Read kapsiki Ɛstɛr 3 Bible Online

Ɛstɛr 3 - kapsiki bible

Ɛstɛr 3

¹Ma kwa sebe ta wəshi nyighɛ ne, pa meghe Sɛrsɛs ndeke nda zləvə ke Haman, wəzege ta Hamedata hwelefe ta Agag. Pa veyi ŋkɛ kawəndə nya kwele ma te ghəa pɛtɛa mbelia ŋkɛ nyi jama jama.

²Pɛtɛa kweci ka mene slene ta meghe kagwəɗəŋə kwa kema ta Haman kahawe ve, kwa nza nde tsagha gezete meghe, deke Mardoshɛ nde ɗema kagwəɗəŋə kwa kema ta ŋkɛ kahawe ve we.

³Ma ke ka mene slene ta meghe sha Mardoshɛ ne, wa raberə dzawa na kənəa ghena ta meghe wa?

⁴Tsagha 'yɛwe hɛ ve keveci keveci, ama kese kafa nda ke hɛ we. Kwa gezete nda ŋkɛ ke hɛ nde Zhəwif 'ya, a ke ne, pa hɛ gezete nda ke Haman kezha newe kenza ŋkɛ kazhɛne ghə.

⁵Nahe Haman keɗepete kaganda ɗema Mardoshɛ kagwəɗəŋə kwa kema ta ŋkɛ kahawe ve. Petefe wənəa Haman wepenyɛ va ghena shɛ kwele kwele.

⁶Nahe mbeli kegezete nda perə kande Zhəwif Mardoshɛ. Newe ke ne dewə nda Mardoshɛ kwetɛŋenyɛ kezha ha nda mpa ŋkɛ, mpəmte ka Zhəwif nyi te hɛɗia meghe Sɛrsɛs pɛtɛ yaɗe Haman, hwelefefia Mardoshɛ pɛtɛ.

⁷Ma mbe va kwa meŋe bakeghəmbe ta Sɛrsɛs mbe meghe, te kwa ghate ta tere nya heka mbeli kaNisan ne, pa ŋkɛ slate kwasheghediɗi nya heka hɛ kaPəwrim, kezha newe hɛ le tere nya kehite geva le zəzə ta ŋkɛ. Pa kwasheghediɗi vate geva te tere kwa meŋe bakeghəmbe nya heka mbeli kaAdar.

⁸Ma ke Haman sha meghe Sɛrsɛs: «Maze yawe, le kweci hwelefefia kweci mbeli shɛ hwa mbelia ŋa, nahe hɛ ketazeyi geva dzeyi hwa mbeli te yayata sla ta hɛɗi nya te hɛɗi meghea ŋa. Tekeleke ŋa nci nza, tekeleke ŋa nci wəshi mahalegə, kayɛ fete hɛ tɛape yitea wəsə mahalegəa meghe we. Kehi na kasərə hɛ tsagha gwezlayɛ we meghe we.

⁹Ma kenza nde kayɛte meghe ne, pa mbeli rafete kezha zamte hɛ mbeli. 'Ya le ghəa ɗa ne, kave nda mze kwa tɛawetɛa 'ya kakiləwə 300.000, ke ka mene slene ta meghe kezha bete hɛ mbe ŋkwa nya tsene wəshi ganjia meghe mbeli.»

¹⁰Pa meghe seɗemte ŋgwedɛba nya te dzeve ta ŋkɛ nya nza lamba te, kandeke nda ke nde ghema ta ka Zhəwif, Haman wəzege ta Hamedata, hwelefe ta Agag.

¹¹Ma ke meghe sha Haman: «Nza mze kwa tɛawetɛa ta ŋa. Mene wəsə nya ɗe na le mbelia shɛhɛ.»

¹²Pa hekakɛ ka rafe wəshi nyi te hɛɗia meghe pɛtɛ, te kwa meŋe mahekeneghəmbe ta hɛ mbe tere kwa ghate. Kala nya gezete Haman ne, pa hɛ rafete yɛ palepa ba'a ghweneghe nda hɛ ke mbelia jama ta meghe, ka ŋgwamna nyi te ghəa pɛtɛa yɛ sla ta hɛɗi ba'a ke mbeli nyi te ghəa yayata hwelefe. Le yayata ntsehwelea rafe wəsə le yayata ghena rafete palepa shɛhɛ mbeli. Pa mbeli rafete te sləa meghe Sɛrsɛs kamenate lamba te le ŋgwedɛba ta meghe nyagha.

¹³Pa hɛ ghwenakɛ palepa shɛhɛ kahe kahe kadzete yayata sla ta hɛɗi meghe. Pa palepa shɛhɛ gezete kampə, kaghazle ba'a kaza sebe te pɛtɛa ka Zhəwif, ka mempɛhwetɛti ba'a ka meha mehɛɗi, ŋwale ba'a mi mbe veci kwetɛŋe, hɛ meŋe mahekeneghəmbe mbe tere kwa meŋe bakeghəmbe nya katerea Adar ba'a kezha fə wəshia nci.

¹⁴Ma mbe yayata sla ta hɛɗi, ma palepa nyi kemave mbeli ne, nda ŋkɛ kanza le berete ta wəsə mahalegə nya kegeze nda ke mbeli kezha hi geva hɛ kamene te hɛ nya sləyi mbeli.

¹⁵Kahe kahe palepa ghweneghe geva va ghena nya gezete meghe, Pa mbeli zlapete mbe Səze, meleme nya berete. Ntishɛ yɛ meghe le Haman kasa wəsə. Ama kwetɛ kwetɛŋe mehele ta mbeli nyi mbe Səze.