Read kapsiki Shave 38 Bible Online

Shave 38 - kapsiki bible

Shave 38

¹Ma kwa sebe ta ŋkɛ ne, pa Bɛsalɛl baŋete reghwetɛ kedzeghe melɛ yitea gwevɛre. Yipə yipə yɛ biya ta ŋkɛ le bezlea ŋkɛ, kamɛtre bake ba'a kwete gasle yite yayata bela ta ŋkɛ. Mɛtre kwetɛŋe ba'a kwete gasle yite dzeme ghweme ta ŋkɛ.

²Pa ŋkɛ meneyi yɛ tereme te megwekwe ta ŋkɛ nyi wəfaɗe nyi, kanya kwetɛŋe teremea shɛhɛ le reghwetɛa shɛ. Pa ŋkɛ fikɛ hɛ le mze kwa ghwə ghwə.

³Pa ŋkɛ vɛsəte wəshi kemene slene te reghwetɛ pɛtɛ le mze kwa ghwə ghwə: wəshi kefə pəsəɗə, yɛ pɛlə, yɛ kwenə kesheke mimi, wəshi kezhɛre sli te ghwə ba'a wəshi ketere 'wərdə.

⁴Pa ŋkɛ vɛsəte kwete wəsə kala lɛ kepesa sli le mze kwa ghwə ghwə, pa meneyite dzeyi yitea reghwetɛ, ghala slə nde te hɛɗi hwa'a mbe tepe ta ŋkɛ.

⁵Pa ŋkɛ vɛsəte takase wəfaɗe kezha ve hɛ te megwekwe nyi wəfaɗe te wəsə nya kala lɛ kepesa sli nya le mze kwa ghwə ghwə, kezha ha geta jive mbe hɛ.

⁶Pa ŋkɛ feɗete geta bake yitea gwevɛre ba'a fiaghe mze kwa ghwə ghwə kənəa hɛ.

⁷Pa ŋkɛ hehame hɛ mbe takase nyi dzeyi vare yɛ bela ta reghwetɛ nyi bake kezha kele te. Ma reghwetɛ nya baŋete nya mbeli le sheghwə nyi slapesla slapesla ne, ghwəarara ŋkwa nya kwa hwəa ŋkɛ.

⁸Kwa sebe ta ŋkɛ ne, pa Bɛsalɛl vɛsəte kwenə yitea mze kwa ghwə ghwə, tsagha wəsə nya ntare mbeli te le mze kwa ghwə ghwə. Le deraŋgalea mi nyi kemene slene mɛa mɛa ŋkwa kedzembe cɛ lekwesa kebegeme geva menete hɛ ŋkɛ.

⁹Ma dzeyi yitea cɛ lekwesa nya keveyi geva tekeleke ne, ŋwela ya shɛ. Ma ŋwela shɛ ne, zlave nyi tsate mbeli le pawa nyi berete berete ya kaghala ta ŋkɛ. Ma laka bela kwa zeme ne, mɛtre mcɛfemsə biya ta zlavea shɛ.

¹⁰Yɛ ndɛaŋe ba'a yɛ geta nyi le mze kwa tɛawetɛa yandɛaŋete hɛ mbeli le te seləa mze kwa ghwə ghwə nyi bakemsə. Te wəshi kentare nyi bakemsə le mze kwa ghwə ghwə ntarate geva seləa shɛhɛ.

¹¹Ma laka bela kwa gwela ne, mɛtre mcɛfemsə biya ta zlavea shɛ ba'a tsagha shɛ ndɛndɛaŋeyi hɛ mbeli.

¹²Ma laka ŋkwa kepəkwə ta veci ne, mɛtre bakemsə mcɛfeghəmbe bezlea zlavea shɛ. Tsagha ndɛndɛaŋeyi hɛ mbeli te selə meŋe, nyi mentare te wəshi kentare selə meŋe.

¹³Ma laka ŋkwa kedzeki nya laka ŋkwa kesame ta veci ne, mɛtre bakemsə mcɛfeghəmbe bezlea zlavea shɛ.

¹⁴Ma laka kwete bela ta ŋkwa kadzeki ne, zlave kamɛtre mberefaŋe ba'a kwete gasle yite, selə mahekene ba'a wəshi kentare selə mahekene ya shɛ.

¹⁵Ma laka kwete bela ne, zlave kamɛtre mberefaŋe ba'a kwete gasle yite, selə mahekene ba'a wəshi kentare selə mahekene ya shɛ.

¹⁶Ma pɛtɛa zlave nya dzasle yitea ŋwela shɛ ne, le pawa nyi berete berete tsate mbeli.

¹⁷Ma wəshi nyi kentare yɛ selə ne, le mze kwa ghwə ghwə hɛ, le mze kwa tɛawetɛa yɛ ndɛaŋe ba'a yɛ geta. Ma ghəa selə nyi nza pəkələ yite ne, kefi fi ŋkɛ le mze le mze kwa tɛawetɛa. Pɛtɛa selə nyi yitea ŋwela shɛ tejikə le geta nyi le mze kwa tɛawetɛa.

