Read kapsiki Shave 8 Bible Online

Shave 8 - kapsiki bible

Shave 8

¹Ma ke Mahwətə sha Moyize: «Gezave nda ke Aron kezha kelete geta ta ŋkɛ ŋkɛ ba'a kezha haghe dzeve ŋkɛ laka yɛmə nyi kehwɛ mbe Ɛzhipte pɛtɛ: yɛ hələ, ŋkwa nyi perawete mbeli, yɛmə nyi tsate mbeli, yitea nza ŋkwa nya mbe Ɛzhipte rayɛ va gwambe.»

²Pa Aron haghe dzeve ta ŋkɛ laka yɛmə nyi te hɛɗia Ɛzhipte. Kwesayɛ yɛ gwambe same kwa yɛməa shɛhɛ ba'a rayɛmte ŋkwa nya mbe Ɛzhipte.

³Pa ka mene ghwɛ nyi mbe Ɛzhipte menete tsagha shɛ perə laka berete ta ghwɛa nci: pa hɛ fəakame yɛ gwambe kadzembe Ɛzhipte.

⁴Pa Farawon hekake yɛ Moyize le Aron, ma ke sha hɛ: «Səkwə mə Mahwətə kezha ŋkamte gwambe nyi ŋkɛ cakeɗake yitea ghen'yɛ le mbelia ɗa. Ma kwa sebe ta ŋkɛ ne, katepele ka Israyɛl 'ya kalə kadzeghe nda melɛ.»

⁵Ma ke Moyize zhɛnete nda: «Kazləvəa ŋa ne, sləyi və nya hi 'ya kasəkwə Shala kezha gha, kezha mbeli nyi yitea gha ba'a kezha ka Ɛzhipte, yitea zamte yɛ gwambe ŋkɛ ki ghɛa ŋa ba'a dzeyi ki yɛ ghɛ meghea ŋa. Se mɛa vəa shɛ ne, deke kwa Nil tetene hɛ.»

⁶Ma ke meghe: «Menete hendɛ.» Ma ke Moyize: «Katemene 'ya kala nya 'yɛwete na, yitea ɗepete na kaɗema kwete shala shɛ kala Shala Mahwətə ta n'yɛ.

⁷Kateshavenji yɛ gwambe ki ghɛa ŋa, ki yɛ ghɛ meghea ŋa, ki ghɛa mbeli nyi yitea gha ba'a ki ghɛa ka Ɛzhipte. Deke kwa Nil tetene hɛ.»

⁸Cape yɛ Moyize le Aron shavenji ki ghɛa Farawon. Pa Moyize səkwəte Mahwətə kezha mbele Farawon ŋkɛ va gwambe nyi sahwe nda yaka ŋkɛ le.

⁹Pa Mahwətə menete wəsə nya 'yɛwete Moyize. Pa yɛ gwambe mpənji dzeyi ki yɛ ghɛ, dzeyi te yɛ ŋwela ba'a dzeyi mbe yɛ wəve.

¹⁰Təɗəmə təɗəmə mbeli tsenete hɛ, pɛtɛ ŋkwa nya te hɛɗi kazəŋwə va hɛ.

¹¹Ma kwa nakɛ gweɗakwe ta ŋkwa Farawon, pa zhɛrete mehele ntɛaŋe ntɛaŋe kala nya gezete Mahwətə, kaɗema kese kaɓela ghena ta yɛ Moyize le Aron.

¹²Ma ke Mahwətə sha Moyize: «Gezave nda ke Aron kezha sletete geta ta ŋkɛ ŋkɛ ba'a kezha mpave hɛɗi ŋkɛ le, yitea zhɛre keləwə kaveyinze mbe Ɛzhipte pɛtɛ.»

¹³Tsagha yɛ Moyize le Aron menete: kafe Aron sha geta ta ŋkɛ, pa mpave hɛɗi. Pa keləwə zhɛrenyɛ kaveyinze nyi kepesleyi geva kənəa yɛ mbeli le wəshi keseɗa. Pa pɛtɛa keləwə zhɛrenyɛ kaveyinze mbe Ɛzhipte.

¹⁴Ntake ka mene ghwɛ nyi mbe Ɛzhipte kadzeghe ntsa yɛ veyinze laka berete ta ghwɛa nci, ama shaŋe hɛ ve. Nda hale yahale mbeli ba'a wəshi keseɗa veyinze.

