Read kapsiki Shave 39 Bible Online

Shave 39 - kapsiki bible

Shave 39

¹Le shintia təmə nyi kefi fi le yirə kwa ndereme ndereme, kwa gheme ba'a kwa ghɛmɛ ne, pa mbeli tsate lekwesa ganji kezha mene slene mbe ŋkwa nya keveyi geva tekeleke. Pa mbeli tsate nda lekwesa nyi keveyi geva tekeleke ke Aron, kala nya gezave nda Mahwətə ke Moyize.

²Pa mbeli tsate lekwesa nya kənəa rewebe le pawa nyi berete berete, welaɗe mbe shintia təmə nyi kefi fi le yirə kwa ndereme ndereme, kwa gheme ba'a kwa ghɛmɛ. Pa mbeli tseyi pawa nyi kefi fi le mze kwa tere tere dzeyi te.

³Pa mbeli nzenzereve mze kwa tere tere nya vɛsəte mbeli slɛfe slɛfe slɛahe slɛahe. Pa ka tsa lekwesa welaɗete le shinti ganjia təmə nyi kefi fi le yirə kwa ndereme ndereme, kwa gheme keɗema kwa ghɛmɛ, ba'a le pawa.

⁴Ma kezha hwepe lekwesa nya kənəa rewebe ne, pa hɛ ntsəzləyi zewe bake laka yayata bela.

⁵Ma zewe nya dzeyi yitea lekwesa nya kənəa rewebe ne, kanya kwetɛŋe ŋkɛ le, kala nya gezave nda Mahwətə ke Moyize.

⁶Pa hɛ tsehete pelɛ nyi ghemea ghemea nyi nza zləvə te bake ba'a ndendeɓeyi hɛ te ŋkwa nyi bake kefi fi le mze kwa tere tere. Pa hɛ tsaslate sləa ŋwalea Zhakob te hɛ, kala nya tsehe lamba ta wəndə mbeli.

⁷Pa hɛ hwepeyi hɛ te lekwesa nya kənəa rewebe kezha ncɛ hwelefe ta Israyɛl nyi meŋe bakeghəmbe, kala nya gezave nda Mahwətə ke Moyize.

⁸Pa ka tsa lekwesa tsate wəsə nya slape kwa hate le pawa nyi berete berete, welaɗe mbe shintia təmə nyi kefi fi le yirə kwa ndereme ndereme, kwa gheme ba'a kwa ghɛmɛ. Pa hɛ tseyi pawa nyi kefi fi le mze kwa tere tere dzeyi te, kala lekwesa nya kənəa rewebe.

⁹Ma kwa gwaɓete geva nde ne, kanya kwetɛŋe yɛ biya ta ŋkɛ le bezlea ŋkɛ, kadzeghe ta dzeve kwetɛŋe.

¹⁰Pa hɛ rafekɛ le zəɗəa pelɛ nyi nza zləvə te hɛ wəfaɗe: ma kwa kwa ghate ta zəɗə ne, pelɛ kwa ghɛmɛ, kwa rəghwə rəghwə ba'a kwa mede mede ya shɛ.

¹¹Ma kwa kwa bake ta zəɗə ne, pelɛ kwa gheme, kwa lɛa lɛa ghweme ba'a kwacaregesla ya shɛ.

¹²Ma kwa kwa mahekene ta zəɗə ne, pelɛ kwa gatawəfa gatawəfa, kwa jiɓe jiɓe ba'a kwa ndereme ndereme ya shɛ.

¹³Ma kwa kwa wəfaɗe ta zəɗə ne, pelɛ kwa sleke sleke, kwa gheme gheme ba'a kwa nɛ nɛ ya shɛ. Kendeɓe ndeɓe yayata pelɛ te ŋkwa nya kefi fi le mze kwa tere tere.

¹⁴Ma te yayata pelɛa shɛ ne, pa mbeli tsaslate sləa kwete wəndəa ŋwalea Zhakob nyi meŋe bakeghəmbe, kala nya tsehe lamba ta wəndə mbeli. Pelɛa shɛhɛ ya te ŋkwa hwelefe ta Israyɛl nyi meŋe bakeghəmbe.

¹⁵Ma kezha wəsə nya kwa hatea shɛ ne, pa mbeli vɛsəte livə bake yitea mze kwa tere tere nya wɛŋe, kendere ndere kala mampə,

¹⁶tsagha ŋkwa nyi bake kefi fi le mze kwa tere tere ba'a takase nyi bake le mze kwa tere tere kezha hwepe mɛa sleme nyi pelɛghə va wəsə nya kwa hate.

¹⁷Pa mbeli hwepeyi livə nyi bake nyi le mze kwa tere tere te takase nyi bake mɛa sleme ta wəsə nya slape kwa hate.

¹⁸Pa mbeli hwepete kweci mɛa livə nyi bake nyi te ŋkwa nyi bake kefi fi le mze kwa tere tere te zewe nyi te paslɛ paslɛa va lekwesa nya kənəa rewebe, kezha nza wəsəa shɛ kwa hate.

¹⁹Pa mbeli vɛsəte kweci takase bake le mze kwa tere tere kezha hwepe mɛa sleme nyi kwayite va wəsə nya slape kwa hate, mbe hwə mbe hwə va lekwesa nya kənəa rewebe.

²⁰Pa mbeli vɛsəte kweci takase bake ɓiyitsa le kwa mze tere kezha hwepe kwake kwake va zewe nyi te lekwesa nya kənəa rewebe, laka ŋkwa nya kwa kema, te ŋkwa nya ntsəzləyi hɛ mbeli. Samese ke zewe nya dzeyi yitea lekwesa nya kənəa rewebe hwehwepeyi geva takasea shɛhɛ.

