Read kapsiki Shave 19 Bible Online

Shave 19 - kapsiki bible

Shave 19

¹Ma te kwa ghate ta hɛ mbe tere kwa mahekene ghala shave ka Israyɛl mbe Ɛzhipte ne, hwa'a hɛ te ɓerama ta Sinay.

²Ma kwa slə hɛ mbe Refidim ne, pa hɛ ntsehe te ɓerama ta Sinay ba'a nzanji tagha. Tagha nzanji ka Israyɛl kwa kema ta ghweme ta Sinay.

³Tarame Moyize pelɛ kezha begeme le Shala. Pa Mahwətə hekakɛ sawa pelɛ ghəa ghweme, ma ke shɛ: «Wa nya ghena nya tegeze nda na ke hwelefe ta Zhakob nyi kaka Israyɛl nya:

⁴‹Nahe yɛ kenakɛ tsema tsema menete nda 'ya ke ka Ɛzhipte. Nahe yɛ kenakɛ tsema tsema fəke ŋayɛ 'ya kase teke dekwe yitea 'ya, kala nya fə ŋwalea ŋkɛ zele te wəmbə.

⁵Ma tsetsenya, kenza yɛ kafa ghena ta ɗa ba'a kaya jikə geva ta ɗa le gheyɛ ne, kambeli nyi keveyi geva kaŋa ɗa tenza yɛ hwa kweci hwelefefi. Kwa nza ŋkɛ ne, ŋa ɗa hɛɗi lema.

⁶Ma gheyɛ ne, kawəvəsəa kaka dzeghe Shala ba'a kahwelefe nya keveyi geva tekeleke tenza yɛ kezha slene ta ɗa.› Nya ya kaghena nya geze nda na ke ka Israyɛl.»

⁷Pa Moyize sawa ghedəkwə ba'a hekakɛ mbelia jama ta ka Israyɛl ba'a ɓelate nda ghena nyi gezete nda Mahwətə ke hɛ.

⁸Ma ke mbeli zhɛnete kanya kwetɛŋe: «Pɛtɛ temene wəshi nyi gezete Mahwətə ghen'yɛ.» Pa Moyize keleghe nda zhɛne ta nci ke Mahwətə.

⁹Ma ke Mahwətə shɛ ɓiyitsa: «Katesawa 'ya sha gha mbe ləmbə nya diŋwədi, yitea fa ɗa ka Israyɛl kageze ghena le gha ba'a yitea gezleŋema ghə hɛ va gha kaghala ghala.» Pa Moyize zhɛne kakeleghe nda zhɛne ta mbeli ke Mahwətə.

¹⁰Ma ke Mahwətə sha Moyize zhɛkwa: «Zhɛneghe geva kalə sha mbeli shɛ na geze nda ke hɛ kezha pɛmte geva wɛŋe ɓeshi ba'a hendɛ. Pa hɛ tsewemte lekwesa ta nci perə.

¹¹Pa hɛ hite geva vatahebezle, kwa nza ŋkɛ te vecia shɛ tesawa 'ya kadzete ghweme ta Sinay kanewe newe mbeli pɛtɛ.

¹²Katedzeghe yɛ ghala na dzeyi yitea ghweme ba'a katemeɗe nda na ke hɛ kezha ɗema hɛ kadzeme ghwemea shɛ, ya kahende nda geva. Yayata wəndə nya kehendave nda geva ne, katepesle ŋkɛ mbeli.

¹³Ya wəndə keɗema wəsə keseɗa ŋkɛ ne, katesərə mbeli teghweme we. Katekwaɗe wəndə nya kebezemte ghena mbeli le dzeve we, ama le pelɛ teŋkwape mbeli keɗema le have tehe ŋkɛ mbeli. Deke kweci mbeli ka tedzeme ghwemea shɛ kevɛte geva tereme.»

¹⁴Pa Moyize sawa pelɛ ghweme sha mbeli. Pa gezete nda ke hɛ kezha pɛ geva ta nci wɛŋe ba'a kezha tsewe lekwesa ta nci.

¹⁵Ma kwa sebe ta ŋkɛ, ma ke sha hɛ: «Hite mə geva megela kezha vatahebezle. Sərəakɛ mə ɓelahe le mia ŋayɛ.»

¹⁶Ma wakaka zeweve ta ghweme vatahebezle ne, pa gaka ta va, slesla ta va ba'a ləmbə nya diŋwədi menete geva pelɛ ghəa ghweme. Pa mbeli fate vɛ ta tereme le berete ɓiyitsa. Ma mbe ghedəkwə ne, ntake mbeli kabare bare va ghazlənə.

¹⁷Pa Moyize fəakame mbeli shave mbe ghedəkwə kezha hende nda geva ke Shala. Pa hɛ ghereŋenji yitea seɗa ta ghweme.

¹⁸Pɛtɛ ghweme ta Sinay zhiɓə va n'yia ghwə, va nya sawa Mahwətə hwa ghwə. Ntake n'yia shɛ kadzeme yitea ghweme kala n'yia ghwə nya wəba, pɛtɛa ghwemea shɛ kagaŋkəɗə.

¹⁹Pa vɛ ta tereme mtsehete geva le berete. Ma kegezete ghena Moyize ne, kazhɛne nda Shala mbe nehwene ta va.

²⁰Pa Mahwətə sawa kadzete Sinay, kadzawa ghəa ghweme. Tagha hekakɛ Moyize ŋkɛ kadzeme, tarame Moyize pelɛ.

²¹Ma ke Mahwətə shɛ: «Kwiɗi geze nda ke mbeli kezha ɗema hɛ kawədə geva kanewe ɗa. Ma keɗema ŋkɛ tsagha ne, kwele kwele nyi ketempə hwa hɛ.

²²Ya ka dzeghe Shala nyi kenza wərə kahende ɗa geva ne, nda hɛ kapɛmte ghəa nci wɛŋe, yagha 'ya kamaghe kənəa hɛ.»

²³Ma ke Moyize zhɛnete nda: «Kashɛ mbeli dzeme ghweme ta Sinay we, kwa nza ŋkɛ gha le ghəa ŋa nde gezete n'yɛ kave ghala yitea ghwemea shɛ ba'a kave tekeleke.»

²⁴Ma ke Mahwətə sha Moyize: «Zhɛneghe geva kadzawa, nda zhɛne na kasame le Aron. Ama mba ka dzeghe Shala ba'a mbeli kewədə geva kasame sha 'ya, yagha 'ya kamaghe kənəa hɛ.»

²⁵Pa Moyize zhɛnakawa geva sha mbeli ba'a gezete nda ke hɛ.