Read kapsiki Shave 21 Bible Online

Shave 21 - kapsiki bible

Shave 21

¹Ma ke Mahwətə mtsehete: «Wa nyi kweci ghena nyi tegeze nda na ke ka Israyɛl nyi:

²Ma vəa ŋkwa nya tepave nde Ɛbrə yɛ kamava ne, katenza ŋkɛ kamava kava ŋkwaŋe. Ma te kwa mberefaŋe ta va ne, waɗe hweŋkwa ve kezha slə kaɗema kaŋki wəsə.

³Ma kenza ŋkɛ kaghwəmezhi nda tepave mbeli kamava ne, kwetɛŋenyɛ ŋkɛ teslə. Ma kenza ŋkɛ male ya ve ne, hɛ le male ta ŋkɛ teslə.

⁴Ma kenza ŋkɛ wəndə nya kesleke ŋkɛ nde wəmave nda male, nda yake ŋwale tezhili keɗema ŋwalea kwɛ malea shɛ ne, mba nza yɛ malea shɛ le ŋwalea nta kaŋa wəndə nya kesleke ŋkɛ. Wəndəa shɛ kwetɛŋenyɛ nde teslə.

⁵Ma kegezete mava shɛ: ‹Kaɗe nde sleke ɗa le male ta ɗa ba'a ŋwalea ɗa 'ya, kaɗe 'ya kasərə hɛ kezha nza waɗe we›, ke ne,

⁶pa wəndə nya kesleke ŋkɛ keleke kadzawa kema ta Shala. Pa ghereŋeyi wəndəa shɛ mɛa gelembe keɗema dzeme vare seɗa ta gelembe. Tagha ne, katentsa nda sleme ŋkɛ le zhɛliɓə. Se mɛa vəa shɛ ne, kamava ta ŋkɛ tenza ŋkɛ kaghala ghala.

⁷Ma kepamte wəzha ta ŋkɛ wəndə kakwatera ne, kakemave nza nde waɗe kala ka mavashi we.

⁸Ma keɗema wəndə nya kesleke kaɗe kanza nde kamale ta ŋkɛ ne, pa sərəakɛ nda ke kwete wəndə kambeɗehwe. Hweŋkwa ve kezha pamte nda ke kweci hwelefefi we: mbəɗəkwə yamenete nda ŋkɛ tsagha.

⁹Ma kenza ŋkɛ ke wəzege ta ŋkɛ ndeke nda ŋkɛ kamale ne, kala wəshi nyi kehi kamene nda mbeli ke deghelɛshi temene nda ŋkɛ.

¹⁰Ma kewəmeve kwete male wəndə nya kesleke ne, mba ŋkɛ kentamte wəshi yitea nyi hi ŋkɛ kave nda ke kwa ghate: wəshi kezeme, yɛ lekwesa ba'a vəa ɓelahe.

¹¹Ma keɗema ŋkɛ ketseramete wəshi nyi mahekene nyi ne, wərə nde kanza waɗe kaɗema kaŋki wəsə.»

¹²Ma ke Mahwətə sha Moyize zhɛkwa: «Ma wəndə nya kempave wəndə kamte ne, katepesle ŋkɛ mbeli.

¹³Ama keɗema ŋkɛ keŋsleyi nda ghweɓe nda nza ŋkɛ kamazeme nya ɗema Shala kefɛake ne, wərə wəndə nya ketsave kelɛhe kalə kawəfərənyɛ te ŋkwa nya tencɛ ŋa 'ya.

¹⁴Ama kenza ŋkɛ va zlɛ peslekɛ wəndə ŋkɛ le ntsehwele ne, katekese ŋkɛ yɛ kezha pesle ŋkɛ, ya gheŋkɛ wəfərənyɛ vare reghwetɛa ɗa.

¹⁵Ma wəndə nya keɗa yitenyɛ keɗema meghekɛ ne, katepesle ŋkɛ mbeli.

¹⁶Ma wəndə nya kekese wəndə kezha pamte keɗema kezha ve ki ghɛa ŋkɛ ne, nahe ŋkɛ kehi kapesle ŋkɛ mbeli.

¹⁷Ma wəndə nya keŋele yitenyɛ keɗema meghekɛ ne, nahe ŋkɛ kehi kapesle ŋkɛ mbeli.

¹⁸Ma kenza mbeli kampa, nda mpamte kwete wəndəa ŋkɛ kwete le dzeve keɗema le pelɛ kaɗema wəndə nyagha kemte, ama ŋgwape ŋkɛ te gezle,

¹⁹wərə ŋkɛ kasate te ŋkwa ba'a kateŋe te geta kashave te ŋwela ne, kapesle wəndə nya kempamte mbeli we. Ama deke və nya menete ŋkɛ kaɗema kamene slene ba'a cɛdɛ kembe ŋkɛ yateŋki ŋkɛ.