²¹Pa mbeli jikəte takase nyi te wəsə nya slape kwa hate le nyi te lekwesa nya kənəa rewebe le zewe kwa ndereme ndereme. Ma tsagha ne, kənəa zewe nya dzeyi yitea lekwesa nya kənəa rewebe nza wəsə nya slape kwa hate ba'a kagaŋkəɗə nde te lekwesa nya kənəa rewebe, kala nya gezave nda Mahwətə ke Moyize we.

²²Ma rewebe nya seɗe lekwesa nya kənəa rewebe Aron kənə ne, le shintia təmə nyi kefi fi le yirə kwa ndereme ndereme tsate geva ŋkɛ pɛtɛ.

²³Ma kezha seɗe ne, ŋkwa welɛ yaslate mbeli te tepe ve. Ketsa tsa ŋkwa nya dzeyi yitea welɛa shɛ kezha ɗema nde kaŋkwahe.

²⁴Pa mbeli tsate yɛ ya ta kwakweme dzeyi yitea rewebea shɛ le shintia təmə nyi kefi fi le yirə kwa ndereme ndereme, kwa gheme ba'a kwa ghɛmɛ ba'a le pawa nyi berete berete.

²⁵Pa mbeli vɛsəte yɛ ciŋəci mze kwa tere tere nya wɛŋe ba'a hwehwepeyi hɛ dzeyi yitea rewebe, dzawa kwelɛ yɛ ya ta kwakweme.

²⁶Pa mbeli mbembeɗete yɛ ya ta kwakweme le yɛ ciŋəci dzeyi yitea rewebe kemene slene, kala nya gezave nda Mahwətə ke Moyize.

²⁷Pa ka tsa lekwesa tsate lekwesa ganji le pawa kezha yɛ Aron le ŋwalea ŋkɛ,

²⁸tsagha zlave pawa kepeɗe ghə, derə pawa, kwampi pawa nyi berete berete

²⁹ba'a zewe nya hwa hwə nya le pawa nyi berete berete, welaɗe mbe shintia təmə nyi kefi fi le yirə kwa ndereme ndereme, kwa gheme ba'a kwa ghɛmɛ, kala nya gezave nda Mahwətə ke Moyize.

³⁰Kakwa keɗaŋe ne, pa mbeli vɛsəte kwete wəsə kala ghwə ta wəfe kawəsə keve ŋkwa tekeleke le mze kwa tere tere nya wɛŋe. Pa mbeli tsaslate “Wəsə nya keveyi geva tekeleke kaŋa Mahwətə” te, kala nya tsehe lamba ta wəndə mbeli.

³¹Pa mbeli hwepeyi wəsəa shɛ mɛa kema te zlave nya keveyi geva tekeleke yitea ghə le zewe kwa ndereme ndereme, kala nya gezave nda Mahwətə ke Moyize.

³²Wa nya tsetse kiɗimte geva slene ta cɛ lekwesa kebegeme geva, ŋkwa nya keveyi geva tekeleke. Tserame menete ka Israyɛl kala nya gezave nda Mahwətə ke Moyize.

³³Pɛtɛ ka Israyɛl fəke nda wəshia cɛ lekwesa nya keveyi geva tekeleke ke Moyize: yɛ zlave le wəshi nyi yite, yɛ ndɛaŋea ŋkɛ, sheghwə nyi slapesla slapesla ta ŋkɛ, sheghwə nyi kejive mbe, yɛ seləa ŋkɛ ba'a wəshi kentare seləa ŋkɛ,

³⁴wəsə nya kənə nya le hweta ta gamea lɛmə nyi kefi fi le yirə kwa gheme, wəsə nya kənə nya le hweta nyi berete berete ba'a mayafe kenehe ŋkwa,

³⁵səndəkwəa jikə geva, yɛ geta ta ŋkɛ ba'a wəsə keŋzle ta ŋkɛ,

³⁶tabele le wəshi nyi te ba'a ɗafa nyi fəke nda mbeli ke Shala,

³⁷wəsə kentare yɛ paterela nya le mze kwa tere tere nya wɛŋe, paterela nyi ketseɓa tseɓa te, kweci wəshi nyi te ba'a n'yi kegə kwa paterela,

³⁸reghwetɛ nya le mze kwa tere tere, n'yi keve ŋkwa tekeleke, 'wərdə ketere, tsagha mayafe nya mɛa ŋkwa kedzembe cɛ lekwesa,

³⁹reghwetɛ nya le mze kwa ghwə ghwə, wəsə nya kala lɛ kepesa sli nya le mze kwa ghwə ghwə dzeyi yite, yɛ geta ta ŋkɛ ba'a kweci wəshi nyi te, kwenə nya wəba le wəsə kentare,

⁴⁰zlave nya dzeyi yitea ŋwela, yɛ seləa ŋkɛ ba'a wəshi kentare hɛ, tsagha mayafe nya mɛa ŋkwa kedzeki, yɛ zewe ta ŋkɛ ba'a yɛ wəshi kebaŋe kwa hɛɗi dzeyi yite, pɛtɛa wəshi nyi temene slene mbeli le mbe cɛ lekwesa kebegeme geva, ŋkwa nya keveyi geva tekeleke,

⁴¹lekwesa ganji kemene slene mbe ŋkwa nya keveyi geva tekeleke, lekwesa nyi keveyi geva tekeleke kezha nde dzeghe Shala Aron ba'a lekwesa nyi seɗe ŋwalea ŋkɛ kezha mene slene ta nci.

⁴²Tserame ka Israyɛl menete slenea shɛ kala nya gezave nda Mahwətə ke Moyize.

⁴³Ma kwa nakɛ Moyize pɛtɛ slene kemenete geva kala nya gezave nda Mahwətə ne, pa wəpikɛ ka Israyɛl.