Read kapsiki Ɛstɛr 2 Bible Online

Ɛstɛr 2 - kapsiki bible

Ɛstɛr 2

¹Ma kwa sebe ta ghena nyi pɛtɛ ne, nahe wənəa meghe Sɛrsɛs kegweɗakwe. Pa zəzəte wəsə nya menete nda Vasti ba'a ghena nya zəzəte mbeli te ghəa nta.

²Ma ke mempɛhwetɛti nyi kemene nda slene ke meghe: «Nahe ŋkɛ kehi kasepa ŋa deghelɛshi nyi ndeɗe ndeɗe, nyi keghama le zhili mbeli, meghea n'yɛ.

³Meghe, nteyi mbeli te pɛtɛa sla ta hɛɗi nyi te hɛɗi meghea ŋa katsene ŋwalea kwɛ nyi keghama le zhili ba'a nyi ndeɗe ndeɗe kase teke mbe Səze, meleme nya berete, kave hɛ mbe ghɛa mi, mbe dzeve ta Hɛgɛ nya ketsewe tsewe nya nza ghɛa mi te dzeve ve, katenewe ghweme ŋkɛ te hɛ ba'a katefə nda wəshi kepesa geva ŋkɛ ke hɛ.

⁴Ma wəzha nya ɗehwe meghe hwa hɛ ne, pa nde kamale ta meghe te ŋkwa Vasti.» Zeɗehwe nda ghena shɛ ke meghe, pa ŋkɛ menete tsagha shɛ.

⁵Le kwete nde Zhəwif shɛ mbe ŋkwa nya berete mbe Səze, nya nza sləa ŋkɛ kaMardoshɛ, wəzege ta Yayir, hwelefe ta Shimɛyi ba'a Kish, kwa yita ta Bɛnjamɛn.

⁶Same kwa Zhɛrəzalɛm ŋkɛ hwa mbeli nyi keseke hɛ Nabəkodonozor, meghea ka Babilone zlaɓe le Yekoniya, meghea ka Zhəwda kadzeme Babilone.

⁷Mardoshɛ nde dəkwəte Hadasa, geze ta ŋkɛ Ɛstɛr. Wəzha ta wəza meghekɛ nya kwele, kwa nza nde nahe yɛ yitenyɛ le meghekɛ kempənji, kendeɗe nda nde tsape.

⁸Ma kwa zlapete ghena nya gezeke meghe mbeli ne, kwele kwele ŋwalea kwɛ nyi tseneke mbeli kadzembe ŋkwa nya berete mbe Səze kanza te dzeve va Hɛgɛ, pa mbeli keleke Ɛstɛr perə kadzeki ghɛa meghe laka berete ta Hɛgɛ, wəndə nya keya mi.

⁹Ndeɗehwe nda wəzha shɛ kwele kwele ke Hɛgɛ, pa nde kemave zlaɓa ta ŋkɛ. Pa ŋkɛ fəave nda wəshi kepesa geva nyi kehi taghanyɛ ba'a wəshi kezeme nyi zeɗe zeɗe. Pa ŋkɛ ndeke nda kweci hwa mi nyi kemene slene ganji ki ghɛa meghe mberefaŋe kakemane, pa veyi hɛ te ŋkwa nya ganyɛ ma mbe ghɛa mi.

¹⁰Kencɛte Ɛstɛr kakwa Zhəwif nde kwa fɛake Mardoshɛ kencɛ nda hwelefe ta nta ke mbeli we.

¹¹Ma Mardoshɛ le ŋa ŋkɛ ne, kehɛ kehɛ se ŋkɛ kadzeghwa dzeyi mɛa ghɛa mi kezha 'yɛwe nza ta Ɛstɛr ba'a wəsə nya mene nda mbeli.

