Read kapsiki Shave 16 Bible Online

Shave 16 - kapsiki bible

Shave 16

¹Cape pɛtɛa ka Israyɛl slənji mbe Ɛlim. Ma te kwa meŋe mcɛfeghəmbe ta hɛ mbe tere kwa bake kwa sebe ta shave ta nci mbe Ɛzhipte ne, hwa'a hɛ te ɓerama ta Sin, kwelɛ yɛ Ɛlim le ghweme ta Sinay.

²Ma te ɓerama shɛ ne, ntake pɛtɛa ka Israyɛl kandəghwə ndəghwə kənəa yɛ Moyize le Aron.

³Ma ke hɛ: «Megela ma mpəmte n'yɛ Mahwətə mbe Ɛzhipte, vəa ŋkwa nya nza n'yɛ rəkwə yitea yɛ shaga ta slia n'yɛ, vəa ŋkwa nya nza n'yɛ behe behe va wəshi kezeme, kenya fəke n'yɛ yɛ kase kampə teke te ɓerama nya va ma!»

⁴Ma ke Mahwətə gezete nda ke Moyize: «'Ya katebete ŋayɛ wəshi kezeme sawa pelɛ ghweme. Keveci keveci teshave mbeli kafə gare zeme ta nci. Ma tsetse ne, 'ya katedzeghe ŋayɛ kezha newe kenza nde kahawe yɛ va wəsə mahalegəa ɗa.

⁵Ma te kwa ŋkwaŋe ta hɛ, vəa ŋkwa nya teta wəshi kezeme nya fəke yɛ yɛ ne, katekemave yɛ bake zhigə za ma ke nya te kweci hɛ.»

⁶Ma ke yɛ Moyize le Aron sha ka Israyɛl: «Ma hetɛhwɛɗi nya ne, kateɗepete yɛ Mahwətə nde fəakave ŋayɛ mbe Ɛzhipte.

⁷Hendɛ masheke ne, katenewe zləvəa Mahwətə yɛ, kwa nza ŋkɛ ne, nahe ŋkɛ kefate ŋayɛ kandəghwə ndəghwə te ghəa ŋkɛ. Wa ŋkɛ n'yɛ nda ndəghwə ndəghwə yɛ kənəa ghen'yɛ wa?»

⁸Ma ke Moyize zhɛkwa: «Kateve ŋayɛ sli Mahwətə hetɛhwɛɗi nya ba'a wəshi kezeme behe behe hendɛ masheke, kwa nza ŋkɛ nahe Mahwətə kefate kandəghwə ndəghwə yɛ kənə. Ma ghen'yɛ ne, wa ŋkɛ n'yɛ wa? Kənəa ghen'yɛ ndəghwə ndəghwə yɛ we, ama kənəa Mahwətə.»

⁹Kwa sebe ta ŋkɛ, ma ke Moyize sha Aron: «Geze nda ke pɛtɛa ka Israyɛl kase katsene geva kwa kema ta Mahwətə, kwa nza ŋkɛ nahe ŋkɛ kefate ndəghwə ndəghwə ta nci.»

¹⁰Ma vəa ŋkwa nya geze nda ghena Aron ke pɛtɛa ka Israyɛl ne, pa hɛ zhɛrete geva laka ɓerama. Taghanyɛ ne, pa zləvəa Mahwətə ncɛte mbe meləkwə ləkwə.

¹¹Ma ke Mahwətə sha Moyize:

¹²«Nahe 'ya kefate ndəghwə ndəghwə ta ka Israyɛl kənəa 'ya. Gezete nda ghena ta ɗa ke hɛ: ‹Ma hetɛhwɛɗi nya ne, katezeme sli yɛ, hendɛ masheke ne, behe behe tenza yɛ va wəshi kezeme. Ma tsagha gɛ, kateɗepete yɛ 'ya Mahwətə ya kaShala ta ŋayɛ.›»

¹³Ma hetɛhwɛɗi ne, katese yɛ fafele kame kənəa ghedəkwə pɛtɛ. Ma masheke ne, ncɛhwɛaɓɛ tenza mɛnɛ dzeyi yitea ghedəkwə.

¹⁴Ma vəa ŋkwa nya betenji mɛnɛ ne, katenza kweci wəshi keshɛnɛa shɛanɛanji kala kwacakelɛ dzeyi te hɛɗi.

¹⁵Pa ka Israyɛl nakɛ, ma ke hɛ kwelɛ ghəa nci: «Mane həw?», geze ta ŋkɛ, «Wa sləa nya wəsə wa?» Kwa nza ŋkɛ keɗepe wəsəa shɛ hɛ we. Ma ke Moyize zhɛnete nda ke hɛ: «Gheŋkɛ wəsə kezeme nya ndeke ŋayɛ Mahwətə.

¹⁶Wa nya ghena nya gezeke Mahwətə nya: ‹Pa yayata wəndə kafə gare zeme ta ŋkɛ. Dzeghe mə kwa wəsə nya nza wəndə gare zehwe. Fə mə kala kwalekwə zhɛme nya ki ghɛ.›»

¹⁷Pa ka Israyɛl menete tsagha. Pa kweci fəte kwele kwele, ɓɛhwɛ fəte kweci.

