Read kapsiki Shave 18 Bible Online

Shave 18 - kapsiki bible

Shave 18

¹Pa Zhɛtro, nde dzeghe mɛlɛya ka Madiyan nya kamekwea Moyize fate wəshi nyi menete nda Shala Mahwətə ke Moyize ba'a ke ka Israyɛl, mbelia ŋkɛ. Pa fate tsema tsema fəakave hɛ Mahwətə mbe Ɛzhipte.

²Ki ghɛa Zhɛtro Sɛfora, wəzha ta ŋkɛ nya kamale ta Moyize. Nahe Moyize kebegheghe nda ke yitenyɛ,

³le ŋwale tezhilia nta nyi bake. Gɛrshom hekate nda slə Moyize ke nya katezhɛ, geze ta ŋkɛ, “Nde se se teke”, kwa nza ŋkɛ ma ke sha ŋa ŋkɛ: “Nde se se 'ya te hɛɗia kweci mbeli”.

⁴Ma nya kazera ne, Ɛliyɛzɛr hekate nda slə ŋkɛ, geze ta ŋkɛ, “Shala ya kande kemane ɗa”, kwa nza ŋkɛ ma ke sha ŋa ŋkɛ: Nahe Shala ta yiteyɛ ɗa kekemanakɛ ɗa, nahe ŋkɛ kembelemte ɗa va kafayɛa Farawon.

⁵Cape Zhɛtro le ŋwale ba'a male ta Moyize kalə shɛ te ɓerama nya nza ŋkɛ takwa yitea ghweme ta Shala.

⁶Ma ke Zhɛtro ghweneghe nda mɛ ke Moyize: «'Ya Zhɛtro, mekwea ŋa nde se sha gha le male ta ŋa ba'a ŋwale tezhilia nta bake.»

⁷Pa Moyize se shɛ, gwəɗəŋə ŋkɛ kwa kema ta ŋkɛ ba'a pa həməwəve ŋkɛ. Ma kwa sebe ta nya njiŋwemte ghə hɛ ne, cape hɛ kadzembe cɛ lekwesa ta Moyize.

⁸Pa Moyize ɓelate nda ke mekwea ŋkɛ tsema tsema menete nda Mahwətə ke Farawon ba'a ke ka Ɛzhipte tewəmbəreke ka Israyɛl. Pa gezete nda yaka nyi sahwe hɛ kwa hweŋkwa ba'a tsema tsema mbelete hɛ Mahwətə.

⁹Ntake Zhɛtro kazlama te pɛtɛa wəshi nyi menete nda Mahwətə ke ka Israyɛl kwa mbelemte hɛ ŋkɛ shave mbe dzeve ta ka Ɛzhipte.

¹⁰Tagha gɛ, ma ke: «Tsahe ɓəmə Mahwətə nya kembelemte ŋayɛ shave mbe dzeve ta Farawon ba'a ŋa ka Ɛzhipte!

¹¹Nahe 'ya keɗepe tsetsenya Mahwətə ya kwele ma ke kweci shala. Nahe ŋkɛ kencɛte vəa ŋkwa nya sa nda yaka ka Ɛzhipte ke ka Israyɛl.»

¹²Kwa sebe ta ŋkɛ ne, pa Zhɛtro nya kamekwea Moyize dzeghekɛ nda melɛ kwa tere tere ba'a melɛ kejikə geva ke Shala. Hwa'a yɛ Aron le mbelia jama ta ka Israyɛl kezha zeme wəsə kezeme kwa kema ta Shala, zlaɓe le mekwea Moyize.

¹³Ma te hendɛ ta ŋkwa ne, ntishɛ Moyize kezha meha ghwə te ghena nyi kwelɛ mbeli. Meghereŋe mbeli kwa kema ta ŋkɛ se masheke pa va tɛhwɛɗi.

¹⁴Ma kwa nakɛ wəshi nyi mene ŋkɛ kezha mbeli mekwea ŋkɛ ne, ma ke shɛ: «Wa wəsə nya mene nda nya na ke mbeli kala nya wa? Wa raberə mene slene nya na kwetɛŋe ŋa ba'a nza mbeli meghereŋe kwa kema ta ŋa, se masheke pa va tɛhwɛɗi wa?»

¹⁵Ma ke Moyize zhɛnete nda ke mekwea ŋkɛ: «Mbeli nyi se 'ya kezha fa zəzə ta Shala.

¹⁶Ma kenza ghena kwelɛ hɛ ne, kase hɛ sha 'ya: kasla fete 'ya te ghena nya kwelɛ hɛ ba'a kancɛ nda wəshi mahalegə ba'a ghena nyi gezete Shala 'ya ke hɛ.»

¹⁷Ma ke mekwea ŋkɛ shɛ: «Kehi kamene na kala nya we!

¹⁸Katedene ŋa na, tsagha mbeli nyi kese nyi sha gha. Keɗaŋeɗa slene nya va gha, kamenete na kwetɛŋe ŋa we!

¹⁹Tsetsenya ne, fa ghena ta ɗa! 'Ya katencɛ ŋa ntsehwele, pa Shala nza le gha: Nza kawəndə nya te kema ta mbeli kwa kema ta Shala, gha nde geze nda ghena nyi kwelɛ mbeli ke Shala.

²⁰Gha ɓiyitsa nde ncɛ wəshi mahalegə ba'a ghena nyi gezete Shala ke mbeli, nde ncɛ nda hweŋkwa ganyɛ ba'a slene ganyɛ ke hɛ.

²¹Ma kwa sebe ta ŋkɛ ne, tsehave mbeli ganji nyi kehawe va Shala, nyi keɗe kaganda, nyi keɗema mbəɗəkwə hwa mbeli shɛ na beteyi hɛ kambeli nyi te ghəa wəvəsəa mbeli slibə, mbeli gwəmsə, mbeli mcɛfemsə ba'a mbeli meŋe.

²²Mbelia shɛhɛ ka tesla fete te ghena nyi kwelɛ mbeli keveci keveci. Ghena nyi jama jama yatekele ŋa hɛ kase, ama ghenci le ghəa nci ka tesla fete te ghena nyi ɓɛhwɛ ɓɛhwɛ. Ma tsagha ne, kefe kefe tenza slene ta ŋa, va nya nehehwe na le hɛ.

²³Ma kemenete na kala nya ba'a kenza nde tsagha gezete ŋa Shala ne, katedene ŋa na we. Laka ŋa nci bela ne, ketseɓa tseɓa telə mbeli nyi sha ghɛ.»

²⁴Pa Moyize menete slene le ghena nyi gezete nda mekwea ŋkɛ.

²⁵Pa tsehave mbeli ganji hwa ka Israyɛl ba'a beteyi hɛ te ghəa wəvəsəa mbeli slibə, mbeli gwəmsə, mbeli mcɛfemsə ba'a mbeli meŋe.

²⁶Ghenci ka meha ghwə te mbeli keveci keveci. Ama ghena nyi dzawe dzawe ne, ke Moyize kele nda hɛ. Ghenci le ghəa nci ka sla fete te ghena nyi ɓɛhwɛ ɓɛhwɛ.

²⁷Pa Moyize beghakɛ mekwea ŋkɛ nya kezhɛneghe geva kalə sha hɛɗia ŋkɛ.