Read kapsiki Job 1 Bible Online

Job 1 - kapsiki bible

Job 1

¹Nahe kwete wəndə nya nza sləa ŋkɛ kaJob kese te hɛɗia Əws. Kawəndə nya ganyɛ ba'a nya tiɗiɗi se ŋkɛ. Kahawe ŋkɛ va Shala ba'a kahwɛ va wəsə kwa ndiremi.

²Kayitenyɛa ŋwale tezhili mberefaŋe ba'a ŋwalea kwɛ mahekene se ŋkɛ.

³Timɛti 7.000, zlegweməa lɛmə 3.000, sla kewəza slibə, ŋemia kwara gwəmsə mcɛfe, ka mene slene ba'a ka kwaterashi kwele kwele ka se ve. Kawəndə nya nza zləvə te se ŋkɛ hwa pɛtɛa mbeli nyi laka ŋkwa kesame ta veci.

⁴Kevə kevə ne, kaheheka ghəa nci ŋwalea Job kezha zeme wəshi kezeme. Kaheheka ŋwalea kwɛa yiteyɛa nci hɛ kezha zeme wəshi kezeme ba'a kezha sa wəshi kesa le hɛ.

⁵Ma kiɗima ta gəsəkə ne, kaheka ŋwalea ŋkɛ Job kase kapɛ hɛ wɛŋe. Ma te hendɛ ta ŋkwa ne, kafeɗeghe ŋkɛ mba ŋkwa ba'a kadzeghe melɛ kwa tere tere kezha yayata wəndəa nci, ma ke sha ghəa ŋkɛ: «Ya kwete nahe ŋwalea ɗa kemenete jaɗafa ba'a keŋelekɛ Shala kwa wənəa nci.» Tsagha mene Job kevə kevə.

⁶Ma te kwete hɛ kwa senji ka ghwene ta Shala kadzawa kema ta Shala ne, pa Gətəli, nde ghema senyɛ hwa hɛ perə.

⁷Ma ke Mahwətə 'yɛwete: «Tema se na wa?» Ma ke Gətəli zhɛnete nda: «'Ya se kantəslə hɛɗi lema.»

⁸Ma ke Mahwətə shɛ: «Nahe na keneweve nde mene slene ta ɗa Job tse na? Wəndə shɛ kala gheŋkɛ te hɛɗi we. Wəndə nya ganyɛ ba'a nya tiɗiɗi ŋkɛ. Kahawe ŋkɛ va 'ya ba'a kahwɛ ŋkɛ va wəsə kwa ndiremi.»

⁹Ma ke Gətəli zhɛnete nda ke Mahwətə: «Gəmə hawe Job va gha pa sha ŋa ŋa na?

¹⁰Ashɛ gha ŋeyite zli yitea Job, mbeli nyi ki ghɛa ŋkɛ ba'a pɛtɛa wəshi nyi ve wəka? Nahe na kewəpikɛ yayata wəsə nya mene ŋkɛ, rayɛ ŋkwa nya te hɛɗi va wəshi keseɗa ta ŋkɛ.

¹¹Ama hake dzeve ta ŋa shɛ na kwaɗakɛ wəshi nyi ve. Ghəpə yite kateŋele ŋa ŋkɛ we!»

¹²Ma ke Mahwətə sha Gətəli: «Yewə, pɛtɛ wəshi nyi ve mbe dzeve ta ŋa. Ama dɛapema dzeve na te geva ta ŋkɛ ma.» Pa Gətəli slənyɛ kwa kema ta Mahwətə.

¹³Ma te kwete hɛ ne, ntake ŋwale tezhili ba'a ŋwalea kwɛa Job kazeme wəshi kezeme ba'a kasa wəshi kesa ki ghɛa wəndə kwelea nci.

¹⁴Pa nde ghwene se sha Job, ma ke shɛ: «Wəza yawəza sla, dzeyi vare wəve kwara lɛmə,

¹⁵nda senji ka Arab kamate te hɛ ba'a kafəhwe hɛ, kwa sebe ta ŋkɛ, pa hɛ mpəmte ka mene slene ta ŋa. Deke 'ya nde mbele kezha se kageze ŋa.»

¹⁶Ma mba wəndə nyagha kageze ghena ne, hwa'a kwete nde ghwene. Ma ke: «Nahe va ketsamte timɛti ba'a mbeli nyi keya hɛ. Pɛtɛ teremte hɛ nde. Deke 'ya nde mbele kezha se kageze ŋa.»

¹⁷Ma mba wəndə nyagha kageze ghena ne, hwa'a kwete nde ghwene. Ma ke: «Nahe wəvəsəa ka Kaldɛ mahekene kemate te zlegweməa lɛmə ba'a kefəhwe hɛ, kwa sebe ta ŋkɛ, pa hɛ mpəmte ka mene slene ta ŋa. Deke 'ya nde mbele kezha se kageze ŋa.»

¹⁸Ma mba wəndə nyagha kageze ghena ne, hwa'a kwete nde ghwene. Ma ke: «Ma mba ŋwale tezhilia ŋa ba'a ŋwalea kwɛa ŋa kazeme wəshi kezeme ba'a kasa wəshi kesa ki ghɛa wəndə kwelea nci ne,

¹⁹hwa'a sefə nya wəba se te ɓerama, ghwəpə nde ŋzlate ghɛ te hɛɗi. Kadzeghəa hɛ ŋzlanyɛ nde, mɛke mpənji hɛ. Deke 'ya nde mbele kezha se kageze ŋa.»

²⁰Pelɛhetɛme Job sate te ŋkwa. Pa ŋkɛ ŋkwahemte lekwesa ta ŋkɛ ba'a ŋsəmte ghəa ŋkɛ. Kwa sebe ta ŋkɛ, gwəɗəŋə ŋkɛ ntiŋə ghə mbe hɛɗi.

²¹Ma ke: «Mederelaŋe sawa 'ya kwa hwəa meyɛ ɗa, mederelaŋe temte 'ya. Mahwətə nde keleke, Mahwətə nde kelehwe. Hana yatsa nda 'ya ke Mahwətə.»

²²Mbe ndiremi nyi pɛtɛ ne, fete shɛ kemenete Job we. Keŋelekɛ Shala ŋkɛ we.