Read kapsiki Shave 29 Bible Online

Shave 29 - kapsiki bible

Shave 29

¹Wa nya tsetse temene na kezha ve yɛ Aron le ŋwalea ŋkɛ tekeleke kaka dzeghe Shala kezha slene ta ɗa: Katekese mca na kwetɛŋe ba'a gamea lɛmə nyi ɗema beze te bake.

²Le hə ne, kateta pɛaŋe nya ɗema tenjɛne hwe na, katehwaɗe ghwempe nya ɗema tenjɛne hwe na le n'yi ba'a kateta ɗafa kwalekwala nya ɗema tenjɛne hwe na le n'yi.

³Katebete hɛ na kwa kwaciga nya tekele na kadzembe ŋkwa nya keveyi geva tekeleke, kanya kwetɛŋe le mca ba'a gamea lɛmə nyi bake nyi.

⁴Katebeghe yɛ Aron le ŋwalea ŋkɛ na kadzemɛa cɛ lekwesa kebegeme geva ba'a katepɛ hɛ na le yɛmə.

⁵Kateseɗe nda lekwesa ta ŋkɛ nyi keveyi geva tekeleke na ke Aron: tɛagware, rewebe, lekwesa nya kənəa rewebe ba'a wəsə nya slape kwa hate nya tehwepe na te zewe nya seyi yitea lekwesa nya kənəa rewebe.

⁶Katepeɗe nda zlave na yitea ghə ba'a katehwepe lamba nya keveyi geva tekeleke na te zlavea shɛ.

⁷Kwa sebe ta ŋkɛ ne, katekele n'yi keve ŋkwa tekeleke na ba'a katesheke na kənəa ghəa ŋkɛ kezha ve ŋkɛ tekeleke.

⁸Kategeze nda na ke ŋwalea Aron kahende ŋa geva. Kateseɗe nda ŋa nci na tɛagware ke hɛ.

⁹Katehwepe nda zewe na hwa hwə ke hɛ ba'a katepeɗe nda zlave na yitea ghə ke hɛ. Kwa sebe ta ŋkɛ, kateve yɛ Aron le ŋwalea ŋkɛ na tekeleke kezha slene ta ɗa. Ma se mɛa vəa shɛ ne, kaka dzeghe ɗa melɛ tenza hɛ kaghala ghala.

¹⁰Katekese mca mbeli kase kadzemɛa cɛ lekwesa kebegeme geva. Katedape dzeve ta nci yɛ Aron le ŋwalea ŋkɛ kwa ghəa mca shɛ.

¹¹Katesla ghə na te mca shɛ kwa kema ta ɗa, mɛa ŋkwa kedzembe cɛ lekwesa.

¹²Katekele mimia ŋkɛ na, katefi na le wəzege ta dzeve kadzete tereme nyi te reghwetɛ. Kwa sebe ta ŋkɛ ne, katesheke mimi nya ketene na yitea reghwetɛ.

¹³Katekele merege nya kənəa wəshi nyi kwa hwə, bela ganyɛ ta mene ba'a yɛ ghwelese nyi bake le merege nya kənəa hɛ na. Katetere hɛ na pɛtɛ te reghwetɛ.

¹⁴Gheŋkɛ nde tenza kamelɛ nya kekele beze ghena ta ka dzeghe Shala te wənə. Ama slia mca nya ketene, hweta ba'a heli ne, katetere hɛ na pelɛke te wəmbəa ghedəkwə.

¹⁵Kwa sebe ta ŋkɛ, katekele kwa ghate ta game na kase. Katedape dzeve ta nci yɛ Aron le ŋwalea ŋkɛ kwa ghəa ŋkɛ.

¹⁶Katesla ghə na yitea gamea shɛ, katetawe mimia ŋkɛ na ba'a kateyisə na dzeyi vare yɛ bela ta reghwetɛ.

¹⁷Kateslekwe gamea shɛ na kezhɛzhi kezhɛzhi, kateyaɓe yɛ heli ba'a yɛ seɗa ta ŋkɛ na. Kwa sebe ta ŋkɛ ne, katebete hɛ na kənəa yɛ zhɛzhi le ghə.