¹⁸Ama kwa dzeghete wəsə nya fəte hɛ hɛ ne, kenza kewəba va mbeli nyi kefəte kwele kwele ba'a dewə va nyi kefəte ɓɛhwɛ we. Gare zeme ta ŋkɛ fəte yayata wəndə.

¹⁹Ma ke Moyize sha hɛ zhɛkwa: «Yagha wəndə tetene kamasheke.»

²⁰Ama pa kweci mbeli ɗema fa ghena ta Moyize ba'a tenakɛ kamasheke. Pa nde yate menciɗi ba'a daɗənyɛ. Tagha gɛ, mɓɛke Moyize hwepete wənə va hɛ.

²¹Kala kiɗi ta ŋkwa ne, kafə yayata wəndə gare zeme ta ŋkɛ. Ma kaɓele veci ne, karɛɗɛ nya ketene.

²²Ma te kwa ŋkwaŋe ta hɛ ne, gare zeme kahɛ bake fə hɛ, bake kwa kwasayɛmə te yayata wəndə. Pa mbeli nyi te ghə se kagezete nda ke Moyize.

²³Ma ke sha hɛ: «Ghena shɛ yagezete Mahwətə. Hendɛ veci kezhɛne mpi, veci kezhɛne mpi nya keveyi nda geva tekeleke ke Mahwətə. Ta mə wəshi nyi ɗe yɛ kata, nefe mə wəshi nyi ɗe yɛ kanefe, wəmbəyi mə nya ketene kamasheke.»

²⁴Pa hɛ wəmbəyi wəsə kezemea shɛ kamasheke kala nya gezete Moyize. Kezazənə ba'a keyake menciɗi ŋkɛ we.

²⁵Ma ke Moyize: «Zeme mə wəshi kezemea shɛhɛ ɓeshi. Kwa nza ŋkɛ ma ɓeshi ne, veci kezhɛne mpi, vecia Mahwətə ya shɛ. Wəsə shɛ katekemave yɛ pelɛ te ŋwela we.

²⁶Kwa nza ŋkɛ kahɛ ŋkwaŋe ne, wərə yɛ kafə wəsə kezemea shɛ, ama kwa mberefaŋe ta hɛ ne, veci kezhɛne mpi ŋkɛ, katenza ŋkɛ shɛ we.»

²⁷Ma te kwa mberefaŋe ta hɛ ne, pa kweci ka Israyɛl shave kezha fə wəshi kezeme, ama wəsə shɛ kekemave hɛ we.

²⁸Ma ke Mahwətə sha Moyize: «Pa te nyama və teɗema yɛ kahawe va ghena nyi gezeke 'ya ba'a va wəshi mahalegəa ɗa wa?

²⁹Ɗepete mə megela, nahe 'ya kendeke ŋayɛ veci kezhɛne mpi kaveci kezhɛne mpi, vatse ndeke ŋayɛ wəsə kezeme 'ya te kwa ŋkwaŋe ta hɛ kaŋa hɛ bake. Ma te kwa mberefaŋe ta hɛ ne, nza yayata wəndə ki ghɛa ŋkɛ, wəndə shɛ kashave we.»

³⁰Ma tsagha gɛ, pa ka Israyɛl zhɛnakɛ mpi te kwa mberefaŋe ta hɛ.

³¹Pa ka Israyɛl hekate nda slə ke wəsə kezemea shɛ “kamane”. Yipə yipə ŋkɛ le kwacakelɛ ba'a kala ɗafa mze zeɗea ŋkɛ.

³²Ma ke Moyize: «Wa nya ghena nya geze Mahwətə nya: Viɗikɛ mə wəmbete le mane, kezha wəmbəyi nda ke hwelefefia ŋayɛ. Ma tsagha ne, katenakɛ wəshi kezeme nyi se 'ya kazeme ŋayɛ te ɓerama, kwa fəakave ŋayɛ 'ya mbe Ɛzhipte hɛ.»

³³Ma ke Moyize sha Aron: «Kelete wəmbete shɛ na viɗikɛ le mane. Kwa sebe ta ŋkɛ, ntareyi wəmbetea shɛ kwa kema ta Mahwətə kezha wəmbəyi nda ke hwelefefia ŋayɛ.»

³⁴Kala nya gezave nda Mahwətə ke Moyize ne, pa Aron ntareyi wəmbetea shɛ te kema ta palepa ta jikə geva kezha wəmbəyi geva ŋkɛ.

³⁵Va wəfaɗemsə menete ka Israyɛl kazeme mane, pa te ntsehe ta nci te hɛɗi nya nza mbeli, geze ta ŋkɛ, pa te ntsehe ta nci kwa ghala ta hɛɗia Kanan.

³⁶Ma mane nya gare zeme ta wəndə nya kavəghwə ne, yipə yipə ŋkɛ le bela ta wəsə kezeme kwetɛŋe mbe meŋe nya zeme mbeli ghalanza.