Read kapsiki Ɛstɛr 9 Bible Online

Ɛstɛr 9 - kapsiki bible

Ɛstɛr 9

¹Nahe kwa meŋe mahekeneghəmbe ta hɛa tere kwa meŋe bakeghəmbe, terea Adar kese. Vəa ŋkwa shɛ temene slene mbeli le ghena nya gezeke meghe ba'a veyi ghə ka ghema ta ka Zhəwif le hərə ŋkwa. Ama tekeleke wəsə nya kemenete geva, pa ka Zhəwif hərəte mbeli nyi ɗema ntsə ta nci.

²Mbe pɛtɛa sla ta hɛɗia meghe Sɛrsɛs ne, katsene geva ka Zhəwif mbe meleme nya nza hɛ ba'a kaha nda mpa hɛ ke mbeli nyi keɗe kamene nda wəsə kwa ndiremi ke hɛ. Wəndə shɛ kaghereŋe kwa kema ta nci we, kwa nza ŋkɛ kave nda ghazlənə hɛ ke mbeli pɛtɛ.

³Pɛtɛa mbelia jama jama, nyi te ghəa yɛ sla ta hɛɗi, ka ŋgwamna le mbelia ŋgwamna kakemane ka Zhəwif, va ghazlənə va Mardoshɛ.

⁴Kwa nza ŋkɛ ŋkwa nya wəba ya va Mardoshɛ ki ghɛ meghe, nahe zləvəa ŋkɛ kepesleyi geva mbe sla ta hɛɗi pɛtɛ. Mtsehe yamtsehe kwelea Mardoshɛ.

⁵Tagha gɛ, pa ka Zhəwif mpəmte ka ghema ta nci le kafayɛ, pa hɛ zamte sebe te hɛ, wəsə nya ɗe hɛ yamene hɛ le mbeli nyi keɗema ntsə ta nci.

⁶Deke mbe meleme Səze, meleme nya berete ne, zhili mcɛfe gwəmsə mpəmte ka Zhəwif.

⁷Meŋe mpəmte ŋwalea Haman, wəzege ta Hamedata nya kande ghema ta ka Zhəwif hɛ. Wa nyi sləa nci nyi: Parshanedata, Dalfon, Aspata, Porata, Adaliya, Aridata, Parmasheta, Arisay, Ariday ba'a Vayɛzata. Ama kese hɛ kafə wəshia nci we.

¹¹Te vecia shɛnyɛ dzawa sleme ŋkɛ va meghe nda ŋkwini mbeli nyi kempə mbe Səze, meleme nya berete.

¹²Ma ke meghe sha Ɛstɛr, male ta ŋkɛ ɓiyitsa: «Deke mbe Səze, meleme nya berete ne, nahe ka Zhəwif kempəmte zhili mcɛfe gwəmsə ba'a ŋwalea Haman meŋe. Ŋkwini nyi mpəmte hɛ mbe kweci meleme ta ɗa tsagha gɛ! Wa wəsə nya 'yɛwe na zhɛkwa kezha mene ŋa 'ya gɛ? Katemene ŋa yayata wəsə nya mene na 'ya.»

¹³Ma ke Ɛstɛr zhɛnete nda: «Ma kenza nde kaɗe meghe ne, pelakɛ ka Zhəwif nyi mbe Səze ŋkɛ, kamene hendɛ kala ghena nya kegezete geva pa va ɓeshi ba'a hwepete geva ta ŋwalea Haman nyi meŋe nyi mbeli te sheghwə.»

¹⁴Tsagha shɛ meghe gezete kezha mene mbeli. Pa mbeli zlapete ghena shɛ mbe Səze, pa mbeli hwehwepate geva ta ŋwalea Haman nyi meŋe te sheghwə.

¹⁵Pa ka Zhəwif tsenete geva mbe Səze te kwa meŋe wəfaɗeghəmbe ta hɛa terea Adar ba'a mpəmte zhili gwəmsə mahekene, ama kese hɛ kafə wəshia nci we.

¹⁶Ma kweci ka Zhəwif nyi mbe kweci meleme ne, pa hɛ tsenete geva kezha ya mpia nci, pa hɛ zamte ka ghema ta nci kwa nza nde nahe hɛ kempəmte ŋkwa kaslibə mberefaŋemsə mcɛfeghəmbe hwa ka jaga ta nci. Kese hɛ kafə wəshia nci we.

¹⁷Nya nde menete geva mbe kwa meŋe mahekeghəmbe ta hɛa terea Adar. Mbe hɛ kwa meŋe wəfaɗeghəmbe ta ŋkɛ, pa hɛ sərəakɛ mpə ŋkwa, pa hɛ zhɛrete kahɛa gəsəkə ba'a kahɛa zlama.

¹⁸Ma ka Zhəwif nyi mbe Səze, nyi kewate dewa mbe hɛ kwa meŋe mahekeneghəmbe ba'a kwa meŋe wəfaɗeghəmbe te terea Adar ne, mpi yazhɛnakɛ hɛ mbe hɛ kwa meŋe mcɛfeghəmbe, te vecia shɛ menete gəsəkə hɛ le zlama.

