Read kapsiki Shave 2 Bible Online

Shave 2 - kapsiki bible

Shave 2

¹Pa kwete wəndə kwa yita ta Lɛvi wəmeve male kwa yita shɛnyɛ.

²Pa malea shɛ dzawa hwə ba'a yake wəzege teza. Ma kwa nakɛ nde kendeɗenyɛ wəzegea shɛ ne, pa wəfərəakɛ katere mahekene.

³Ma kwa ɗema nde mba kawəfərəakɛ ne, pa nde kelete kwaciga nya tsate mbeli yitea mahawa, pa nde zleraɗate ŋ'wa ba'a ɗəkə te. Kwa sebe ta ŋkɛ, pa veyi wəzegea shɛ kwa ba'a veyi ŋkɛ hwa ghwəvərə, mɛa hələbəa Nil.

⁴Pa wəzha ta meghekɛa wəzegea shɛ ghereŋenyɛ cakeɗake kezha newe wəsə nya ketemene nda geva.

⁵Kwa sebe ta ŋkɛ, cape wəzha ta Farawon kadzawa Nil kezha pɛ, vəa ŋkwa nya dzeghwa dzeghwa ta nci mi nyi kwa sebe ta nta dzeyi mɛa hələ. Dəkwə nde te kwaciga te tepe ta ghwəvərə, pa nde ghwenakɛ kwatera ta nta kalə kakele.

⁶Ma kwa ghwenemte nde ne, dəkwə nde te wəzege kanehwene. Pa helia nta zhɛte nda yite, ma ke le berete: «A wəzege ta ka Ɛbrə.»

⁷Ma ke wəzha ta meghekɛa wəzegea shɛ 'yɛwete va wəzha ta Farawon: «Kaɗe na kalə 'ya kazeleke male hwa mia ka Ɛbrə kezha sa nda ŋ'wa ke wəzegea shɛ na?»

⁸Ma ke zhɛnete nda: «E'e!» Pa wəzha shɛ lə kazeleke meghekɛa wəzegea shɛ.

⁹Ma ke wəzha ta Farawon sha malea shɛ: «Kelete wəzege nya shɛ na sa nda ŋ'wa kezha kelete ɗa ŋkɛ. Kateŋki ŋa zhɛme ta ŋa 'ya.» Laŋe malea shɛ kelete wəzegea shɛ kasa nda ŋ'wa.

¹⁰Ma kwa kele wəzege kewəbanyɛ ne, pa meghekɛ keleke nda ke wəzha ta meghe. Pa nde kelete kawəzege ta nta, ma ke: «Ma kwa nza ŋkɛ te yɛmə kelete 'ya ne, Moyize heka nda slə 'ya.»

¹¹Ma te kwete hɛ, kwa kelenyɛ Moyize ne, cape kalə kanewe ka menəhɛnyɛ, pa nakɛ slene berete nyi ndeke nda mbeli ke hɛ. Taghanyɛ ne, pa nakɛ kwete nde Ɛzhipte kaɗa kwete hwa ka menəhɛnyɛ nyi kaka Ɛbrə.

¹²Ma kwa nahe Moyize kaɗema wəndə tagha yite ne, pa peslekɛ nde Ɛzhipte, kalamte mbe ndaleghe.

¹³Ma kwa zhɛneke geva ŋkɛ kase te hendɛ ta ŋkwa, pa nakɛ ka Ɛbrə bake kampa. Ma ke sha wəndə nya nza fete ve: «Wa raberə ɗa menə ŋa na wa?»

¹⁴Ma ke zhɛnete nda: «Wa nde nteyi ŋa kameghe nya kemeha ghwə te ghen'yɛ wa? Gha ɗe kapesle ɗa kala nya peslekɛ nde Ɛzhipte na na?» Ma kwa nakɛ Moyize nahe mbeli keɗepete ghena shɛ ne, pa ghazlənənyɛ.

¹⁵Nahe Farawon le ghəa ŋkɛ kefate ghena shɛ, ntake ŋkɛ kazele kapesle Moyize. Ama pa Moyize hwɛnyɛ kalə kawəfərə te hɛɗia Madiyan. Pa ntishɛnyɛ mɛa kwete belageji.

¹⁶Ma nde dzeghe Shala ta ka Madiyan, Zhɛtro ne, mberefaŋe ŋwalea kwɛ ve. Hwa'a hɛ kezha gə yɛmə kadzawa ŋkwa kesa yɛmə ta yɛ timɛti le kwia yiteyɛa nci.

¹⁷Ama pa kweci ka ya wəshi se kaŋkamte ŋwalea kwɛa shɛhɛ. Tagha ne, pa Moyize yakɛ hɛ ba'a same nda yɛmə ke wəshia nci.

¹⁸Tewətelɛwe hɛ sha geva kalə sha yiteyɛa nci Zhɛtro, ma ke sha hɛ: «Wa raberə sheke ŋayɛ yɛ mba ŋkwa ɓeshi wa?»

¹⁹Ma ke hɛ zhɛnete nda: «Kwete nde Ɛzhipte nde yakɛ n'yɛ va ka ya wəshi, gheŋkɛ le ghəa ŋkɛ nde same nda yɛmə ke wəshia ɓəmə.»

²⁰Ma ke sha ŋwalea kwɛa ŋkɛ: «Tema wəndəa shɛ tse wa? Wa raberə ɗema yɛ hekake ŋkɛ kase teke wa? Kwiɗi mə kalə kaheka ŋkɛ yitea wəsə kezeme.»

²¹Pa Moyize yɛte kanza ki ghɛa wəndəa shɛ. Pa Zhɛtro ndeke nda wəzha ta ŋkɛ Sɛfora kamale.

²²Pa malea shɛ yake wəzege teza. Tagha, ma ke Moyize: «Ma kwa nza ŋkɛ kande se se 'ya te hɛɗi nya ne, kaheka nda slə 'ya kaGɛrshom, geze ta ŋkɛ, ‹Nde se se teke.›»

²³Temə kwele kwele kwa sebe ta ŋkɛ ne, mtiwə meghea ka Ɛzhipte. Ntake ka Israyɛl kaŋələvə ba'a katsa lewela mbe nza ta nci kaka mavashi. Pa nehwene ta nci ntsehe pelɛagha sha Shala.

²⁴Pa Shala fate nehwene ta nci ba'a zəzəte jikə geva nya menete ŋkɛ le Abraham, Izak ba'a Zhakob.

²⁵Pa betate ntsə te ka Israyɛl ba'a ncɛte nda ghəa ŋkɛ ke hɛ.