²⁰Ma kempave mava ta ŋkɛ keɗema kwatera ta ŋkɛ wəndə le geta, nda mtenyɛ ŋkɛ te dzeve ta ŋkɛ ne, katewa nda dewa mbeli.

²¹Ama kenza wəndə mba le mpi kahɛ kwetɛŋe keɗema bake ne, kawa nda dewa mbeli we, kwa nza ŋkɛ ŋa ŋkɛ wəndəa shɛ.

²²Ma kenza zhili kampa nda tsəkwəte male nya le hwə hɛ, nda bereɗe nda malea shɛ, kaɗema kwete wəsə kezhɛte nda kwa sebe ta ŋkɛ ne, nda wəndə nya ketsave kelɛhe kaŋkikɛ wəsə nya gezete za nta kala nya mehate ghwə mbeli te.

²³Ama kemenete nda geva kwete wəsə nya dzawe ke malea shɛ ne, katewa mbeli te wəndəa shɛ: mpi te mpi,

²⁴ntsə te ntsə, slene te slene, dzeve te dzeve, seɗa te seɗa,

²⁵zhia ghwə te zhia ghwə, zhi te zhi, balema te balema.

²⁶Ma kwa ɗa mava ta ŋkɛ keɗema kwatera ta ŋkɛ wəndə, nda ntsamte ntsə ŋkɛ kwa ne, pa pelakɛ waɗe kadzete ntsə ta ŋkɛ.

²⁷Ma ketsamte slene ŋkɛ kwa ne, pa pelakɛ waɗe kadzete slene ta ŋkɛ.

²⁸Ma kepeslekɛ za keɗema male mca le tereme ne, kateŋkwape ŋkɛ mbeli le pelɛ. Katezeme slia ŋkɛ mbeli we. Ama kanza fete va wəndə ke gheŋkɛ we.

²⁹Ama kenza nde nahe mca shɛ keseneve n'yi ŋkwa le tereme, nda ɗema wəndə ke gheŋkɛ kaya kwa gezete nda mbeli, ma kepeslekɛ ŋkwa mca shɛ ne, kateŋkwape ŋkɛ mbeli le pelɛ, katepesle wəndə ke gheŋkɛ mbeli perə.

³⁰Ma kegezete mbeli kaŋki kelɛhe kezha mbele mpia ŋkɛ ne, nda ŋkɛ kaŋkikɛ wəsə nya sləyi nda mbeli tserame.

³¹Ma kepeslekɛ wəzege teza keɗema wəzha makwa, mca le tereme ne, kakelɛhe nya kwetɛŋe tenza ŋkɛ.

³²Ma kepeslekɛ mava keɗema kwatera mca le tereme ne, pa wəndə ke mca ŋkikɛ nda dəɓərəa mze kwa tɛawetɛa mahekenemsə ke wəndə ke mava, ba'a ne, kateŋkwape mca shɛ mbeli le pelɛ.

³³Ma keghwenemte keɗema kelate belageji wəndə, nda ɗema ŋkɛ kevame wəsə mɛ, ma keteɗenyɛ mca keɗema kwara kadzawa ne,

³⁴pa wəndə ke belageji ŋkikɛ nda cɛdɛ ke wəndə ke wəsə keseɗa. Ama kaŋa ŋkɛ nza wəsə keseɗa kwa mte mte.

³⁵Ma ken'yimte mca ta wəndə ŋa kwete wəndə le tereme kamte ne, pa mbeli pamte mca nya mba teghweme, kwa sebe ta ŋkɛ, pa mbeli ke mcɛmcɛli nyi bake nyi nehehwe cɛdɛ ba'a mca nya kemte mte.

³⁶Ama nda nahe ŋkɛ keɗepe tsagha seneve n'yi mcɛmcɛli mca shɛ le tereme, nda ɗema wəndə ke gheŋkɛ kese kaya ne, pa wəndəa shɛ vate mca te ŋkwa nya kemte mte. Ama kaŋa ŋkɛ nza mca kwa mte mte zake.»

³⁷Ma ke ghərəve sla, təmə keɗema kwe wəndə nda henemte ŋkɛ keɗema nda pamte ŋkɛ ne, kateŋki sla ŋkɛ mcɛfe te sla, timɛti wəfaɗe te təmə keɗema kwi wəfaɗe te kwe.