Read kapsiki Shave 28 Bible Online

Shave 28 - kapsiki bible

Shave 28

¹Moyize, hekakɛ yɛ wəza meyɛ ŋa Aron le ŋwalea ŋkɛ Nadab, Abihəw, Ɛlazar ba'a Itamar. Katenehe hɛ na le kweci ka Israyɛl kezha mene ɗa slene ta dzeghe melɛ hɛ.

²Katetsa nda lekwesa ganji nyi keveyi geva tekeleke mbeli ke wəza meyɛ ŋa Aron.

³Ma kezha mene ta ŋkɛ ne, kategeze nda na ke ka ntsəzlə lekwesa nyi ndeke nda caŋa 'ya ke hɛ, ghenci ka tentsəzlə lekwesa nyi teseɗe Aron vəa ŋkwa nya teve geva dzeve kənə ba'a vəa ŋkwa nya temene ɗa slene ta dzeghe melɛ ŋkɛ.

⁴Wa nyi tsetse tenza lekwesa shɛhɛ: wəsə kwa tsa tsa nya slape kwa hate, lekwesa nya kənəa rewebe, rewebe, lekwesa kwa tsa tsa, zlave kepeɗe ghə ba'a hətə nya hwa hwə. Ghenci yateseɗe yɛ wəza meyɛ ŋa Aron le ŋwalea ŋkɛ kezha mene slene ta nci.

⁵Le shintia təmə nyi kefi fi le yirə kwa ndereme ndereme, kwa gheme ba'a kwa ghɛmɛ, le pawa nyi slɛahe slɛahe ba'a le pawa nyi kefi fi le mze kwa tere tere tetsa hɛ ka tsa lekwesa.

⁶Katetsa lekwesa nya kənəa rewebe ka tsa lekwesa le pawa nyi berete berete, welaɗe mbe shintia təmə nyi kefi fi le yirə kwa ndereme ndereme, kwa gheme ba'a kwa ghɛmɛ. Katetsa pawa nyi kefi fi le mze kwa tere tere hɛ te.

⁷Ma kezha hwepe lekwesa nya kənəa rewebe ne, katentsəzlə zewe mbeli bake laka yayata bela.

⁸Ma zewe nya dzeyi yitea lekwesa nya kənəa rewebe ne, kanya kwetɛŋe tenza ŋkɛ le. Katenegha mbeli le pawa nyi berete berete, welaɗe mbe shintia təmə nyi kefi fi le yirə kwa ndereme ndereme, kwa gheme ba'a kwa ghɛmɛ. Pawa nyi kefi fi le mze kwa tere tere yatetsa mbeli dzeyi te.

⁹Kwa sebe ta ŋkɛ ne, katenta pelɛ nyi ghemea ghemea nyi nza zləvə te mbeli bake ba'a katetsasle sləa ŋwalea Zhakob mbeli te hɛ:

¹⁰slə ŋkwaŋe te kwa ghate ta pelɛ, slə ŋkwaŋe te kwa bake, kala sawa ta nci kwa hwə.

¹¹Nde ɗepe tsehe pelɛ nde tetsasle sləa shɛhɛ kadzete pelɛ nyi bake nyi, kala nya tsehe lamba ta wəndə mbeli. Kwa sebe ta ŋkɛ ne, gheŋkɛ nde tendeɓe hɛ te ŋkwa nyi kefi fi nyi le mze kwa tere tere.

¹²Katehwepe pelɛ nyi bake nyi mbeli te zewe nyi te lekwesa nya kənəa rewebe, kezha ncɛ hwelefe ta Israyɛl nyi meŋe bakeghəmbe. Ma tsagha ne, katenza sləa nci te paslɛ paslɛa va Aron kwa kema ta Mahwətə. Ma 'ya le ŋa ɗa gɛ ne, katezaghə ŋayɛ 'ya we.

¹³Le mze kwa tere tere tenza ŋkwa keve pelɛ nyi bake nyi,

¹⁴katehwepe livə nyi le mze kwa tere tere nya wɛŋe mbeli bake te. Katendere hɛ yɛ kala mampə.