¹⁹Vatse veyi veci kwa meŋe wəfaɗeghəmbe te terea Adar ka Zhəwif nyi mbe meleme nyi jama jama ba'a nyi ɓɛhwɛ ɓɛhwɛ kavecia gəsəkə: kamene gəsəkə hɛ le zlama ba'a kaghwene nda wəshi gəmə hɛ ke ghəa nci.

²⁰Pa Mardoshɛ rafete nda ghena shɛ ke ka Zhəwif te palepa. Pa ghweneghe nda ke nyi dekwe le nyi cakeɗa te hɛɗia meghe Sɛrsɛs.

²¹Pa gezave nda ke hɛ kamene gəsəkə mbe kwa meŋe wəfaɗeghəmbe le kwa meŋe mcɛfeghəmbe ta hɛa terea Adar. Kezha nza ŋkɛ kavəa gəsəkə keva keva.

²²Kwa nza ŋkɛ ne, mbe hɛ nyi kemave nehe geva ka Zhəwif le ka ghema ta nci. Mbe terea shɛnyɛ zhɛrenyɛ beze wənəa nci kazlama ba'a nehwene ta nci kagəsəkə. Pa hɛ veyi hɛa shɛhɛ kaŋa wəshi kezeme le ŋa zlama ba'a kaghwene nda wəshi ganji ke ghəa nci ba'a ke ka titikwəa kɛfi.

²³Wəsə nya rafave nda Mardoshɛ ke ka Zhəwif, ghala mene hɛ tsagha ne, pa hɛ zhɛrete kawəsə keshia nci.

²⁴Pa Mardoshɛ zəzəte nda ke hɛ: Haman, wəzege ta Hamedata, hwelefe ta Agag nde ghweze mɛ hwa ka Zhəwif, gheŋkɛ nde zəzəte kezha mpəmte hɛ. Pa ŋkɛ slate kwasheghediɗi nya heka nde kaPəwrim: kezha veyi və kezamte hɛ pɛtɛ.

²⁵Ama pa Ɛstɛr lə sha meghe, pa gezete nda ke mbeli laka rafe palepa: Wəsə kwa ndiremi nya zəzəte nda ŋkɛ ke ka Zhəwif nde dzəɓəaghe geva kənəa Haman. Pa mbeli hwepete te sheghwə, tsagha ŋwalea ŋkɛ perə.

²⁶Vatse hekate hɛa shɛ ka Zhəwif kaPəwrim kala sləa Pəwr, geze ta ŋkɛ kwasheghediɗi. Pa hɛ vate ghə te palepa nya rafete nda Mardoshɛ ke hɛ, wəshi nyi nakɛ hɛ ba'a pɛtɛa wəshi nyi kemenete nda geva ke hɛ.

²⁷Pa ka Zhəwif veyi ghə te kaghena nya wəba le ɗema ta nci kaŋa nci, kaŋa ŋwalea nci, kaŋa ŋwalea ŋwalea nci ba'a kaŋa mbeli nyi ketenza kaka Zhəwif pɛtɛ, kezha mene gəsəkə hɛ mbe hɛ nyi bakea shɛhɛ keva keva kala, kala nya gezave nda Mardoshɛ ke hɛ.

²⁸Pa hɛ menete slene le hɛa shɛhɛ ba'a yate megela, kamene keshi keshi, mbe hwelefe ta nci pɛtɛ, mbe yayata va, mbe yayata sla ta hɛɗi, mbe yayata meleme, yagha ghena ta Pəwrim kaza hwa ka Zhəwif ba'a zəzə ta ŋkɛ kaza mbe hwelefe ta nci.

²⁹Pa Ɛstɛr, wəzha ta Abihayil male ta meghe le Mardoshɛ, nde Zhəwif rafete palepa kwa bake kezha keseyi ghena ta Pəwrim le berete pɛtɛ.

³⁰Pa mbeli ghweneghe nda palepa shɛhɛ ke pɛtɛa ka Zhəwif nyi mbe sla ta hɛɗi nyi gwəmsə ba'a bakemsə mberefaŋeghəmbe te hɛɗia Sɛrsɛs. Ghena ta kwelɛŋe ba'a ŋa nza dɛŋe dɛŋe ya te hɛ.

³¹Kezha keseyi hɛa Pəwrim le yɛ vəa ŋkɛ kala nya gezete Mardoshɛ nde Zhəwif hɛ le Ɛstɛr male ta meghe, kala nya veyi ka Zhəwif kezha ghəa nci le yɛ hwelefe ta nci, jikə le ghena ta səwəmayɛ le ŋa nehwene.

³²Ghena nya gezeke Ɛstɛr nde keseyi ghena ta Pəwrim, vatse rafeyi mbeli mbe palepa nya wəba.