¹⁸Cɛhwa cɛhwa tetere gamea shɛ na te reghwetɛ. Gheŋkɛ nde tenza kamelɛ kwa tere tere nya kaŋa ɗa, zeɗehwe ɗa tenza zəŋwəa n'yia ŋkɛ, 'ya Mahwətə.

¹⁹Kwa sebe ta ŋkɛ ne, katekele kwa bake ta game na kase. Katedape dzeve yɛ Aron le ŋwalea ŋkɛ kwa ghəa ŋkɛ.

²⁰Katesla ghə na te gamea shɛ, katekele mimia ŋkɛ na ba'a katedase na te sleme kwa zeme ta yɛ Aron le ŋwalea ŋkɛ, tsagha te gweŋəa dzeve ba'a seɗa kwa zeme ta nci. Kwa sebe ta ŋkɛ ne, kateyisə ŋkwa nyi dzeyi vare reghwetɛ na le mimi nya ketene.

²¹Katemene mimi na ɓɛhwɛ seyi te reghwetɛ ba'a n'yi keve ŋkwa tekeleke. Kateyisə hɛ na te Aron ba'a te yɛ lekwesa ta ŋkɛ, tsagha te ŋwalea ŋkɛ ba'a te yɛ lekwesa ta nci. Ma se mɛa vəa shɛ ne, katenza yɛ Aron le ŋwalea ŋkɛ tekeleke, tsagha yɛ lekwesa ta nci.

²²Wəsə gəməa kwa bake ta game nyagha nde tencɛ dzembe slene ta ka dzeghe ɗa melɛ. Katefə sheghe, merege nya kənəa wəshi nyi kwa hwə, bela ganyɛ ta mene, ghwelese nyi bake le merege nya kənəa hɛ ba'a seɗa kwa zeme ta wəsə keseɗa shɛ na.

²³Katenta 'yɛmbe dəghwəa ɗafa, ghwempe kwa hwaɗe hwaɗe le n'yi ba'a ɗafa kwalekwala na kwa kwaciga ta ɗafa nyi ɗema tenjɛne hwe nya kwa kema ta ɗa.

²⁴Katebete nda hɛ na pɛtɛ mbe dzeve ke yɛ Aron le ŋwalea ŋkɛ, kategeze nda na ke hɛ kezha ve ɗa hɛ kala nya keseneve geva.

²⁵Kwa sebe ta ŋkɛ ne, katefə wəshia shɛhɛ na mbe dzeve ta nci ba'a katetere hɛ na te reghwetɛ, kənəa melɛ kwa tere tere: gheŋkɛ nde tenza kamelɛ nya ketedzeghe ɗa geva, 'ya Mahwətə, zeɗehwe ɗa tenza zəŋwəa n'yia ŋkɛ.

²⁶Katekele hate ta kwa bake ta game nya keveyi geva kaŋa Aron na, kateve na gha le ghəa ŋa kwa kema ta ɗa kala nya keseneve geva. Ma kwa sebe ta ŋkɛ ne, kaŋa ŋa tenza ŋkɛ.

²⁷Kategeze na kezha nza yɛ hate le seɗa kwa zeme nyi kentave geva hwa zhɛzhia game ba'a nyi dzeghekɛ melɛ mbeli le hɛ kala nya keseneve geva tekeleke kaŋa ɗa.

²⁸Vatse tehi ka Israyɛl keveci keveci kafə zhɛzhia shɛhɛ shave hwa slia wəshi keseɗa nyi dzeghe ɗa melɛ kejikə ghə hɛ le hɛ, kafə nda ke yɛ Aron le ŋwalea ŋkɛ.

²⁹Ma kwa sebe ta mte ta Aron ne, katenza lekwesa ta ŋkɛ nyi keveyi geva tekeleke kaŋa ŋwalea ŋkɛ. Kateseɗe hɛ hɛ te veci nya teve geva hɛ tekeleke ba'a nya tegha hɛ kamene ɗa slene.

³⁰Ma nde dzeghe Shala nya ketedzete ŋkwa Aron ne, hɛ mberefaŋe temene ŋkɛ le lekwesa shɛ kənəa geva vəa ŋkwa nya tedzembe cɛ lekwesa kebegeme geva ŋkɛ kezha mene ɗa slene mbe ŋkwa nya keveyi geva tekeleke.

