Read kapsiki Shave 10 Bible Online

Shave 10 - kapsiki bible

Shave 10

¹Ma ke Mahwətə sha Moyize: «Kwiɗi kalə sha Farawon, kwa nza ŋkɛ 'ya nde zhɛrete nda mehele ntɛaŋe ntɛaŋe ke hɛ le mbeli nyi yite, yitea mene geva wəshi meŋele nyi hwa hɛ.

²Ma tsagha ne, kateɓela nda na ke ŋwalea ŋa ba'a ke ka shihɛ ŋa tsema tsema menete nda 'ya ke ka Ɛzhipte kwa menete wəshi meŋele nyi 'ya pɛtɛ te hɛɗia nci. Tsetse teɗepete yɛ 'ya ya kaMahwətə.»

³Cape yɛ Moyize le Aron kalə sha Farawon, ma ke hɛ shɛ: «Wa nya ghena nya geze Mahwətə, Shala ta ka Ɛbrə nya: ‹Pa te nyama və teɗema na kashifə ghə kwa kema ta ɗa wa? Pelakɛ mbelia ɗa kalə kadzeghe ɗa melɛ.

⁴Ma keɗema na kapele mbelia ɗa kaslə ne, kateghwene yɛ dzale 'ya hendɛ hendɛ nya kadzete hɛɗia ŋa.

⁵Bətə tenza ŋkwa nya te hɛɗi va hɛ, mba mbeli katenakɛ hɛɗi we. Pɛtɛ tezeme wəshi nyi te wəve, nyi ketene yitea kwacakelɛ hɛ, katetene sleke hɛ ya kwetɛŋe te wəfe nyi kwamte we.

⁶Mpɛafe tenza yɛ ghɛ meghea ŋa, yɛ ghɛa mbeli nyi yitea gha ba'a ŋa ka Ɛzhipte pɛtɛ va hɛ. Kandiremi nya wəba, nya ghama mbeli kanakɛ se te vəa ka shihɛ ŋayɛ pa ɓeshi nya tenza ŋkɛ.›» Cape Moyize shavenyɛ ki ghɛa Farawon, ntəŋə ŋkɛ yitea dzeghwa ta ŋkɛ.

⁷Ma ke mbeli nyi yite sha meghe: «Pa te nyama və tefɛa wəndə nya yitea kele ɓəmə ndiremi kase wa? Pelakɛ ka Israyɛl kalə kadzeghe nda melɛ ke Shala Mahwətə ta nci! Keɗepe na dzeyi yadzeyi Ɛzhipte te sebe wəka?»

⁸Pa mbeli zhɛneke yɛ Moyize le Aron kase sha Farawon, ma ke sha hɛ: «Wərə yɛ kalə kadzeghe nda melɛ ke Shala Mahwətə ta ŋayɛ. Ama nyima mbeli ka telə wa?»

⁹Ma ke Moyize zhɛnete: «Pɛtɛ teslə ghen'yɛ, yɛ ŋwale le meha mehɛɗi, yɛ zhili le mi, zlaɓe le timɛtia n'yɛ, kwɛa n'yɛ ba'a yɛ sla ta n'yɛ, kwa nza ŋkɛ gəsəkə yatemene nda n'yɛ ke Mahwətə.»

¹⁰Ma ke Farawon le ŋ'wəshi: «Nza Mahwətə le gheyɛ! Kaganda tepele ŋayɛ 'ya kaslə le mbeli nyi ki ghɛa ŋayɛ! Fəyitekeghə ɗema zəzə ganyɛ va gheyɛ.

¹¹Kamenete geva ŋkɛ kala nya zəzə nya yɛ we. Deke zhili ka telə kadzeghe nda melɛ ke Mahwətə, kwa nza ŋkɛ gheŋkɛ yazele yɛ.» Pa mbeli ŋkamte hɛ shave ki ghɛa Farawon.

¹²Ma ke Mahwətə sha Moyize: «Kafete dzeve ta ŋa kənəa Ɛzhipte kezha heka yɛ dzale kase kazeme wəshi nyi ketene yitea kwacakelɛ te wəve hɛ pɛtɛ!»

¹³Pa Moyize kafete geta ta ŋkɛ kənəa Ɛzhipte, tagha gɛ, pa Mahwətə ntsake sefə nya kevɛ veci veci ba'a hwencɛke ncɛke se laka ŋkwa kesame ta veci kadzete hɛɗi. Ma masheke ta ŋkɛ ne, nahe sefə kefəke yɛ dzale.

