Read kapsiki Shave 15 Bible Online

Shave 15 - kapsiki bible

Shave 15

¹Ntake yɛ Moyize le ka Israyɛl kagha nda cimə ke Mahwətə kala nya: Yawa! 'Ya kagha nda cimə ke Mahwətə, nahe ŋkɛ kencɛte berete ta ŋkɛ, nahe ŋkɛ kebeteyi gədəwəa lɛmə ba'a mbeli nyi kezleɗe hɛ kwa ndərə!

²Mahwətə ya kaberete ta ɗa ba'a kaciməa ɗa, gheŋkɛ ya kande mbele ɗa. Gheŋkɛ ya kaShala ta ɗa, 'ya katsahe ŋkɛ. Gheŋkɛ ya kaShala ta yiteyɛ ɗa, 'ya kazlape kwelea ŋkɛ.

³Mahwətə ya kakatsala ka sewajɛ. Tserame nda nza sləa ŋkɛ kaMahwətə.

⁴Pa beteyi wəmata gədəwə ba'a ka sewajɛa Farawon kwa ndərə. Bətə ka katsala ka sewajɛa ka Ɛzhipte kwa ndərəa ghwəvərə.

⁵Bətə hɛ kwa zeweve ta yɛmə kala yɛ pelɛ, nahe ndərə kezhiɓəaghe geva kənəa hɛ.

⁶Mahwətə, wa nya berete mbe dzeve kwa zeme ta ŋa wa! Gheŋkɛ nde ncɛncɛhwemte ka ghema.

⁷Kaganda nza na wəbake! Gha nde mpə ka ghema ta ŋa kadzete hɛɗi. Ma kepelakɛ ghwə ta hwepe wənəa ŋa na ne, hɛmɗɛke tere ka ghema ta ŋa kala vegheme.

⁸Va sefə nya keseyi mbe ŋshia ŋa ne katsene geva yɛmə, kaŋa geva gaŋkeɓe ta yɛmə kala zli, kakeɓe yɛmə kwa zeweve ta ndərə.

⁹Ma ke ka ghema ta n'yɛ: «Hwɛ ɓəmə kwa sebe ta nci, katekekave hɛ gheɓəmə. Katenehe wəshia nci gheɓəmə, za ma ke nyi zəzəte mə. Katenteɗe kafayɛ gheɓəmə, katekese hɛ gheɓəmə.»

¹⁰Ama gha Mahwətə, kwa zhɛnete mpi na ne, pa yɛmə zhiɓəaghe geva kənəa hɛ! Pa hɛ beteyi geva kala lɛ kwa zeweve ta ndərə nya lɛame.

¹¹Mahwətə, nyama hwa kweci shala ya kala gha wa? Wa ya kala gha nya nza zləvəa ŋkɛ tekeleke, nya ghazlənə mbeli va slene ta ŋkɛ ba'a nya kemene wəshi meŋele wa?

¹²Ma kwa kafete dzeve kwa zeme na ne, nahe hɛɗi kendahwe mbeli nyi kekeka n'yɛ.

¹³Nahe na kembelete mbelia ŋa! Kabeghe hɛ na le ɗe, kancɛ nda hweŋkwa kedzete ŋkwa nya nza na berete ta ŋa ke hɛ.

¹⁴Ma kwa fa ghena shɛ kweci hwelefefi ne, ntake hɛ kabare bare: Kwetɛ kwetɛŋe mehele ta ka Filisti va ghazlənə,

¹⁵nahe mbeli nyi te ghə mbe Ɛdom kedakenji, kwerɗake mehele ta mbeli nyi te ghə mbe Mowab, nahe geva ta ka Kanan kempənji.

¹⁶Ghazlənə nya wəba ya mbe hɛ. Va berete ta ŋa nya kese kənəa hɛ ne, tikə tikə hɛ nzanji kala yɛ pelɛ nda jivenji mbelia ŋa Mahwətə, mbeli nyi mbeleke na.

¹⁷Tsetsenya ne, beghe yabeghe hɛ na kadzeme ghweme ta ŋa kezha nza pelɛ. Mahwətə, nahe na kehite ŋkwa kezha nza hɛ te, gha le ghəa ŋa nde ŋate ŋkwa nya keveyi geva shɛ tekeleke Mahwətə.

¹⁸Mahwətə, gha ya kameghe kaghala ghala!

¹⁹Ma kwa dzawa ndərə yɛ gədəwə, yɛ wəmata gədəwə ba'a ka zleɗe gədəwəa lɛməa Farawon ne, nahe Mahwətə kezhiɓəaghe yɛmə kənəa hɛ. Ama ka Israyɛl le ŋa nci ne, nahe hɛ kejivenji te ndaleghe kwa keghwele ghwele.

²⁰Tagha gɛ, laŋe kwa mɛ ŋkwa Miriyam, wəzha ta meghekɛa Aron te dɛŋwəa nta. Cape mia pɛtɛa ka Israyɛl kwa sebe ta nta le wetse yitea dɛŋwə.

²¹Ma ke Miriyam sha cimə ke hɛ: «Gha nda mə cimə ke Mahwətə, nahe ŋkɛ kencɛte berete ta ŋkɛ. Nahe ŋkɛ kebeteyi yɛ gədəwə ba'a ka zleɗe gədəwəa lɛmə kwa ndərə!»

²²Cape yɛ Moyize le ka Israyɛl slə mɛa ndərəa ghwəvərə kalə laka ɓerama ta Shəwr. Hɛ mahekene menete hɛ kadzeghwa te ɓerama kaɗema kesləyi yɛmə.

²³Ma kwa ntsehe hɛ mbe Mara ne, kashɛ hɛ sa yɛmə nya mbe, va nya nza nde 'yaghwake we. Se tagha se sləa Mara, geze ta ŋkɛ “'yaghwa”.

²⁴Ntake mbeli kandəghwə ndəghwə kənəa Moyize, ma ke hɛ shɛ: «Wa yatesa ghen'yɛ wa?»

²⁵Pa Moyize səkwəte Mahwətə nya kencɛte nda kwete təkwə. Fɛke Moyize neghehwe hwa yɛmə, tagha ne, pa yɛmə zhɛrenyɛ kayɛmə kesa. Tagha ndeke nda wəshi mahalegə ba'a wəshi keshi Mahwətə ke ka Israyɛl, tagha dzeghakɛ hɛ ŋkɛ ɓiyitsa.

²⁶Ma ke sha hɛ: Ma keyɛte ɗa fete yɛ kaganda, 'ya Shala Mahwətə ta ŋayɛ laka mene wəsə nya tiɗiɗi kwa kema ta ɗa, ma keveyite sleme yɛ yitea ghena nyi gezeke 'ya ba'a kemenete slene yɛ le wəshi mahalegəa ɗa ne, kateve kwete 'ya hwa zereghwe nyi vate nyi 'ya te ka Ɛzhipte te gheyɛ we. Kwa nza ŋkɛ ne, 'ya ya kaMahwətə nya kembe ŋayɛ.

²⁷Kwa sebe ta ŋkɛ, hwa'a ka Israyɛl mbe Ɛlim. Tagha ne, ɗasle meŋe bakeghəmbe ba'a peha mberefaŋe ya shɛ. Pa hɛ nzanji tagha terasle yitea yɛmə.