Read kapsiki Shave 6 Bible Online

Shave 6 - kapsiki bible

Shave 6

¹Ma ke Mahwətə zhɛnete nda ke Moyize: «Tsetsenya ne, katenewe wəsə nya temene nda 'ya ke Farawon na! Laka berete ta ɗa ne, katesərə ka Israyɛl ŋkɛ kaslə. Laka berete ta ɗa ne, kateŋka hɛ ŋkɛ shave mbe hɛɗia ŋkɛ!»

²Ma ke Shala sha Moyize zhɛkwa: «'Ya ya kaMahwətə.

³Nahe 'ya kencɛte nda ghəa ɗa vəashi ke Abraham, ke Izak ba'a ke Zhakob kaShala nde berete, ama keɗepete hɛ ‹Mahwətə› kwete sləa ɗa we.

⁴Nahe 'ya kemenete jikə geva le hɛ, nahe 'ya kemeɗeyi nda hɛɗia Kanan, nya se hɛ kaka se se te ke hɛ.

⁵Tsetsenya ne, nahe 'ya kefate gafe ta ka Israyɛl va ɗaŋeɗa ta slene mava nya veyi ka Ɛzhipte kwa ghəa nci, nahe 'ya kezəzəte jikə geva ta ɗa le hɛ.

⁶Vatse gɛ, ma pa sha ka Israyɛl: 'Ya ya kaMahwətə. Katefə ŋayɛ 'ya shave mbe slene yaka ba'a katembele ŋayɛ 'ya shave mbe slene mava nya ndeke ŋayɛ ka Ɛzhipte. Te zlaɓa ta berete ta ɗa ba'a kwelea ɗa ne, katembele ŋayɛ 'ya.

⁷Kateve ŋayɛ 'ya kambelia ɗa ba'a katenza 'ya kaShala ta ŋayɛ. Kateɗepete yɛ 'ya ya kaMahwətə Shala ta ŋayɛ, nya kefə ŋayɛ shave mbe slene berete nyi ndeke ŋayɛ ka Ɛzhipte.

⁸Kwa sebe ta ŋkɛ ne, katebeghe ŋayɛ 'ya kadzete hɛɗi nya meɗeyi nda 'ya gheci gheci ke Abraham, ke Izak ba'a ke Zhakob, kateve ŋayɛ 'ya kaŋa ŋayɛ. 'Ya ya kaMahwətə.»

⁹Pa Moyize ɓelate nda ghena shɛhɛ ke ka Israyɛl, ama kese hɛ kafa va dzawea slene mava nya ketaze nda mehele ke hɛ we.

¹⁰Ma ke Mahwətə sha Moyize zhɛkwa:

¹¹«Kwiɗi geze nda ke Farawon, meghea ka Ɛzhipte kezha pelakɛ ka Israyɛl ŋkɛ kaslə te hɛɗia ŋkɛ.»

¹²Ma ke Moyize zhɛnete nda: «Pa le ka Israyɛl ɗema kese kafa ghena ta ɗa! Tsema tenza Farawon kafate ghena ta ɗa, 'ya nya kaɓeɓə wa?»

¹³Tagha gɛ, pa Mahwətə gezave nda ke yɛ Moyize le Aron kalə zlaɓe sha ka Israyɛl ba'a sha Farawon kezha fə ka Israyɛl shave mbe Ɛzhipte.

¹⁴Wa nyi sləa mbelia jama nyi te ghəa ka shihɛnyɛa ka Israyɛl nyi: Ŋwalea Rəbɛn, tsəməa wəzege ta Zhakob: Hanok, Paləw, Hɛsron ba'a Karmi. Nyi ya kaka shihɛnyɛa Rəbɛn.

¹⁵Ŋwalea Simɛyon: Yeməwɛl, Yamin, Ohad, Yakin, Sohar ba'a Shawəl nya kawəzege ta wəzha ta ka Kanan. Nyi ya kaka shihɛnyɛa Simɛyon.

¹⁶Wa nyi sləa hwelefefia Lɛvi nyi, keyita keyita: Ŋwale mahekene yake Lɛvi: yɛ Gɛrshon, Kɛhat le Merari. Va gwəmsə ba'a mahekenemsə mberefaŋeghəmbe menete ŋkɛ teghweme.

¹⁷Ŋwalea Gɛrshon: yɛ Libni le Shimɛyi nyi kaka shihɛnyɛa yita ta nci.

¹⁸Ŋwalea Kɛhat: yɛ Amram, Isar, Hɛbron le Əwziyɛl. Va gwəmsə ba'a mahekenemsə mahekeneghəmbe menete Kɛhat teghweme.

¹⁹Ŋwalea Merari: yɛ Mali le Məwshi. Nyi ya kaka shihɛnyɛa Lɛvi keyita keyita.

²⁰Pa Amram wəmeve wəzha ta meghekɛa yitenyɛ Yokɛbɛd, nya keyake nda ŋwale bake: yɛ Aron le Moyize. Va gwəmsə ba'a mahekenemsə mberefaŋeghəmbe menete Amram teghweme.

²¹Ŋwalea Isar: yɛ Korɛ, Nɛfɛg le Zikri.

²²Ŋwalea Əwziyɛl: Mishayɛl, Ɛlisafan le Sitri.

²³Pa Aron wəmeve Ɛlishɛba nya kawəzha ta Aminadab ba'a kawəzha ta meghekɛa Nashon. Pa yake nda ŋwale wəfaɗe: yɛ Nadab, Abihəw, Ɛlazar le Itamar.

²⁴Ŋwalea Korɛ: yɛ Asir, Ɛlkana le Abiyasaf. Nyi ka shihɛnyɛa ka yita ta Korɛ.

²⁵Pa Ɛlazar, wəzege ta Aron wəmeve kwete hwa ŋwalea kwɛa Pəwtiyɛl, nya keyake nda wəzege kwetɛŋe, Pinhas. Nyi ya kambeli nyi te ghəa peləa Lɛvi keyita keyita.

²⁶Ke yɛ Aron le Moyize gezave nda Mahwətə kezha fə ka Israyɛl shave mbe Ɛzhipte, kewəvəsə kewəvəsə.

²⁷Yɛ Moyize le Aron ka se kageze nda ghena ke Farawon, meghea ka Ɛzhipte, kezha pelakɛ ka Israyɛl ŋkɛ kaslə te hɛɗia ŋkɛ.

²⁸Ma te veci nya gezete nda ghena Mahwətə ke Moyize mbe Ɛzhipte ne,

²⁹ma ke shɛ: «'Ya ya kaMahwətə! Kwiɗi kaɓela nda ghena ta ɗa pɛtɛ ke Farawon, meghea ka Ɛzhipte.»

³⁰Ama ma ke Moyize zhɛnete nda: «'Ya ne, ɓeɓə 'ya. Tsema nza Farawon katefate ghena ta ɗa wa?»