Read kapsiki Nɛhɛmi 5 Bible Online

Nɛhɛmi 5 - kapsiki bible

Nɛhɛmi 5

¹Ma te kwete veci ne, pa kweci mbeli kwele kwele le mia nci ndeke nda fete ke ka menəhɛ nci nyi kaka Zhəwif.

²Ma ke kweci: «Ŋwale tezhilia n'yɛ, le ŋwalea kwɛa n'yɛ le ghen'yɛ ne, kwele kwele ghen'yɛ. Kaɗe n'yɛ kakemave ha kezha zeme ba'a kanza te ghweme.»

³Ma ke kweci ɓiyitsa: «Nda ghen'yɛ kandeke nda yɛ wəvea n'yɛ, yɛ wəvea rɛzɛŋea n'yɛ, pa le yɛ ghɛa n'yɛ ke mbeli kakane, kezha kemave ha te vəa ma.»

⁴Ma ke kweci zhɛkwa: «Kezha ŋki nda jaɓeregwale ke meghe ne, nda ghen'yɛ kakelete cɛdɛ kakane mbe yɛ wəvea n'yɛ ba'a wəvea rɛzɛŋea n'yɛ.

⁵Ndagwara hwelefe nya kwetɛŋe ghen'yɛ pɛtɛ! Kenza ŋa n'yɛ ŋwale tekeleke le ŋa ka menəhɛ n'yɛ we! Ama nda kazhɛrete ŋwale tezhilia n'yɛ le ŋwalea kwɛa n'yɛ kaka mavashi, kaka mavashi kweci hwa ŋwalea kwɛa n'yɛ tsetsenyanyɛ. Kwete ntsehwelea n'yɛ shɛ we, kwa nza ŋkɛ va kweci mbeli wəvea n'yɛ le yɛ wəvea rɛzɛŋe n'yɛ.»

⁶Pa wənəa ɗa bezenyɛ kwele kwele kwa fate ŋgaɗe ghəa shɛhɛ ba'a ghena shɛhɛ 'ya.

⁷Pa 'ya menete zəzə kezha ŋele mbelia jama le meha ghwə, ma 'ya sha hɛ: «Wəsə nya ɗaŋeɗa yaveyi yɛ kənəa ka menəhɛ ŋayɛ!» Kwa sebe ta ŋkɛ, pa 'ya hekakɛ hɛ yitea tsene nya wəba.

⁸Ma 'ya sha hɛ: «Gheɓəmə le ghəa ɓəmə, nahe mə kembeɗeke kweci mbelia ɓəmə ka Zhəwif nyi pamte mbeli kaka mavashi va kweci hwelefefi. Gheyɛ le ghəa ŋayɛ zhɛkwa ne, kapamte ka menəhɛ ŋayɛ yɛ ke kweci mbeli hwa gheɓəmə!» Tikə tikə hɛ, kashɛma zhɛne kwete ghena.

⁹Ma 'ya zhɛkwa: «Nahe yɛ kemenete fete le wəsə nya kala nya! Hawe yahi yɛ kahawe va Shala ta ɓəmə kezha ɗema kweci hwelefefi nyi kaka ghema ta ɓəmə kayiɗə ɓəmə wəka?

¹⁰'Ya le ghəa ɗa, nahe 'ya keŋslave nda dewa ta cɛdɛ le kanea ha ke mbeli kala ka menəhɛ ɗa le ka mene slene ta ɗa. Sərəakɛ nda ɓəmə wəshia ɓəmə shɛ ke hɛ.

¹¹Ɓəshi ɓeshi nya, zhɛnave nda mə yɛ wəve nci, yɛ wəvea rɛzɛŋea nci, yɛ wəvea bekelea nci ba'a ghɛa nci ke hɛ, zlekɛ mə yɛ yɛmə nyi yitea cɛdɛ, ha, tɛ ba'a n'yi nyi nzəɓəave nda yɛ ke hɛ.»

¹²Ma ke hɛ zhɛnete nda: «Katemene wəsə nya gezete n'yɛ na ghen'yɛ, katezhɛne nda wəshi nyi fəhwe n'yɛ va hɛ ghen'yɛ ke hɛ ba'a wəsə shɛ kate'yɛwe ghen'yɛ va hɛ zhɛkwa we.» Pa 'ya hekakɛ ka dzeghe Shala, kezha zeme fela hɛ kwa kema ta nci kamene kala meɗe mɛa nci.

¹³Kwa sebe ta ŋkɛ pa 'ya bekwemte zeweve ta lekwesa ta ɗa le geze ghena kala nya: «Tsetse tebekwe mbeli nyi keɗema keghereŋe te ghena ta nci Shala! Ndaŋete hɛ ŋkɛ te ghɛa nci ba'a te wəshia nci, kezha nza hɛ pala pala!» Ma ke tsene ta mbeli pɛtɛ: «Amɛn!» Pɛtɛ hɛ katsahe Mahwətə, ma kwa sebe ta ŋkɛ ne, mba hɛ dɛŋe dɛŋe te meɗe mɛa nci.

¹⁴Se te veci nya ntave ɗa mbeli kaŋgwamna ta hɛɗia Zhəwda, ghala va meŋe bakeghəmbe, se te kwa bakemsə pa te kwa mahekenemsə bakeghəmbe ta va ta Artasɛrsɛs te meghe ne, ya 'ya, ya ka menəhɛ ɗa, kese ghen'yɛ kazeme wəshi nyi tseheke nda mbeli ke ŋgwamna we.

¹⁵Ama ka ŋgwamna nyi mpelɛa ma ke 'ya ne, kasa nda yaka hɛ ke mbeli ba'a ka'yɛwe yɛ wəshi kezeme le tɛ, kadzeghə ɓiyitsa, wəfaɗemsə dəɓərəa mze kwa ghwə ghwə. Pa le kweci mbelia ka ŋgwamna kasa nda yaka ke mbeli. Ama 'ya, va ghazlənə va Shala ne, kese 'ya kamene tsagha we.

¹⁶Ama 'ya le ghəa ɗa nde se kaŋa zli. Ama kepave wəve 'ya we, pɛtɛ ka mene slene ketsenete geva teke kamene slene.

¹⁷Ma ka Zhəwif le ka meha ghwə nyi kezeme ki ghɛa ɗa ne, gwəmsə ba'a mcɛfemsə hɛ, kaɗema mbeli keɓelate nyi kese sha ghen'yɛ hwa kweci hwelefefi nyi kwa ghala ta n'yɛ.

¹⁸Keveci keveci hene mca təhə, timɛti ganji ŋkwaŋe ba'a kaŋkəli 'ya, menema ta hɛ meŋe, kafə ɗa tɛ mbeli kwele kwele. Ya tsagha shɛ ŋkɛ ne, kese 'ya ka'yɛwe wəsə nya kehi kaŋa ŋgwamna va mbeli we, kwa nza slene nyagha ɗaŋe ɗaŋe kənəa mbeli.

¹⁹«Shala yawe, zəzəte wəshi nyi menete nda nyi 'ya pɛtɛ ke mbeli nyi ba'a menete ɗa ganyɛa ŋa.»