¹²Ma ŋwalea kwɛ nyi ki ghɛa mi nyagha ne, nda hɛ kamenete va zake kahi geva le wəshi kepesa geva ta mi: le 'wərdə ganyɛ fi geva hɛ mbe ka ghate ta tere nyi ŋkwaŋe. Ma tere ŋkwaŋe nyi ketene ne, kwete mama ta 'wərdə ba'a kweci wəshi kehi geva ta mi keghə keghə yafi hɛ. Ma kwa sebe ta ŋkɛ yayata wəzha makwa le ŋa nta və kalə sha meghe Sɛrsɛs.

¹³Ma kalə wəzha makwa sha meghe ne, kave nda yayata wəsə nya ɗe nde kakele kalə kadzawa kema ta meghe mbeli shave mbe ghɛa mi.

¹⁴Ma hetɛhwɛɗi ne, kalə nde kadzeki ghɛ meghe, ma masheke ne, kalə nde kadzeki kwete ghɛa mi nya nza Sha'ashgaz, nde tsewe tsewe nya te ghəa ka meghwateshia meghe. Kazhɛne geva wəzha makwa kalə sha meghe we, nda ŋkɛ kamawehwe ba'a kahekakɛ le sləa nta.

¹⁵Ma te kwete hɛ ne, ŋa Ɛstɛr və kedzeki ghɛa meghe, wəzha ta Abihayil nya kawəza meghekɛa Mardoshɛ nya kekelete ŋkɛ. Kese ka'yɛwe kwete wəsə za ma ke nyi ndeke nda Hɛgɛ nde tsewe tsewe ta meghe nya keya mi we. Kwele kwele ɗehwe Ɛstɛr mbeli nyi kenewe pɛtɛ.

¹⁶Ma mbe kwa mberefaŋe ta va ta Sɛrsɛs mbe meghe mbe kwa meŋe ta tere nya heka mbeli katere Tɛbɛt ne, pa mbeli keleghe Ɛstɛr kadzeki ghɛa meghe.

¹⁷Pa meghe ɗehwe Ɛstɛr za ma ke kweci pɛtɛa mi, pa kemave zlaɓa kwa kema ta ŋkɛ za ma ke kweci ŋwalea kwɛ pɛtɛ, pa veyi nda derə meghe mbe ghə, pa gezete ghenta ya kamale ta meghe te ŋkwa Vasti.

¹⁸Pa meghe menete gəsəkə nya wəba kazləvəa Ɛstɛr, pa ŋkɛ hekakɛ ka mene slene ta ŋkɛ nyi jama jama ba'a mbeli nyi te ghə nyi yite. Pa fɛake ŋki ta jaɓeregwale dzeyi mbe yɛ sla ta hɛɗi ba'a pa nehave nda wəshi gəmə ke mbeli kwele kwele laka zeɗe helia meghe.

¹⁹Ma kwa tsene ŋwalea kwɛ mbeli kakwa bake zhigə ne, ŋkwa ya va Mardoshɛ ɓiyitsa ki ghɛa meghe kamene slene.

²⁰Kese Ɛstɛr kancɛ mbelia nta le hwelefe ta nta kakwa Zhəwif kala nya meɗekɛ Mardoshɛ we, mba kafa nda ghena kwa nza nde mbe dzeve ta ŋkɛ.

²¹Ma mbe kwete hɛ kamene slene ta ŋkɛ Mardoshɛ ki ghɛa meghe ne, pa kweci ka tsewe tsewe nyi keya ŋkwa kedzeki ghɛa meghe bake, yɛ Bigtan le Tɛrɛsh tsahwe kezha peslekɛ meghe Sɛrsɛs nya zhɛ nda wənəa nci ke hɛ ve.

²²Pa Mardoshɛ fate, pa gezete nda ke male ta meghe Ɛstɛr, pa Ɛstɛr gezete nda ke meghe te ŋkwa Mardoshɛ.

²³Ma kwa neweve ghena shɛ mbeli, kaganda ŋkɛ. Pa mbeli peslekɛ mbeli nyi bake nyighɛ le zewe te sheghwə. Nahe ghena shɛ kerafete geva kwa kema ta meghe mbe palepa nya rafe wəshi mbeli.