Read kapsiki Nɛhɛmi 3 Bible Online

Nɛhɛmi 3 - kapsiki bible

Nɛhɛmi 3

¹Pa Ɛliyashib, wəndə kwelea ka dzeghe Shala sate te ŋkwa yitea slene le kweci ka dzeghe Shala. Pa hɛ ŋate mɛ degha ta Timɛti. Ma kwa sebe ta nya veyi ŋkɛ hɛ tekeleke ne, pa mɓeyi gelembe mɛ. Pa hɛ sekawete zli pa va cɛa ka ya ŋkwa ta Gwəmsə, kwa sebe ta nya veyi ŋkɛ hɛ tekeleke, pa hɛ sekawete pa mɛ cɛ ka ya ŋkwa ta Hananɛyɛl.

²Dzeme vare hɛ ŋa ŋa nci ka Zhɛriko, vare hɛ ŋa ŋa ŋkɛ Zakəwr, wəzege ta Imri perə.

³Ma mɛ degha ta Kelepe ne, ka Sena'a ka ŋa ŋa nci. Kwa sebe ta nya zlaŋelate sheghwə hɛ te ne, pa hɛ mɓeyi gelembe le sheghwəa ŋkɛ nyi kekese mbe dewe ba'a wəbəzli nyi te.

⁴Dzeme vare hɛ mene slene yɛ Merɛmot, wəzege ta Əwriya ba'a shia Hakos, Meshəwlam, wəzege ta Bɛrɛkiya ba'a shia Meshɛzabɛl ba'a Sadok, wəzege ta Ba'ana.

⁵Kwa sebe ta nci mene ŋa nci ka Tɛkowa, ama kese mbelia jama ta nci kahawe va ghena ta mbeli nyi kesleke hɛ we.

⁶Ma mɛ degha ta Yeshana ne, yɛ Yoyada, wəzege ta Pasɛya ba'a Meshəwlam, wəzege ta Bɛsodiya ka ŋate. Kwa sebe ta nya zlaŋelete, pa hɛ mɓeyi gelembe, sheghwə nyi kekese mbe dewe ba'a yɛ wəbəzli nyi te.

⁷Vare hɛ ŋa ŋa nci yɛ Melatiya, nde Gabawon, Yadon, nde Mɛronot, le kweci ka Gabawon ba'a ka Mispa nyi kemene nda slene ŋgwamna ta hɛɗi nya laka bela kepəkwə ta veci yitea Efrate.

⁸Dzeme vare hɛ mene slene Əwziyɛl, nde vɛsə mze nya kawəzege ta Haraya ba'a Hananiya, nde ta 'wərdə. Pa hɛ nahemte slene ta nci mbe Zhɛrəzalɛm kwa ntsehe hɛ te ŋkwa nya nza zli bezleke.

⁹Dzeme vare hɛ mene slene Refaya, wəzege ta Həwr ba'a wəndə nya te ghəa kwete bela ta meleme ta Zhɛrəzalɛm.

¹⁰Hende talɛagha vare hɛ, ŋa ŋa ŋkɛ Yedaya, wəzege ta Harəwmaf kwa kema ta ghɛa ŋkɛ. Vare gheŋkɛ mene ŋa ŋkɛ Hatəwsh, wəzege ta Hashabnɛya.

¹¹Ma yɛ Malkiya, wəzege ta Hashəwb le Pahat-Mowab, kamene ŋa nci te kwete bela nya nza cɛ keya ɗafa kwalekwala.

¹²Ma vare hɛ ne, Shaləwm, wəzege ta Halohɛsh ba'a meghea kwete bela ta Zhɛrəzalɛm nde mene ŋa ŋkɛ slene zlaɓe ŋwalea kwɛa ŋkɛ.

