Read kapsiki Job 26 Bible Online

Job 26 - kapsiki bible

Job 26

¹Tagha ne, ma ke Job zhɛnete nda ke Bildad:

²«Yawa, nahe na keɗepe kemane nde dewə ŋeli, wəndə nya ɗema berete ve deŋwa!

³Yawa, nahe na keɗepe ncɛ nda ghena ke nde dewə ntsehwele ba'a teke wəsə nya ɗepe na ke mbeli deŋwa!

⁴Ke wa geze nda ghena nyi na tse wa? Wa nde ndeke ŋa berete kegeze ghena nyi wa?

⁵Kabare bare mbelia kwahɛɗi va ghazlənə kwa zeweve ta ndərə ba'a wəshi nyi kwa.

⁶Kwa nza ŋkɛ ne, darahwe ghɛa mbelia kwahɛɗi kwa kema ta Shala, wəsə shɛ kewəfərəakɛ ŋkɛ kwa ntsə ta ŋkɛ we.

⁷Shala nde pelakeyi ghweme te ŋkwa nya shalala, gheŋkɛ nde ghereŋeyi hɛɗi kənəa ŋkwa nya ɗema wəsə te.

⁸Gheŋkɛ nde tseneyi yɛ yɛmə mbe ləmbə ba'a nde fɛake ləmbə kawəteslə va ɗaŋeɗa ta nci.

⁹Gheŋkɛ nde dəpəmte kema ta pasla ta ŋkɛ, gheŋkɛ nde dəpə meləkwə ləkwə kənə.

¹⁰Pa ŋkɛ rahete ŋkwa taghele ghele kənəa ndərə nya wəba, te ŋkwa nya ŋkamte ŋkwesle waŋe.

¹¹Ma kwa ŋgezle Shala ne, kagaŋkəɗə yɛ seləa ghweme, kabare bare ghweme va ghazlənə.

¹²Laka berete ta ŋkɛ perawemte ndərə nya wəba Shala, laka ɗepe wəsə ta ŋkɛ mberɛɗɛmte shishi nya wəba kwa ndərə ŋkɛ.

¹³Nahe zhɛne mpi ta ŋkɛ ketsalemte ghweme, nahe dzeve ta ŋkɛ kempahwemte shishi nya wəba, mɓɛa nya kehwɛ.

¹⁴Wəshi nyi pɛtɛ ne, mɛ nya te wəshi nyi menete ŋkɛ hɛ, deke gaka ta wəshi nyi ɓɛhwɛ ɓɛhwɛ yafate mə. Ama ghwəghwə ta wəshi nyi jama jama ne, wa nde nza kafate wa?»