¹⁴Rayɛ ŋkwa nya te hɛɗia Ɛzhipte va hɛ ba'a kampekwe hɛ te yayata ŋkwa. Kwele kwele hɛ tsape: kegha mbeli kanakɛ yɛ dzale kala nyighɛ ghalanza we, katezhɛne mbeli kanewe kweci kala nyighɛ we.

¹⁵Rayɛ ba'a ŋkereyi tene ŋkwa nya te hɛɗi va hɛ. Ntake hɛ kazeme gwəzə ba'a yɛ ya ta wəfe nyi ketene yitea kwacakelɛ. Sleke shɛ ketene te yɛ wəfe we, wəsə nya wəzate mbeli shɛ ketene kwamte we.

¹⁶Pa Farawon hekake yɛ Moyize le Aron kahe kahe, ma ke sha hɛ: «Nde jaɗafa 'ya sha Shala Mahwətə ta ŋayɛ ba'a sha gheyɛ le ghəa ŋayɛ!

¹⁷Kelemte mə jaɗafa ta ɗa te wənəa ŋayɛ tsetsenya ɓiyitsa. Səkwə mə Shala Mahwətə ta ŋayɛ kezha hendemte ndiremi nya dzawe nya ŋkɛ cakeɗake yitea 'ya.»

¹⁸Pa Moyize slənyɛ yitea Farawon ba'a səkwəte Mahwətə.

¹⁹Tagha ne, pa Mahwətə vɛke sefə se laka ŋkwa kepəkwə ta veci. Pa sefəa shɛ fəmte dzale kabeteyi kwa ndərəa ghwəvərə. Ketene dzale ya kwetɛŋe te hɛɗia Ɛzhipte we.

²⁰Ama pa zhɛrete nda mehele ntɛaŋe ntɛaŋe ke Farawon nya keɗema pele ka Israyɛl kaslə.

²¹Ma ke Mahwətə sha Moyize: «Kafete dzeve ta ŋa yitea ghweme! Nza hɛɗia Ɛzhipte bətə mbe ŋkwesle, ŋkwesle nya nza mbeli kakwaɗakɛ.»

²²Pa Moyize kafete dzeve yitea ghweme. Tagha gɛ, pa ŋkwesle nya zhikwətəkwə menete geva kahɛ mahekene mbe Ɛzhipte.

²³Ma mbe hɛ nyi mahekene nyi ne, kanakɛ ghəa nci ka Ɛzhipte we, yayata wəndə kanza ki ghɛa ŋkɛ. Ama hɛɗi nya nza ka Israyɛl te ne, waŋe ŋkwa.

²⁴Daŋe Farawon sha Moyize, ma ke shɛ: «Wərə yɛ kalə kadzeghe nda melɛ ke Mahwətə. Wərə yɛ kalə le mbeli nyi ki ghɛa ŋayɛ. Deke timɛtia ŋayɛ, kwia ŋayɛ ba'a yɛ sla ta ŋayɛ ka tenza teke.»

²⁵Ma ke Moyize zhɛnete: «Gha le ghəa ŋa nde teŋka n'yɛ wəshi keseɗa nyi tedzeghe nda melɛ kejikə ghə ba'a melɛ kwa tere tere n'yɛ le ke Shala Mahwətə ta n'yɛ na?

²⁶Zhɛne ne, le wəshi keseɗa ta n'yɛ telə ghen'yɛ. Wəsə keseɗa ta n'yɛ shɛ katetene teke we. Kwa nza ŋkɛ ne, hwa hɛ tekese wəshi n'yɛ kezha dzeghe nda melɛ ke Shala Mahwətə ta n'yɛ. Ama nda tentsehe n'yɛ tagha ne, keɗepe nyi tedzeghe nda melɛ n'yɛ le hɛ ghen'yɛ we.»

²⁷Ama pa Mahwətə zhɛrete nda mehele ntɛaŋe ntɛaŋe ke Farawon nya keɗema pele hɛ kaslə.

²⁸Ma ke sha Moyize: «Jive ŋa! Ntsehwele yitea zhɛne kadzawa kema ta ɗa! Ma te veci nya zhɛne na kase ne, mbəhə temte na!»

²⁹Ma ke Moyize zhɛnete: «Kala nya gezete nya na ne, katezhɛne 'ya kadzawa kema ta ŋa we.»