Read kapsiki Shave 37 Bible Online

Shave 37 - kapsiki bible

Shave 37

¹Pa Bɛsalɛl baŋete səndəkwə yitea gwevɛre. Dzeghe bake slə yitea fegwele hwa'a mɛa ŋwalea dzeve ba'a kwete gasle yite biya ta ŋkɛ, dzeghe kwetɛŋe ba'a kwete gasle yite bezlea ŋkɛ ba'a dzeghe kwetɛŋe ba'a kwete gasle yite dzeme ghweme ta ŋkɛ.

²Pa Bɛsalɛl fikɛ ŋkwa nya kwa hwəa ŋkɛ ba'a nya te wəmbəa ŋkɛ le mze kwa tere tere nya wɛŋe, pa menete mze kwa tere tere dzasle dzeyi mɛa mɛa ŋkɛ.

³Pa ŋkɛ vɛsəte takase wəfaɗe yitea mze kwa tere tere, pa veveyi hɛ te megwekwe nyi wəfaɗe te səndəkwə, bake laka kwete bela, bake laka kwete.

⁴Pa ŋkɛ feɗete geta bake yitea gwevɛre ba'a fiaghe mze kwa tere tere kənəa hɛ.

⁵Pa mbeli hame hɛ mbe takase nyi dzeyi vare yɛ bela ta səndəkwə kezha kele te.

⁶Pa ŋkɛ vɛsəte wəsə keŋzle səndəkwə yitea mze kwa tere tere nya wɛŋe. Ma wəsə keŋzlea shɛ ne, dzeghe bake ba'a kwete gasle yite biya ta ŋkɛ ba'a dzeghe kwetɛŋe ba'a kwete gasle yite bezlea ŋkɛ.

⁷Pa ŋkɛ vɛsəate ka shɛrəbɛŋe bake le mze kwa tere tere te bela nyi bake te wəsə keŋzle.

⁸Ma ka Shɛrəbɛŋe nyi bake nyi ne, ndendeɓe hɛ te wəsə keŋzle, te bela ta ŋkɛ nyi bake.

⁹Kwa kema kwa kema hɛ ba'a laka wəsə keŋzle nya ya hɛ le bidzəa nci nyi pepelake kema ta nci.

¹⁰Pa Bɛsalɛl baŋete tabele yitea gwevɛre. Kadzeghe bake slə yitea fegwele hwa'a mɛa ŋwalea dzeve biya ta ŋkɛ, dzeghe kwetɛŋe bezlea ŋkɛ ba'a dzeghe kwetɛŋe ba'a kwete gasle yite dzeme ghweme ta ŋkɛ.

¹¹Pa ŋkɛ fiaghe mze kwa tere tere nya wɛŋe kənə ba'a meneyi mze kwa tere tere dzasle dzeyi mɛa mɛa ŋkɛ.

¹²Ma dzeyi vare bela ta ŋkɛ nyi wəfaɗe ne, pa meneyi sheghwə kwa slapesla gare bezlea hwə dzeve ba'a pa meneyi mze kwa tere tere dzasle dzeyi mɛa mɛa ŋkɛ.

¹³Pa ŋkɛ vɛsəte takase wəfaɗe le mze kwa tere tere ba'a veveyi hɛ te megwekwe nyi wəfaɗe, takwa yitea seɗa nyi wəfaɗe.

¹⁴Ma takasea shɛhɛ ne, dekwe yitea sheghwə kwa slapesla veveyi hɛ ŋkɛ kezha nza geta nyi tekele tabele mbeli te mbe hɛ.

¹⁵Pa ŋkɛ feɗete geta bake yitea gwevɛre, pa fiaghe mze kwa tere tere kənəa hɛ. Te hɛ tekele tabele mbeli.

¹⁶Pa ŋkɛ vɛsəte wəshi kemene slene te tabele le mze kwa tere tere nya wɛŋe: yɛ parantɛ, yɛ tasa, yɛ kwalekwə ba'a yɛ ghwelepe tɛ.

¹⁷Pa Bɛsalɛl vɛsəte wəsə kentare yɛ paterela le mze kwa tere tere nya wɛŋe. Kanya kwetɛŋe ŋkɛ le seɗa ta ŋkɛ, yɛ dzeve ta ŋkɛ, yɛ wəbəzlia n'yi nyi te, kweci wəshia ŋkɛ nyi tehwepərə tehwepərə ba'a kweci wəshia ŋkɛ nyi kala ghwə ta wəfe.

¹⁸Dzeve ŋkwaŋe ya te seɗa ta ŋkɛ, mahekene laka nya bela, mahekene laka nya.

¹⁹Ma te yayata dzeve ne, wəbəzli nyi kala ya ta vegeme ya shɛ mahekene, kweci wəshi tehwepərə tehwepərə ba'a kweci wəshi kala ghwə ta wəfe ya te hɛ.

²⁰Ma te dəŋwə ne, wəbəzli nyi kala ya ta vegeme ya shɛ wəfaɗe, kweci wəshi tehwepərə tehwepərə ba'a kweci wəshi kala ghwə ta wəfe ya te hɛ.

²¹Ma kwayite ta yayata jikə ta dzeve nyi keslə bake nyi, bake nyi mahekene zhigə te dəŋwə: kwete wəsə ya shɛ tehwepərə.

²²Ma wəshi nyi tehwepərə tehwepərə nyi ba'a yɛ dzeve ne, kanya kwetɛŋe hɛ le wəshi nyi ketene, pɛtɛ hɛ le mze kwa tere tere nya wɛŋe.

²³Pa ŋkɛ vɛsəte paterela mberefaŋe, tsagha yɛ mekese ba'a wəshi kefə pəsəɗə le mze kwa tere tere nya wɛŋe.

²⁴Ma kezha vɛsə wəsə kentare yɛ paterela, yɛ mekese ba'a wəshi kefə pəsəɗə ne, kiləwəa mze kwa tere tere nya wɛŋe mahekenemsə yamenehwe slene mbeli le.

²⁵Ma kwa sebe ta ŋkɛ ne, pa Bɛsalɛl baŋete reghwetɛ ketere 'wərdə yitea sheghwəa gwevɛre. Yipə yipə yɛ biya ta reghwetɛa shɛ le bezlea ŋkɛ, kadzeghe kwetɛŋe slə yitea fegwele hwa'a mɛa ŋwalea dzeve yayata bela ta ŋkɛ ba'a dzeghe bake dzeme ghweme ta ŋkɛ. Jikə tereme nyi te yɛ sleme ta ŋkɛ le.

²⁶Pa ŋkɛ fiaghe pɛtɛa mze kwa tere tere nya wɛŋe: ŋkwa nya te, tereme nyi te yɛ sleme ta ŋkɛ, bela ta ŋkɛ nyi wəfaɗe. Pa ŋkɛ menete ŋkwa nya dzeyi mɛa mɛa ŋkɛ dzasle le mze kwa tere tere.

²⁷Pa ŋkɛ vɛsəte yɛ takase mze kwa tere tere ba'a pa beteyi hɛ bake laka nya, bake laka nya bela ta reghwetɛ, kwayite ta ŋkwa nya dzeyi mɛa mɛa ŋkɛ. Mbe hɛ teha geta nyi tekele mbeli te mbeli.

²⁸Pa ŋkɛ feɗete geta bake yitea gwevɛre ba'a fiaghe mze kwa tere tere kənəa hɛ.

²⁹Pa nde ta 'wərdə takɛ n'yi keve ŋkwa tekeleke, tsagha 'wərdə ganyɛ kezha tere te reghwetɛ.