Read kapsiki Job 16 Bible Online

Job 16 - kapsiki bible

Job 16

¹Tagha ne, ma ke Job zhɛnete:

²«Nahe 'ya kefate ghena nyi kala nyi kwele kwele. Wəsə shɛ kaketekɛ gheyɛ, gheyɛ ka gweɗakwe ɗa wənə nyi.

³Hweŋkwa tetereke ghena kwada nyi wa? Wa nde tsəkwə ŋa kazhɛne ghena kala nya wa?

⁴Ma ya te ŋkwa ŋayɛ 'ya ba'a te ŋa ɗa yɛ ne, nza wərə 'ya kageze ghena kala gheyɛ. Katempa 'ya le gheyɛ le ghena ganji, kategagəzə ghə 'ya kaŋ'wəshi ŋayɛ.

⁵Katemtsehe ŋayɛ berete 'ya le ghena ta ɗa, katefɛa 'ya yitea gweɗakwe ŋayɛ wənə le ghena we.

⁶Ma kenza 'ya kageze ghena ne, kagweɗakwe yaka ta ɗa we, ma kenza ɗa 'ya divə ne, kakiɗi nde we.

⁷Ama tsetsenya ne, nahe Shala kedenemte ɗa, nahe ŋkɛ kezamte sebe te mbeli nyi dzeyi yitea 'ya.

⁸Gerese nyi betate na te 'ya ya kaka ve ɗa fete, pahe ta ɗa nde va ɗa fete ba'a nde ve ɗa kande jaɗafa.

⁹Kaslekwe ɗa Shala mbe hwepe ta wənəa ŋkɛ, kanca slene ŋkɛ kwa sebe ta ɗa. Kaghwərəzlə ɗa ŋkɛ, gheŋkɛ nya kande ghema ta ɗa.

¹⁰Kaghwene mɛ mbeli kezha ŋwafe ɗa ghena, kampa ɗa hɛ le balema ba'a kaŋele ɗa hɛ, katsene geva hɛ yitea 'ya.

¹¹Nahe Shala kendeke nda ɗa ke ka mefətekwəa ŋwale, nahe ŋkɛ keveyi ɗa mbe dzeve ta ka ndiremia mehele.

¹²Gwezlayɛ se nza ta ɗa, ama pa Shala se katsəkwəte ɗa, pa keseve ɗa yitea ghə kezha ɓele welɛ te 'ya ba'a pa veyi ɗa kawəsə keɗeke le yɛ have ta ŋkɛ.

¹³Kahe ɗa yɛ have ta ŋkɛ shave mbe yayata bela. Kampahwe yɛ ghwelese ta ɗa ŋkɛ kwa zhɛma heli ba'a kahwɛ ɗawa ta ɗa kadzete hɛɗi.

¹⁴Kame ŋkɛ te 'ya kala sewajɛ, kampa ɗa ŋkɛ ba'a kaɗeɗa ɗa ŋkɛ le zhi.

¹⁵Le zewe nza 'ya hwa hwə keveci keveci, kanjitə kema ta ɗa 'ya mbe hɛɗi.

¹⁶Ghɛmɛ ntsə kwa ghə va 'ya va nehwene, ngərə ngərə zhɛne 'ya kanewe ŋkwa.

¹⁷Ndagwara kegha 'ya kamenete berete we, le wənə nya wɛŋe se 'ya kasəkwə ghə.

¹⁸Hɛɗi, zhiɓəma geva na kənəa mimia ɗa ma, fa lewela ta ɗa mbeli te yayata ŋkwa.

¹⁹Tsetsenya nya ne, nde negha fete ta ɗa ya shɛ pelɛ ghweme, kaganda ne, nde sla ɗa fete ya shɛ pelɛagha.

²⁰Kaŋ'wəshi ɗa ka mcɛhɛ ɗa, ama ke Shala nehwene nda nehwene 'ya.

²¹Newe ghena nya kwelɛ ghen'yɛ le Shala nde negha fete ta ɗa, kala nya wəndə ŋelɛ kaya kwete wəndəa ŋkɛ.

²²Kaganda ne, tene vəa ɗa ɓɛhwɛ te hɛɗi, 'ya katekele hweŋkwa nya ɗema zhɛne geva kase kwa.»