Read kapsiki Job 14 Bible Online

Job 14 - kapsiki bible

Job 14

¹Deke wəzege nya yake male wəndə ŋelɛ. Ɓɛhwɛ temə ŋkɛ te hɛɗi ba'a kwele kwele sa yaka ŋkɛ.

²Kala ghwə ta wəfe ne, kapele ŋkɛ, kwa sebe ta ŋkɛ, katiwɛɗi ŋkɛ. Kahwɛ ŋkɛ kala shenaŋkwe nya keɗema katemə.

³Gheŋkɛ yavate ntsə na te na Shala yawe! 'Ya yakele na kadzete ghwə kala nya na?

⁴Wa nde nza kakelakave wəsə nya wɛŋe shave mbe wəsə nya wale wale wa? Wəndə shɛ we.

⁵Nahe na kedzeghete ghala ta hɛa wəndə ŋelɛ, nahe na keɓelate nza terea ŋkɛ, kazlakemte hɛ ŋkɛ we.

⁶Newema ŋkɛ na ma, sərəakɛ ŋkɛ divə, kezha kiɗimte nza ta ŋkɛ ŋkɛ kwelɛŋe, kala nde mene slene nya kekiɗi vəghwəa ŋkɛ.

⁷Zəzə ta ɗəkwə ya shɛ va wəfe: Ma kempəmte ŋkɛ mbeli ne, wərə ŋkɛ kazhɛne kaɗəkwə, kaɗema ŋkɛ pesle dzeve we.

⁸Ya yɛ slərəa ŋkɛ halenji mbe hɛɗi, ya dəŋwəa ŋkɛ nza kala kwa kemte mte mbe hɛɗi ne,

⁹wərə ŋkɛ kaɗəkwə kendɛamakɛ yɛmə ŋkɛ, wərə ŋkɛ kahate dzeve kala mɛgwɛɓɛa ta wəfe.

¹⁰Ama kemte wəndə ŋelɛ ne, rayɛ sebe te. Kawa zhɛre ŋkɛ shavema ta sefə hwe wa?

¹¹Ya kwete katekiɗi yɛmə kwa ndərə, katehasenji yɛ hələ kaɗema yɛmə kwa hɛ ne,

¹²katesame mbeli nyi kempə mpə kwa kwele we. Katefeɗeghe hɛ yitea hɛ ta nci kaɗema ghweme keza we.

¹³Kaɗe 'ya kawəfərəakɛ ɗa na kwa hɛɗi, kawəfərəakɛ ɗa na pa te vecia kiɗi ta hwepe wənəa ŋa. Tagha tegeze ɗa na te nyama və teɗe na kazəzə ɗa.

¹⁴Ama wəndə nya kemte ne, kazhɛne ŋkɛ kanza teghweme na? Ma kenza nde tsagha ŋkɛ ne, katenza ghəa ɗa gwəfə mbe vəa slene ta ɗa, pa te və nya tese kweci mbeli kadzete ŋkwa ɗa.

¹⁵Kateheka ɗa na, katezhɛne ŋa 'ya, kateɗe na kanewe ɗa, 'ya nya pate na!

¹⁶Tsetsenya ne, kaɓela yɛ ŋkwa seɗa ta ɗa na. Ama katezhɛne na kanewe jaɗafa ta ɗa we.

¹⁷Katehwepe fama ghena ta ɗa na kwa slibə, katekelemte yɛ fete ta ɗa na te wənə.

¹⁸Ndagwara kaŋzla ba'a kadase yɛ ghweme, kambembeɗe ŋkwa yɛ gela.

¹⁹Wərə yɛmə kanjiɗimte pelɛ, wərə kafəmte hɛɗi. Tsagha shɛ za sebe na te wəsə nya vate ghə wəndə ŋelɛ te.

²⁰Kanegha ŋkɛ na te hɛɗi ba'a kaslə ŋkɛ. Kabeze kema ta ŋkɛ na ba'a kaŋka ŋkɛ na.

²¹Ma kevate geva zləvə te ŋwalea ŋkɛ ne, kaɗepete ŋkɛ we. Ma kekelemte geva zləvə te hɛ ne, kafate ŋkɛ we.

²²Deke geva ta ŋkɛ nde sa yaka, deke gheŋkɛ nde ŋələvə nya ndiremi nya te.