¹⁸Ma mɛa ŋkwa kedzeki ne, pa ka tsa zlave tsate mayafe le pawa nyi berete berete, welaɗe mbe shintia təmə nyi kefi fi le yirə kwa ndereme ndereme, kwa gheme ba'a kwa ghɛmɛ. Ma mayafea shɛ ne, kamɛtre meŋe biya ta ŋkɛ ba'a kamɛtre bake ba'a kwete gasle yite dzeme ghweme ta ŋkɛ, kala bezlea zlave nya dzeyi yitea ŋwela.

¹⁹Te selə wəfaɗe nyi le mze kwa ghwə ghwə nyi mentare te wəshi kentare selə ndɛndɛaŋeyi geva ŋkɛ. Le mze kwa tɛawetɛa vɛsəte geva yɛ ndɛaŋe, le mze kwa tɛawetɛa fikɛ geva yɛ ghəa selə nyi nza pəkələ yite ba'a yɛ geta.

²⁰Ma pɛtɛa wəshi nyi kebaŋeyi geva kwa hɛɗi dzeyi yitea cɛ lekwesa nya keveyi geva tekeleke ba'a dzeyi yitea ŋwela nya yite ne, le mze kwa ghwə ghwə hɛ.

²¹Wa nya tsetse kwelea mze nyi menehwe slene mbeli le kezha cɛ lekwesa nya keveyi geva tekeleke, nya tenza pelɛ nyi slapesla slapesla mbe. Kala nya gezete Moyize ne, ka Lɛvi nyi nza Itamar, wəzege ta nde dzeghe Shala Aron te ghəa nci, ka ɓelate hɛ.

²²Pa Bɛsalɛl, wəzege ta Əwri ba'a shia Həwr, kwa yita ta Zhəwda nde menete wəshi nyi gezave nda Mahwətə ke Moyize.

²³Oholiyab, wəzege ta Ahisamak, kwa yita ta Dan nya kande tsehe pelɛ, kande rafe pa ta wəshi, kande tsa lekwesa le shintia təmə nyi kefi fi le yirə kwa ndereme ndereme, kwa gheme ba'a kwa ghɛmɛ ba'a nya kande tsa wəshi le pawa nde kemanakɛ ŋkɛ.

²⁴Ma pɛtɛa mze kwa tere tere nya tsehete ka Israyɛl ba'a nya menehwe slene mbeli le kezha slene ta cɛ lekwesa nya keveyi geva tekeleke ne, kiləwə gwəmsə deghese ba'a mberefaŋemsə mberefaŋeghəmbe ba'a gwəmsə mahekene kwa slibə ta bela ta kiləwə, kala wəsə kedzeghe ɗaŋeɗa ta wəshi nya mbe cɛ lekwesa nya keveyi geva tekeleke.

²⁵Ma pɛtɛa mze kwa tɛawetɛa nya kese va mbeli nyi keɓelate geva ne, kiləwə 3.017 ba'a gwəmsə mberefaŋe ba'a mcɛfemsə kwa slibə ta bela ta kiləwə, kala wəsə kedzeghe ɗaŋeɗa ta wəshi nya mbe cɛ lekwesa nya keveyi geva tekeleke.

²⁶Ma zhili nyi ɓelate nyi mbeli 603.550, se te va bakemsə kajive mbe kema ne, mcɛfe kwa slibə ta bela ta kiləwəa mze kwa tɛawetɛa keleke yayata wəndəa nci.

²⁷Kiləwəa mze kwa tɛawetɛa 3.000 menehwe slene mbeli le kezha vɛsə wəshi kentare selə gwəmsə kezha cɛ lekwesa nya keveyi geva tekeleke ba'a kezha mayafe nya mbe mbe, geze ta ŋkɛ, kiləwə mahekenemsə kaŋa yayata wəsə kentare selə.

²⁸Ma kiləwə meŋe mberefaŋeghəmbe ba'a gwəmsə mberefaŋe ba'a mcɛfemsə kwa slibə ta bela ta kiləwə nyi ketene ne, pa mbeli menete ndɛaŋe nyi te selə, pa mbeli fikɛ yɛ ghəa selə nyi nza pəkələ yite ba'a pa mbeli vɛsəte geta nyi kejikə yɛ selə.

²⁹Ma pɛtɛa mze kwa ghwə ghwə nya tseheke ka Israyɛl ne, kiləwə 2.124.

³⁰Pa mbeli menehwe slene le kezha vɛsə wəshi kentare selə nyi mɛa ŋkwa kedzembe cɛ lekwesa kebegeme geva, reghwetɛ nya le mze kwa ghwə ghwə ba'a wəsə nya kala lɛ kepesa sli dzeyi yite le mze kwa ghwə ghwə, pɛtɛa wəshi kemene slene te reghwetɛ,

³¹wəshi kentare selə nyi dzeyi yitea ŋwela nya yite ba'a nyi mɛa ŋkwa kedzeki, tsagha wəshi nyi baŋeyi mbeli kwa hɛɗi dzeyi yitea ŋkwa nya keveyi geva tekeleke ba'a dzeyi yitea ŋwela nya yite.