Read kapsiki Nɛhɛmi 8 Bible Online

Nɛhɛmi 8 - kapsiki bible

Nɛhɛmi 8

¹Pɛtɛ ka Israyɛl tsenete geva kanya kwetɛŋe mbe Zhɛrəzalɛm te kwete ŋwela mɛa mɛ degha ta Yɛmə. Pa hɛ gezete nda ke Ɛsdras, nde rafe wəshi mahalegə kezha keleke palepa ta wəsə mahalegə nya ndeke nda Mahwətə ke ka Israyɛl laka Moyize.

²Pa nde dzeghe Shala Ɛsdras keleke palepa kadzawa kema ta tsene ta mbeli: yɛ zhili, mi le ŋwale nyi gare fave ghena. Te kwa ghate ta hɛ mbe tere kwa mberefaŋe menete geva ŋkɛ.

³Se masheke pa kwa ghə veci Ɛsdras kajaŋga palepa shɛ zlape zlape kwa kema ta zhili, mi le ŋwale nyi gare fave ghena te ŋwela nya mɛa mɛ degha ta Yɛmə. Pɛtɛa mbeli kefate jaŋga shɛ le mehele.

⁴Pa Ɛsdras sletenyɛ pelɛ sheghwə nyi sleɓete mbeli kezha slenea shɛ. Te kwa zeme ta ŋkɛ yɛ Matitiya, Shɛma, Anaya, Əwriya, Hilkiya ba'a Masɛya, te kwa gwela ta ŋkɛ yɛ Pedaya, Mikayɛl, Malkiya, Hashəwm, Hashebadana, Zakari le Meshəwlam.

⁵Waɗe Ɛsdras pelemte palepa kwa ntsə ta mbeli pɛtɛ, kwa nza ŋkɛ pelɛ ŋkwa nya biya. Ma kwa pelemte palepa ŋkɛ, mbeli pɛtɛ satenji meslete.

⁶Pa Ɛsdras tsate nda hana ke Mahwətə, Shala nya wəba, ma ke mbeli pɛtɛ zhɛnete le slete yɛ dzeve yitea ghweme: «Amɛn! Amɛn!» Gwəɗəŋə hɛ ntiŋə ghə mbe hɛɗi kahawe va Mahwətə.

⁷Pa hɛ zhɛne kasatenji meslete, ntake yɛ Yɛshəwa, Bani, Shɛrɛbiya, Yamin, Akəwb, Shabetay, Hodiya, Masɛya, Kelita, Azariya, Yozabad, Hanan le Pelaya nyi kaka Lɛvi kateke nda wəsə mahalegə ke mbeli.

⁸Ntake hɛ kajaŋga palepa ta wəsə mahalegəa Shala same same ba'a kancɛ nda ghena nya mbe ke mbeli, yitea fate wəsə nya kejaŋgate geva yayata wəndə.

⁹Pɛtɛ tsene ta mbeli kanehwene kwa fate jaŋga shɛ hɛ. Vatse nda se yɛ Nɛhɛmi nya kaŋgwamna, Ɛsdras, nde dzeghe Shala nya kande rafe wəshi mahalegə le ka Lɛvi nyi kencɛ nda ghena nyi mbe ke mbeli kageze: «Veci nya keveyi geva tekeleke kaŋa Shala Mahwətə ta ŋayɛ veci nya! Veci keheɗe kema ba'a kenehwene ŋkɛ we.»

¹⁰Ma ke Ɛsdras mtsehete: «Kwiɗi mə sha ghɛa ŋayɛ, zeme mə wəshi ganji, sa mə wəshi ganji, ɗave nda mə ke mbeli nyi keɗema ketakɛ, kwa nza ŋkɛ nahe veci nya keveyi geva tekeleke kaŋa Mahwətə ta ɓəmə. Nzama yɛ le kema teheɗe ma! Zlama ta Mahwətə ya kaberete ta ŋayɛ.»

¹¹Pa ka Lɛvi gweɗakwete mbeli perə kwa geze hɛ: «Gweɗakwe pe yɛ! Kwa nza ŋkɛ, nahe veci nya keveyi geva tekeleke kaŋa Shala. Mba yɛ kenza le kema teheɗe!»

¹²Tsagha, pɛtɛ mbeli kalə kazeme wəshi ba'a kasa wəshi. Pa hɛ ɗave wəshi kezeme ke mbeli nyi keɗema ketakɛ, ntake hɛ kamene gəsəkə nya wəba le zlama, kwa nza ŋkɛ nahe hɛ kefate ghena nyi gezave nda mbeli ke hɛ.

¹³Ma mbe kwa bake ta hɛ, pa mbelia jama nyi mbe pɛtɛa hwelefefi, ka dzeghe Shala le ka Lɛvi tsenete geva yitea Ɛsdras, nde rafe wəshi mahalegə, kezha fave zeweve ta ghena nyi mbe wəshi mahalegə megela.

¹⁴Ma mbe wəsə mahalegə nya gezeke nda Shala ke hɛ laka Moyize ne, pa ntsate ŋkwa nya kegeze nda ke ka Israyɛl kezha nza hɛ mbe ghwəli hwa “gəsəkəa ghwəli” te tere kwa mberefaŋe:

¹⁵nahe hɛ kehi kaɗepete ba'a kazlapete ghena ta gəsəkəa shɛ mbe yɛ meleme ta nci ba'a mbe Zhɛrəzalɛm kala nya: «Kwiɗi mə kadzeme yɛ ghweme katsasle dzeve ta yɛ bekele kwa wəza wəza ba'a nyi hwa gamba, ŋa yɛ sewahe, ŋa yɛ peha ba'a yɛ wəfe nyi zhiɓə kezha mene ghwəli, kala nya kerafete geva.»

¹⁶Pa ka Israyɛl lə kazeleke dzeve ta wəfe kezha mene yɛ ghwəli, ma kweci mbeli ne, pelɛ dɛɓere nya kənəa cɛa nci ŋa nci, kwa zlave ta nci ŋa kweci, dzeyi te ŋwela nya yitea ghɛa Shala ŋa kweci, dzeyi te ŋwela ta mɛ degha ta Yɛmə ŋa kweci ba'a mɛa mɛ degha ta Ɛfrayim ŋa kweci.

¹⁷Pɛtɛa mbeli nyi ketsenete geva tagha, nyi kezhɛneke geva nyi menete yɛ ghwəli kantishɛnji mbe. Kavəa zlama nya wəba se vəa shɛ, kwa nza ŋkɛ kegha ka Israyɛl kamenete gəsəkəa shɛ se mɛa vəa Zhozəwɛ, wəzege ta Nəwn we.

¹⁸Mbe yayata vecia gəsəkə, se te kwa ghate ta hɛ pa te kwa keɗaŋe, pa mbeli jaŋgate kwete ŋkwa mbe palepa ta wəsə mahalegəa Shala. Hɛ mberefaŋe menete gəsəkə, ma te deghese ta hɛ, pa mbeli menete tsene nya wəba kala nya seneve mbeli kamene.