¹³Ma mɛ degha ta Zlərə ne, Hanon ba'a mbeli nyi mbe meleme ta Zanowa ka ŋate. Ma kwa ŋamte ŋkɛ hɛ ne, pa hɛ mɓeyi yɛ gelembe, sheghwə nyi kekese mbe dewe ba'a yɛ wəbəzli nyi te. Pa hɛ hite zli kamɛtre gwəmsə mcɛfe, hwa'a mɛa degha ta Dədə.

¹⁴Ma mɛ degha ta Dədə ne, Malkiya, wəzege ta Rɛkab ba'a wəndə nya te ghəa kwete bela ta Bɛt-Kɛrɛm nde ŋate. Ma kwa ŋamte ŋkɛ ne, pa hɛ mɓete yɛ gelembe, sheghwə nyi kekese mbe dewe ba'a yɛ wəbəzli nyi te.

¹⁵Ma mɛ degha ta Meja ne, Shaləwm nde ŋate, wəzege ta Kol-Hozɛ ba'a wəndə nya te ghə bela ta Mispa. Ma kwa ŋamte ŋkɛ ba'a zaɗekɛ ŋkɛ ne, pa hɛ mɓete gelembe, sheghwə nyi kekese mbe dewe ba'a yɛ wəbəzli nyi te. Pa ŋkɛ sekawete zli nya vare ghwa ta Silowɛ, kwelɛ yɛ ntsa ta meghe le taŋa nyi kedzawa meleme David.

¹⁶Vare hɛ mene slene Nɛhɛmi, wəzege ta Azbəwk ba'a wəndə te ghəa bela ta Bɛt-Səwr, pa mɛ yɛ kwele ta yɛ David, hwa'a mɛa ghwa nya tsate mbeli ba'a pa mɛ ghɛa ka katsala.

¹⁷Cakeɗake ɓahwe yite, mene slene nde Lɛvi: Rehəwm wəzege ta Bani, tagha vare mene slene Hashabiya, wəndə nya te ghəa kwete bela ta meleme ta Kɛyila, kezha ŋa ŋkɛ bela.

¹⁸Dzeme vare hɛ, mene slene ka menəhɛ nci: Binəwi, wəzege ta Hɛnadad ba'a wəndə nya te ghəa kwete bela ta meleme ta Kɛyila,

¹⁹dzeme vare mene slene Ɛzɛr, wəzege ta Yɛshəwa ba'a wəndə nya te ghəa Mispa te kwete bela, se mɛa ŋkwa kedzeme cɛa wəshi kempa hwa'a mɛa megwekwe ta zli.

²⁰Dzeme vare mene slene Barək, wəzege ta Zabay le ntsə geva te kwete bela, se mɛa megwekwe ta zli hwa'a degha ta Ɛliyashib, wəndə kwelea ka dzeghe Shala.

²¹Dzeme vare, Merɛmot, wəzege ta Əwriya ba'a shia Hakos nde mene slene te ŋkwa nya keslə mɛa degha ta Ɛliyashib hwa'a te kwa keɗaŋe ta ghɛa ŋkɛ.

²²Dzeme vare mene slene ka dzeghe Shala nyi kese dzeyi yitea Zhɛrəzalɛm.

²³Yɛ Bɛnjamɛn le Hashəwb ka hi ŋkwa nya kwa kema ta ghɛa nci, ma Azariya, wəzege ta Masɛya ba'a shia Ananiya ne, vare ghɛa ŋkɛ mene slene ŋkɛ.

²⁴Ma Binəwi, wəzege ta Hɛnadad ne, se mɛa ghɛa Azariya hwa'a te ŋkwa nya zhɛre geva le megwekwe ta zli mene slene ŋkɛ.

²⁵Dzeme vare, Palal, wəzege ta Əwzay nde mene slene kwelɛ yɛ megwekwe ta zli le cɛa ka ya ŋkwa nya jikə vare ghɛa meghe, takwa mɛa degha ta cɛa ka ya ŋkwa. Dzeme vare ne, Pedaya, wəzege ta Parosh,

²⁶ka mene slene mbe ghɛa Shala nyi mbe ghedəkwəa Ofɛl le nza, ka mene ŋa nci pa yitea cɛa nya biya te megwekwe, laka bela kesame ta veci yitea mɛ degha ta Yɛmə.

