala, kezha zli nya yitea meleme ba'a kezha cɛ nya tenza 'ya mbe.» Pa meghe ndeke ɗa palepa shɛhɛ, kwa yakɛ ɗa Shala ta ɗa.

⁹Hwa'a 'ya sha ka ŋgwamna nyi te hɛɗi nya laka pəkwə ta veci yitea Efrate kezha ve nda palepa ta meghe ke hɛ. Kabeghe ɗa mbelia jama ta ka sewajɛ ba'a ka zleɗe gədəwəa lɛmə nyi ntave ɗa meghe.

¹⁰Ma kwa fate yɛ Sanebalat, nde Horon le Tobiya, nde Amon nya kasləwəfəa ŋkɛ, kase 'ya ne, kwele kwele zhɛte nda wənəa nci ke hɛ va nya nza kwete wəndə kase kahi wəsə nya kese ganyɛke kezha ka Israyɛl.

¹¹Ma kwa ntsehe 'ya mbe Zhɛrəzalɛm ne, pa 'ya menete hɛ mahekene divə ɗa,

¹²kaɗema ncɛ nda wəsə nya vame ɗa Shala ta ɗa mbe wənə kamene kezha meleme ke wəndə. Ma kwa sebe ta ŋkɛ, pelɛhetɛme 'ya sate te ŋkwa heviɗi le kweci mbeli ɓɛhwɛ. Deke kwara nya nza 'ya pelɛ ya kawəsə kedzeme nya va ghen'yɛ.

¹³Pa 'ya shave heviɗi mbe meleme laka mɛ degha ta Zlərə, ntəŋə 'ya dzeyi laka ɗaslea Shishi meŋele ba'a mɛ degha ta Dədə. Pa 'ya newemte yɛ zlia Zhɛrəzalɛm, pa 'ya nakɛ tsema tsema ŋeŋate geva ŋzla te ba'a tsema tsema teremte geva gelembe nyi mɛa degha ta ŋkɛ.

¹⁴Cape 'ya dzeme laka mɛ degha ta Meja ba'a laka ghwa ta Meghe, ama wəsə keseɗa nya nza 'ya pelɛ ne, mba ŋkwa kedzeghwa ve we.

¹⁵Heviɗi shɛ, pa 'ya dzeme ɗa vare ghweme ta Sɛdron mbe newe nza ta yɛ zlia shɛhɛ, kwa sebe ta ŋkɛ, tewətelɛwe 'ya zhɛrete geva ba'a se ɗa laka mɛ degha ta Zlərə.

¹⁶Keɗepete ŋkwa nya se 'ya ba'a wəsə nya se 'ya kamene mbelia jama nyi mbe meleme we, kwa nza ŋkɛ te nyagha və ne, kenaka 'ya kaɓelate nda ke ka Zhəwif, ya ke ka dzeghe Shala, ya ke mbelia jama, ya ke ka meha ghwə keɗema ke kweci mbeli nyi te ghə slene we.

¹⁷Ma 'ya sha hɛ: «Nahe yɛ kenakɛ tsema tsema dzawe nya te gheɓəmə: kakwəfi Zhɛrəzalɛm, pɛtɛ yɛ gelembea ŋkɛ keteremte geva! Mbara ɓəmə kaŋa zlia Zhɛrəzalɛm zhɛkwa, kezha kelemte hawe nya te gheɓəmə nya.»

¹⁸Pa 'ya ɓelate nda ke hɛ tsema tsema yakɛ ɗa Shala le ghena nya gezete ɗa meghe. Ma ke hɛ le berete taghanyɛ: «Mbara ɓəmə kaŋa meleme!» Pa hɛ ntsəte geva kezha mene slene ganyɛa shɛ.

¹⁹Ma kwa fate ghena shɛ Sanebalat, nde Horon, Tobiya, sləwəfəa ŋkɛ nya kande Amon le Gɛshɛm nde Arab ne, ntake hɛ kaŋ'wəshi n'yɛ ba'a kayiɗə n'yɛ. Ma ke hɛ: «Wa wəsə nya mene nya yɛ wa? Gheyɛ fama ghena ta meghe na?»

²⁰Pa 'ya zhɛnete nda ke hɛ, ma 'ya shɛ: «Shala nya pelɛ ghweme le ghəa ŋkɛ nde tekemane n'yɛ. Ghen'yɛ ka mene nda slene ne, ghen'yɛ katesate te ŋkwa kaŋa meleme. Ama gheyɛ le ŋa ŋa yɛ ne, hweŋkwa va gheyɛ kakemave wəsə nya mbe Zhɛrəzalɛm we, kwete hwa berete shɛ kakemave yɛ mbe we. Kwete wəndə shɛ katezəzəte ŋayɛ we.»