¹⁵Katetsa kwete wəsə nya helambaŋe kwa hate kezha meha ghwə ka tsa lekwesa le pawa nyi berete berete, welaɗe mbe shintia təmə nyi kefi fi le yirə kwa ndereme ndereme, kwa gheme ba'a kwa ghɛmɛ. Pawa nyi kefi fi le mze kwa tere tere yatetsa hɛ dzeyi te.

¹⁶Ma kwa gwaɓete geva nde ne, kanya kwetɛŋe tenza yɛ biya ta ŋkɛ le bezlea ŋkɛ, kadzeve kwetɛŋe te dzeve.

¹⁷Kazəɗə wəfaɗe terafe mbeli le pelɛ nyi nza zləvə te hɛ: ma kwa kwa ghate ta zəɗə ne, katenza pelɛ kwa ghɛmɛ, kwa rəghwə rəghwə ba'a kwa mede mede.

¹⁸Ma kwa kwa bake ta zəɗə ne, katenza pelɛ kwa gheme, kwa lɛa lɛa ghweme ba'a kwacaregesla.

¹⁹Ma kwa kwa mahekene ta zəɗə ne, katenza pelɛ kwa gatawəfa gatawəfa, kwa jiɓe jiɓe ba'a kwa ndereme ndereme.

²⁰Ma kwa kwa wəfaɗe ta zəɗə ne, katenza pelɛ kwa sleke sleke, kwa gheme gheme ba'a kwa nɛ nɛ. Katendeɓe yayata pelɛ mbeli te ŋkwa nya kefi fi le mze kwa tere tere.

²¹Ma te yayata pelɛa shɛ ne, katetsasle sləa kwete hwa ŋwalea Zhakob nyi meŋe bakeghəmbe mbeli, kala nya tsehe lamba ta wəndə mbeli. Katenza pelɛa shɛhɛ te ŋkwa hwelefefia Israyɛl nyi meŋe bakeghəmbe.

²²Ma kezha wəsə nya kwa hatea shɛ ne, katevɛsə livə mbeli bake yitea mze kwa tere tere nya wɛŋe, kendere ndere kala mampə,

²³tsagha takase bake le mze kwa tere tere kezha hwepe mɛa sleme nyi pelɛghə va wəsə nya kwa hatea shɛ.

²⁴Katendɛaŋe livə nyi bake nyi le mze kwa tere tere mbeli te takase nyi bake nyi te wəsə nya kwa hate.

²⁵Katehwepe kweci mɛa livə nyi bake nyi mbeli te ŋkwa nyi bake nyi kefi fi le mze kwa tere tere te zewe nyi te paslɛ paslɛa va lekwesa nya kənəa rewebe, kezha nza wəsəa shɛ kwa hate.

²⁶Katevɛsə kweci takase mbeli bake le mze kwa tere tere kezha hwepe mɛa sleme nyi kwayite va wəsə nya slape kwa hate, mbe hwə mbe hwə va lekwesa nya kənəa rewebe.

²⁷Katevɛsə kweci takase mbeli bake le mze kwa tere tere kezha hwepe kwake kwake va zewe nyi te lekwesa nya kənəa rewebe, laka ŋkwa nya kwa kema, te ŋkwa nya ntsəzləyi hɛ mbeli. Samese ke zewe nya dzeyi hwa lekwesa nya kənəa rewebe tehwepe takasea shɛhɛ mbeli.

²⁸Katejikə takase nyi te wəsə nya slape kwa hate mbeli le nyi te lekwesa nya kənəa rewebe le zewe kwa ndereme ndereme. Ma tsagha ne, kənəa zewe nya dzeyi yitea lekwesa nya kənəa rewebe tenza wəsə nya slape kwa hate ba'a yitea ɗema ŋkɛ kagaŋkəɗə te.

²⁹Ma vəa ŋkwa nya tedzembe ŋkwa nya keveyi geva tekeleke Aron ne, kwa hate ta ŋkɛ tenza wəsə kemeha ghwə nya nza sləa hwelefefia Israyɛl te. Ma tsagha ne, katezaghə mbelia ɗa 'ya, 'ya Mahwətə tɛape we.