³¹Katekele kwa bake ta game na, game nya hene mbeli vəa ŋkwa nya gha mene ɗa slene ka dzeghe Shala. Kateta slia ŋkɛ na mbe ŋkwa nya keveyi geva tekeleke.

³²Katezeme yɛ Aron le ŋwalea ŋkɛ le ɗafa nyi ketene kwa kwaciga, mɛa ŋkwa kedzembe cɛ lekwesa kebegeme geva.

³³Deke hɛ ka tenza wərə kazeme wəshi nyi dzeghekɛ geva melɛ le hɛ kezha kelemte jaɗafa ta nci, te vəa gəsəkəa ve ŋkwa tekeleke ba'a te vəa dzembe slene. Hweŋkwa shɛ katenza va kwete wəndə kazeme we, kwa nza ŋkɛ ne, wəshi nyi keveyi geva tekeleke hɛ.

³⁴Ma ketene sli keɗema ɗafa kamasheke ne, katetere hɛ na. Kahi mbeli kazhɛne zeme hɛ, va nya nza hɛ kawəshi kezeme nyi keveyi geva tekeleke we.

³⁵Kala nya gezave ŋa 'ya temene nda na ke yɛ Aron le ŋwalea ŋkɛ. Kahɛ mberefaŋe tetemə gəsəkəa dzembe slene ta ka dzeghe Shala.

³⁶Katedzeghe melɛ na le mca keveci keveci kezha kelemte geva beze ghena te wənə. Tsagha ne, kateyaɓe reghwetɛ na wɛŋe, kwa sebe ta ŋkɛ, katesheke n'yi na te kezha ve ŋkɛ tekeleke.

³⁷Kahɛ mberefaŋe tetemə gəsəkəa shɛ perə. Ma kwa sebe ta ŋkɛ ne, deke kezha slene ta ɗa tenza reghwetɛ. Ma yayata wəndə keɗema yayata wəsə nya ketekwaɗe ne, kateme ɗa te.

³⁸Keveci keveci ne, katedzeghe melɛ na te reghwetɛ le gamea lɛmə bake nyi kemenete va kwetɛŋe, kaghala ghala tenza ŋkɛ.

³⁹Masheke tedzeghe melɛ na le kwa ghate, hetɛhwɛɗi le kwa bake.

⁴⁰Ma yitea kwa ghate ta game ne, katekele kiləwəa hə mahekene, n'yi ganyɛ viɗi te kwalaba le kwete gasle mbe ba'a tɛ pɛre te zlerekwe le kwete gasle kwa na.

⁴¹Ma kwa bake ta game ne, hetɛhwɛɗi tedzeghe melɛ na le. Kala wəshi nyi fəke na yitea nya masheke tefə na yite. Zeɗehwe ɗa tenza zəŋwəa n'yia melɛ nyi kedzeghekɛ geva shɛhɛ, 'ya Mahwətə.

⁴²Ma mbe və nyi ketese ne, katefɛa mbeli yitea dzeghe ɗa melɛ kwa tere tere mɛa ŋkwa kedzembe cɛ lekwesa kebegeme geva keshi keshi we. Tagha tebegeme 'ya le gheyɛ ba'a tegeze ŋayɛ ghena 'ya.

⁴³Katebegeme 'ya le ka Israyɛl te ŋkwa nya keveyi geva tekeleke laka zləvəa ɗa.

⁴⁴'Ya le ghəa ɗa nde teve cɛ lekwesa kebegeme geva ba'a reghwetɛ tekeleke. Kateve yɛ Aron le yɛ ŋwalea ŋkɛ 'ya tekeleke kezha dzeghe ɗa melɛ.

⁴⁵Katenza 'ya hwa ka Israyɛl, kaShala ta nci tenza 'ya.

⁴⁶Kateɗepete hɛ 'ya ya kaMahwətə Shala ta nci, 'ya nya kefəakave hɛ shave mbe Ɛzhipte kezha nza te tepe ta nci. 'Ya ya kaMahwətə Shala ta nci.