²⁷Ka Tɛkowa ka mene ŋa nci te ŋkwa nya kwelɛ yɛ cɛa ka ya ŋkwa nya wəba te megwekwe ba'a zlia Ofɛl.

²⁸Se mɛa mɛ degha ta Gədəwə, ka dzeghe Shala ka sekawe ŋa nci, yayata wəndə te ŋkwa nya kwa kema ta ghɛa ŋkɛ.

²⁹Dzeme vare hɛ, sekawe ŋa ŋkɛ Sadok, wəzege ta Imɛr, kwa kema ta ghɛa ŋkɛ perə, vare gheŋkɛ sekawe ŋa ŋkɛ Shemaya, wəzege ta Shekaniya, nde ya mɛ degha nya laka ŋkwa kesame ta veci,

³⁰dzeme vare sekawe ŋa ŋkɛ Hananiya, wəzege ta Shɛlɛmiya ba'a Hanəwn nya kande ŋkwaŋe ta wəzege ta Salaf te kwete bela. Vare bela ta ŋkɛ sekawe ŋa ŋkɛ Meshəwlam, wəzege ta Bɛrɛkiya, kwa kema ta ghɛa ŋkɛ.

³¹Dzeme vare sekawe ŋa ŋkɛ nde vɛsə mze Malkiya pa yitea ghɛa ka mene slene mbe ghɛa Shala ba'a ŋa ka zhɛre dzeve, kwa kema ta mɛ degha ta Mifkad hwa'a cɛa ka ya ŋkwa nya te megwekwe ta zli.

³²Kweci ka vɛsə mze le ka zhɛre dzeve ka ŋa ŋa nci kwelɛ yɛ cɛa ka ya ŋkwa nya te megwekwe ta zli le mɛ degha ta Timɛti.

³³Ma kwa fate Sanebalat ŋa yaŋa zli ghen'yɛ ka Zhəwif ne, mtiwə mtenyɛ va wənəa ŋkɛ, kwele kwele zhɛ nda wənəa ŋkɛ. Ntake ŋkɛ kayiɗə n'yɛ,

³⁴ma ke kwa kema ta ka menəhɛnyɛ ba'a ka sewajɛa ka Samari: «Wa wəsə nya mene nya ka Zhəwif nyi kaka dewə berete nyi wa? Katepele hɛ mbeli kamene na? Katedzeghe melɛ na? Kakiɗimte hɛ ɓeshi veci nya tse na? Katezhɛne hɛ kamene slene le pelɛ nyi felaŋeke nyi hɛ shave mbe kəsə ba'a nyi teremte nyi ghwə na?»

³⁵Tagha Tobiya, nde Amon vare. Ma ke: «Wa sləa nya zli wa! Dzemema ta kelɛ gamba te zli pelɛa nci ne, kateŋzla ŋkɛ!»

³⁶Ma 'ya səkwəte ghə: «Shala ta n'yɛ, fate kala nya ŋ'wəshi n'yɛ ka ghema ta n'yɛ! Zhɛneyi nda ŋ'wəshi ŋkwa ta nci kənəa ghə nci ba'a ŋkeyi hɛ kaka mavashi te hɛɗia kweci mbeli yitea ŋ'wəshi hɛ mbeli!

³⁷Mba na kekelemte jaɗafa ta nci te wənəa ŋa, sheshama fete ta nci na ma: nahe hɛ keŋelekɛ n'yɛ kwa ntsə kwa ntsə va nya nza ghen'yɛ kazhɛne kaŋa zli.»

³⁸Tsetse ŋamte zli ghen'yɛ. Pa ghen'yɛ himte kwete bela ta biya ŋkɛ kadzeyitea ghweme ntəslə zli pɛtɛ. Yayata wəndə kamenete slene le wənə kwetɛŋe.