³⁰Ma gha gɛ Moyize, katebete yɛ Əwrim le Təwmim na kwa wəsə kemeha ghwə nya slape kwa hate, yitea nza hɛ kwa hate va Aron vəa ŋkwa nya tedzawa kema ta Mahwətə ŋkɛ. Ma tsagha ne, keveci keveci tenza wəsə kemeha ghwə nya nza sləa hwelefefia Israyɛl te kwa hate va Aron kwa kema ta Mahwətə.

³¹Ma kwa sebe ta ŋkɛ ne, katetsa rewebe nya teseɗe lekwesa nya kənəa rewebe Aron kənə mbeli le shintia təmə nyi kefi fi le yirə kwa ndereme ndereme.

³²Ma kezha seɗe ne, katesla welɛ mbeli te tepe ve. Katetsa ŋkwa nya dzeyi yitea welɛa shɛ mbeli kezha ɗema nde kaŋkwahe.

³³Katetsa yɛ ya ta kwakweme mbeli dzeyi yitea rewebea shɛ le shintia təmə nyi kefi fi le yirə kwa ndereme ndereme, kwa gheme ba'a kwa ghɛmɛ. Katemene ciŋəci nyi le mze kwa tere tere mbeli dzeyi yite ɓiyitsa.

³⁴Katembeɗe yɛ ya ta kwakweme mbeli le ciŋəci nyi le mze kwa tere tere dzeyi yite.

³⁵Kateseɗe rewebea shɛ Aron vəa ŋkwa nya dzeghe melɛ ŋkɛ. Ma kenza ŋkɛ kase kadzawa kema ta ɗa mbe ŋkwa nya keveyi geva tekeleke ba'a kenza ŋkɛ kashave ne, katefa gaka ta ciŋəci mbeli. Ma tsagha ne, katenza ŋkɛ mbasa mbasa va mte we.

³⁶Katevɛsə kwete wəsə kala ghwə ta wəfe mbeli yitea mze kwa tere tere nya wɛŋe, “Wəsə nya keveyi geva tekeleke kaŋa Mahwətə” ke mbeli sha tetsasle te, kala nya tsasle lamba ta wəndə mbeli.

³⁷Katehwepe wəsəa shɛ mbeli le zewe kwa ndereme ndereme te zlave kepeɗe ghə nya keveyi geva tekeleke mɛa kema.

³⁸Mɛa kema ta Aron tenza wəsəa shɛ vəa ŋkwa nya se ŋkɛ kadzawa kema ta ɗa, 'ya Mahwətə. Ma te zlaɓa ta wəsəa shɛ ne, kateyɛ wəshi nyi tefə ɗa ka Israyɛl 'ya, ya hɛ menete fete le fə ɗa hɛ kase.

³⁹Ma kezha Aron ne, katetsa lekwesa pawa, wəsə nya yitea ghə le pawa ba'a zewe nya hwa hwə mbeli.

⁴⁰Ma kezha ŋwalea Aron perə ne, katetsa lekwesa ganji, zewe nyi hwa hwə ba'a yɛ zlave kepeɗe ghə kawəshi kencɛ zləvəa nci mbeli.

⁴¹Ma gha gɛ Moyize, kateseɗe nda lekwesa shɛhɛ ke yɛ wəza meyɛ ŋa Aron le ŋwalea ŋkɛ, katesheke n'yi na kənəa ghəa nci ba'a katedape nda slene ta ɗa na te dzeve ke hɛ. Kala nya ne, kateve hɛ na tekeleke kezha mene ɗa slene ta dzeghe melɛ.

⁴²Ma kezha wəfərə zeweve ta nci ne, katetsa nda kwampi mbeli ke hɛ le pawa slə yitea yitə hwa'a te basa.

⁴³Kateseɗe hɛ yɛ Aron le ŋwalea ŋkɛ vəa ŋkwa nya tedzembe cɛ lekwesa kebegeme geva hɛ keɗema vəa ŋkwa nya tehende nda geva hɛ ke reghwetɛ kezha mene ɗa slene mbe ŋkwa nya keveyi geva tekeleke. Ma tsagha ne, katenza hɛ mbasa mbasa va mte, va nya se hɛ mederelaŋe we. Kawəsə mahalegə nya keɗema kazhɛre tenza ŋkɛ kezha yɛ Aron le hwelefefia ŋkɛ.