Read kapsiki Job 11 Bible Online

Job 11 - kapsiki bible

Job 11

¹Laŋe Sofar, nde Na'ama te ghena, ma ke sha Job:

²«Kanzanji ghena nyi pɛtɛ kaɗema zhɛne shɛ na? Kandeke nda kaganda ɗepe geze ghena ke wəndə na?

³Kaŋzlete nda mɛ ghena ganjia ŋa nyi ke mbeli na? Kaŋ'wəshikɛ mbeli na kaɗema hɛ kapəli ŋa hawe na?

⁴Ma pa na gezakawa: ‹Kaganda ghena nya geze 'ya, fete shɛ kandeke ɗa Shala we.›

⁵Yawa, ma ɗe 'ya ne, pa Shala ghwenemte mɛ ba'a gezete ŋa ghena kata kata!

⁶Ma ya nahe ŋkɛ kencɛte ŋa zeweve ntsehwele nya za ma ke yayata ɗepe wəsə ne, nza kateɗepe na kazaghə kwete bela ta fete ŋa Shala.

⁷Wərə na kaɗepete lɛamea nza ta Shala na? Wərə na kafave kwelea Nde berete na?

⁸Dzemedze ma ntsehwelea ŋkɛ ke ghweme: wa wəsə nya nza na kamenete wa? Lɛame ma ŋkɛ ke ghɛa mbelia kwahɛɗi: wa yatenza na kafave mbe wa?

⁹Biya ma ŋkɛ ke bezlea hɛɗi, bezle ma ŋkɛ ke ndərə.

¹⁰Ma kekesawa nde jaɗafa Shala kwa daŋgayɛ, ma kehekake ŋkɛ kezha meha ghwə te ne, wa nde nza kafɛake ŋkɛ wa?

¹¹Kwa nza ŋkɛ nahe Shala keɗepe ka sla tseŋwə, kazele ŋkwa nya nza fete ŋkɛ te tekwazhizhi we.

¹²Kazhɛrenyɛ gezhi kande ntsehwele ntsehwele we, nda kwara gamba kazhɛrenyɛ kakwara ghɛ.

¹³Ma gha ne, nda na kandeke nda wənəa ŋa ke Shala ba'a kasəkwəte ŋkɛ le dzeve yitea ghweme.

¹⁴Ma nda nahe na kemenete wəsə kwa ndiremi ne, zhɛnema na kamene ma, sərəma wəsə kwa beze beze na kanza ki ghɛa ŋa ma.

¹⁵Ma tsagha ne, katenza na wiɗi wiɗi le kema yitea ghweme, berete tenza na ba'a wəsə shɛ kateve ŋa ghazlənə we.

¹⁶Katezhɛne na kazəzə ndiremi nya kese te gha we, katezaghə na kala yɛmə nya kehwɛnyɛ.

¹⁷Wɛŋe ma tenza mpia ŋa ke ɓele ta ŋkwa nya nza veci talala kwa ghə, kateɓele viɗi kala waŋe ta ŋkwa masheke.

¹⁸Kategezleŋe ghə na kwa nza ŋkɛ mbele ya shɛ we. Kwa nakɛ na megela nza ta ŋa, katehɛ na kwelɛŋe.

¹⁹Ma vəa ŋkwa nya tezhɛne mpi na ne, wəndə shɛ kateghakɛ ŋa we. Ama kwele kwele mbeli nyi ketetsahe ŋa.

²⁰Ma ka 'yaghwa mehele le ŋa nci ne, leɓakwe tenza hɛ va zele kemane. Katentsate ŋkwa kewəfərə hɛ we. Ma wəsə nya neghe hɛ ne, gheŋkɛ mte.»