Read kapsiki Shave 13 Bible Online

Shave 13 - kapsiki bible

Shave 13

¹Ma ke Mahwətə sha Moyize:

²«Veyi ɗa yayata tezhɛa wəzege nya hwa ka Israyɛl tekeleke. Kaŋa ɗa nza tezhɛa wəndə ŋelɛ ba'a tsəməa wəsə keseɗa.»

³Ma ke Moyize sha mbeli: «Zəzəte mə hɛ nya fəakave ŋayɛ nya Mahwətə mbe Ɛzhipte mbe mava, kwa nza ŋkɛ le berete ta ŋkɛ fəakave ŋayɛ ŋkɛ. Ma te vecia shɛ ne, katezeme pɛaŋe nya nza tenjɛne hwe yɛ we.

⁴Ɓeshi nya shave yɛ, te terea Abib.

⁵Te terea shɛnyɛ temene gəsəkəa shɛ yɛ keva keva, vəa ŋkwa nya tefəghe ŋayɛ Mahwətə kadzete hɛɗia ka Kanan, ka Hɛt, ka Amor, ka Hava ba'a ka Zhɛbəs. Gheŋkɛ hɛɗi nya meɗeyi nda ŋkɛ ke ka shihɛ ŋayɛ kave ŋayɛ, hɛɗi nya hwɛ yɛ ŋ'wa le yɛməa mze te.

⁶Kahɛ mberefaŋe ne, pɛaŋe nya ɗema tenjɛne hwe yatezeme yɛ. Ma te kwa mberefaŋe ta hɛ ne, katemene nda gəsəkə yɛ ke Mahwətə.

⁷Ma mbe hɛa shɛhɛ ne, katezeme pɛaŋe nya nza tenjɛne hwe yɛ we. Ma te hɛɗia ŋayɛ pɛtɛ ne, yagha mbeli katesləyi pɛaŋe nya nza tenjɛne hwe, ya tenjɛne ŋkɛ.

⁸Ma hwa gəsəkəa shɛ ne, ma pe yɛ sha tencɛ nda zeweve ta ghena nya ke ŋwalea ŋayɛ: ‹Ma nda mene n'yɛ kala nya ne, tewəmbəreke wəsə nya menete n'yɛ Mahwətə, te veci nya shave n'yɛ mbe Ɛzhipte.›

⁹Ma gəsəkəa shɛ ne, kawəsə keve ŋayɛ zəzə, kala lamba nya te dzeve ta ŋayɛ keɗema nya mɛa kema ta ŋayɛ tenza ŋkɛ sha gheyɛ. Gheŋkɛ nde teve ŋayɛ zəzə kezlape wəsə mahalegəa Mahwətə, kwa nza ŋkɛ gheŋkɛ nde fəakave ŋayɛ shave mbe Ɛzhipte te zlaɓa ta berete ta ŋkɛ.

¹⁰Keva keva teya gwezla nyi yɛ, te veci nya kenteyi geva.»

¹¹Ma ke Moyize sha mbeli ɓiyitsa: «Ma vəa ŋkwa nya tefəghe ŋayɛ Mahwətə kadzete hɛɗia Kanan ba'a nya tendeke ŋayɛ ŋkɛ kala nya meɗeyi nda ŋkɛ ke ka shihɛ ŋayɛ ba'a ke gheyɛ ne,

¹²pa yɛ fəave nda tezhɛa ŋwalea ŋayɛ pɛtɛ ba'a tsəməa ŋwalea wəshi keseɗa ta ŋayɛ pɛtɛ.

¹³Ama kaŋa tsəməa wəzege ta kwara ne, pa yɛ mbeɗeyi zhɛgwəa təmə keɗema zhɛgwəa kwe te ŋkwa ŋkɛ, keɗema pa yɛ ŋkwapemte tsaraka ta ŋkɛ. Ama kaŋa tezhɛa ŋwalea ŋayɛ ne, pa yɛ mbeɗeke hɛ.

¹⁴Ma kete'yɛwe ŋwalea ŋayɛ va gheyɛ te kwete hɛ: ‹Yitea wa mene mbeli kala nya wa?›, ke hɛ ne, ma pe yɛ sha tezhɛne nda ke hɛ: ‹Te zlaɓa ta berete ta ŋkɛ fəakave n'yɛ Mahwətə mbe Ɛzhipte, hɛɗi nya se n'yɛ kaka mavashi mbe.

¹⁵Ma kwa ɗema Farawon kapele n'yɛ kaslə ne, pa Mahwətə mpəmte tezhɛa ŋwalea ka Ɛzhipte, tsagha tsəməa ŋwalea wəshi keseɗa. Vatse nda dzeghe nda melɛ n'yɛ ke Mahwətə le tsəməa ŋwalea wəshi keseɗa, ama tezhɛa ŋwalea n'yɛ ne, mbeɗe mbeɗe hɛ ghen'yɛ.›

¹⁶Ma melɛ nyi ne, kawəsə keve ŋayɛ zəzə hɛ, kala lamba nya te dzeve ta ŋayɛ keɗema nya mɛa kema ta ŋayɛ tenza hɛ. Ghenci ka tezəzə ŋayɛ nahe Mahwətə kefəakave ŋayɛ shave mbe Ɛzhipte te zlaɓa ta berete ta ŋkɛ.»

¹⁷Ma kwa pelakɛ ka Israyɛl Farawon kaslə ne, kese Shala kapele hɛ kakele hweŋkwa ta ka Filisti, ya tsemanyɛ nza ŋkɛ kata kata we. Ma ke sha ŋa ŋkɛ: «Kateghazlənə mbeli nyi ba'a katezhɛre geva hɛ kadzembe Ɛzhipte ketenakɛ mpa hɛ.»

¹⁸Vatse wetəlighe hɛ ŋkɛ laka ɓerama dzawa laka ndərəa ghwəvərə. Kewəvəsə kewəvəsə kala mbeli nyi kehite geva yitea mpa same ka Israyɛl kwa Ɛzhipte.

¹⁹Pa Moyize fəte 'yɛ'yɛa Zhozɛf, kwa nza ŋkɛ ma ke sha ka kesaka yitenyɛ: «Ghəpə yite we, katese Shala kakemane ŋayɛ. Zemete ɗa mə kafela kezha dzeme yɛ le 'yɛ'yɛa ɗa.»

²⁰Cape ka Israyɛl shave mbe Səwkot kalə kamɓe cɛ lekwesa ta nci mbe Ɛtam nya mɛa ɓerama.

²¹Mahwətə le ghəa ŋkɛ ya te kema ta nci. Ma heveci ne, te kema ta nci ŋkɛ mbe geɗeɗe ta meləkwə ləkwə kezha ncɛ nda hweŋkwa ke hɛ, ma heviɗi ne, te kema ta nci ŋkɛ mbe geɗeɗe ta ghwə kezha waŋe nda ŋkwa ke hɛ. Ma tsagha gɛ, wərə ka Israyɛl kadzeghwa viɗi le veci.

²²Ma geɗeɗe ta meləkwə ləkwəa ghwə nya hevecia shɛ ba'a geɗeɗe ta ghwə nya heviɗia shɛ ne, kaslə hɛ te kema ta nci we.