¹⁵Tagha ne, ma ke ka mene ghwɛ sha Farawon: «Berete ta Shala wəsə nya!» Ama mba Farawon le mehele ntɛaŋe ntɛaŋe, kese kaɓela ghena ta yɛ Moyize le Aron kala nya gezete Mahwətə we.

¹⁶Ma ke Mahwətə sha Moyize: «Hendɛ ne, feɗeghe masheke masheke shɛ na lə sha Farawon vəa ŋkwa nya dzawa hələ ŋkɛ. Ma pa sha tegeze nda: ‹Wa nya ghena nya geze Mahwətə nya: Pelakɛ mbelia ɗa kalə kadzeghe ɗa melɛ.

¹⁷Ma keɗema na kapele hɛ kaslə ne, katefə yɛ ŋgezlere 'ya kase kadzeghəa gha, kadzeghəa mbeli nyi yitea gha, kadzeghəa mbelia ŋa ba'a kadzeghəa yɛ ghɛa ŋa. Mpɛafe tenza ghɛa ka Ɛzhipte va hɛ ba'a rayɛ tenza ŋkwa nyi mbe Ɛzhipte va hɛ.

¹⁸Ma te vecia shɛ ne, kateve hɛɗia Goshɛn nya nza mbelia ɗa te 'ya tekeleke: katenza yɛ ŋgezlere te we. Ma tsagha ne, kateɗepete na 'ya ya kaMahwətə nya te yayata ŋkwa nya te hɛɗia ŋa.

¹⁹Kateya mbelia ɗa 'ya va ndiremi nya keteɗa mbelia ŋa. Hendɛ temene geva wəsə meŋele nya.›»

²⁰Pa Mahwətə menete kala nya gezete ŋkɛ: pa yɛ ŋgezlere dzekinji ki ghɛa Farawon, ki ghɛa mbeli nyi yite ba'a dzembenji mbe Ɛzhipte pɛtɛ. Bətə ŋkwa nya te hɛɗi va hɛ.

²¹Pa Farawon hekake yɛ Moyize le Aron, ma ke sha hɛ: «Kwiɗi mə kalə kadzeghe nda melɛ ke Shala ta ŋayɛ te hɛɗi nya!»

²²Ma ke Moyize: «Ewə, kashɛ ghen'yɛ mene kala nya we, kwa nza ŋkɛ ma melɛ nya dzeghe nda nya ghen'yɛ ke Shala Mahwətə ta n'yɛ ne, wəsə nya shɛma mbeli newe ŋkɛ sha ka Ɛzhipte. Ma vəa ŋkwa nya tenakɛ n'yɛ hɛ kadzeghe melɛa shɛ ne, ashɛ hɛ katejejɛwəmte n'yɛ le pelɛ wəka?

²³Nahe ŋkɛ kehi kadzeghwa ghen'yɛ kahɛ mahekene te ɓerama, tagha tedzeghe nda melɛ ghen'yɛ ke Shala Mahwətə ta n'yɛ kala nya tegeze n'yɛ ŋkɛ.»

²⁴Ma ke Farawon: «Megela, katepele ŋayɛ 'ya kalə kadzeghe nda melɛ ke Shala Mahwətə ta ŋayɛ te ɓerama. Ama mba yɛ kelə cakeɗake, səkwə mə ghə kezha 'ya.»

²⁵Ma ke Moyize: «Shavema ta ɗa kikə ne, katesəkwə Mahwətə 'ya. Ma hendɛ ne, rakatse tenehe ŋayɛ ŋkɛ le ŋgezlere nyi, gha, mbeli nyi yitea gha ba'a mbelia ŋa. Ama mba na keghwete n'yɛ ba'a kezhɛne kafɛa ka Israyɛl kelə kadzeghe nda melɛ ke Mahwətə.»

²⁶Cape Moyize slənyɛ yitea Farawon ba'a pa səkwəte Mahwətə.

²⁷Pa Mahwətə menete wəsə nya 'yɛwete Moyize: pa ŋkamte yɛ ŋgezlere yitea Farawon, mbeli nyi yite ba'a pɛtɛa mbelia ŋkɛ. Ketene ŋgezlere ya kwetɛŋe we.

²⁸Ama tsetsenya ɓiyitsa ne, pa Farawon zhɛrete mehele ntɛaŋe ntɛaŋe ba'a ɗema pele ka Israyɛl kaslə.