Read kapsiki Job 13 Bible Online

Job 13 - kapsiki bible

Job 13

¹Pɛtɛa wəshi nyi ne, nahe 'ya kenakɛ hɛ le ntsə ta ɗa, nahe sleme ta ɗa kefate hɛ ba'a nahe 'ya kefave hɛ.

²Pɛtɛa wəshi nyi ɗepe nyi yɛ ne, nahe 'ya keɗepe hɛ perə, kenza 'ya gezhi ma 'ya ke gheyɛ we.

³Ama 'ya ne, kaɗe 'ya kageze nda ghena ke Shala nde berete, 'ya kampa le yitea ghəa ɗa.

⁴Ma gheyɛ ne, ka sla tseŋwə yɛ nahe, ka la ghwɛ nyi keghwete ŋkwa yɛ.

⁵Wa nde ndeke ŋayɛ nza divə tse wa? Ma tsagha ne, katenza yɛ kentsehwele ntsehwele!

⁶Fa mə ŋgaɗe ghə ta ɗa, ve mə sleme yitea ghena nyi geze 'ya.

⁷Wərə yɛ kayakɛ ŋkwa yitea Shala le tseŋwə na? Ŋkwa yaya yɛ yite le ghena tseŋwə tse na?

⁸Kwetere wəmbəa Shala yɛ pe yɛ tse na? Ke Shala mpa nda mpa yɛ pe yɛ tse na?

⁹Ma kenewakɛ mehele ta ŋayɛ ŋkɛ ne, megela tenza ŋkɛ sha gheyɛ na? Kaghwete Shala mbeli kala nya ghwete wəndə ŋelɛ mbeli na?

¹⁰Ghəpə yite kateŋele ŋayɛ ŋkɛ va nya nza yɛ kaka nta ghala tewəfərə we!

¹¹Kadake yɛ va kwelea ŋkɛ wəka? Kabare bare yɛ va ghazlənə ve wəka?

¹²Ma ghena nyi geze yɛ ne, yipə yipə zləvəa nci le pəsəɗə, yipə yipə mehele ta ŋayɛ le ghene nya keɗema ketere.

¹³Nza mə divə kwa kema ta ɗa! Ŋa ɗa geze ghena tsetsenya! Katenewe wəsə nya ketemene ɗa geva mə.

¹⁴Ɗeke ɗeke 'ya kezha yayata wəsə, ya kezha za mpia ɗa.

¹⁵Wərə Shala kapeslekɛ ɗa, wəsə shɛ ketene va 'ya we. Ama katempa 'ya yitea ghəa ɗa kwa kema ta ŋkɛ.

¹⁶Wəsə nya kala nya nde tenza kambele ta ɗa, Kwa nza ŋkɛ ne, nde mbəɗəkwə shɛ kayɛ Shala we.

¹⁷Fa mə ghena nya geze 'ya megela, ghwene mə sleme ta ŋayɛ yitea wəshi nyi geze 'ya.

¹⁸Wa nya 'ya nya kedzete ghwə, nahe 'ya keɗepe kaɗema fete katenza va 'ya.

¹⁹Wa nde dzete ghwə le 'ya tse gɛ? Ma kenza fete va 'ya ne, kayɛ kanza divə ba'a kamte.

²⁰Shala Yawe, yakɛ ɗa deke va wəshi bake, ma tsagha ne, katewəfərə 'ya va gha we.

²¹Kelemte dzeve ta ŋa nya ɗaŋeɗa kənəa 'ya ba'a zhɛnema na kadake ɗa ma.

²²Kwa sebe ta ŋkɛ ne, geze ghena nda zhɛne ŋa 'ya, keɗema ne, geze ghena 'ya nda zhɛne ɗa na.

²³Ŋkwini fete ba'a jaɗafa nyi menete 'ya wa? Ncɛte ɗa fama ghena ta ɗa ba'a fete ta ɗa.

²⁴Wa raberə zhɛre kema ta ŋa na va 'ya ba'a kele ɗa na kala nde jaga ta ŋa wa?

²⁵Gha ɗe kakeka sleke nya kele sefə na na? Gha ɗe kakeka shekwəli nya keghwele ghwele na?

²⁶Gha karafe ghena nyi dzawe dzawe te 'ya, gha kave fete ta ɗa nyi se kawəzege kwa ghəa ɗa.

²⁷Kahwepe yɛ seɗa ta ɗa na kwa zewe lɛ, te wəshi nyi mene 'ya ntsə ta ŋa ba'a kanewe yɛ ŋkwa seɗa ta ɗa na.

²⁸Ndagwara kafehwe wəndə ŋelɛ kala sheghwə, keɗema ne, kala lekwesa nya zehwe lema.