Read kapsiki Job 28 Bible Online

Job 28 - kapsiki bible

Job 28

¹Kaganda ne, ŋkwa nya la mze kwa tɛawetɛa mbeli te ba'a nya zhɛre mze kwa tere tere mbeli wɛŋe te ya shɛ.

²Ma lɛ le ŋa ŋkɛ ne, shave mbe hɛɗi mene mbeli, kezha kemave mze kwa gheme ne, gela yatere mbeli.

³Kakele waŋe ka la mze kadzawa hɛɗi, hwa'a kwa zeweve ta hɛɗi dzawa hɛ kazele pelɛ nyi tewəfərə mbe ŋkwesle.

⁴Kala ghɛ hɛ dzawa mbe hɛɗi cakeɗake le ŋkwa nya nza mbeli. Te ŋkwa nya ɗema mbeli kadzeghwa ne, ŋeŋalawe ka la mze te zewe, jive mbeke, jive mbeke, cakeɗake le mbeli.

⁵Shave mbe hɛɗi shave wəshi kezeme, ama ŋkwa nya mbe hwəa ŋkɛ ne, kebeze beze kala wəsə va ghwə.

⁶Mbe yɛ gela ta ŋkɛ nza pelɛ kwa lɛa lɛa ghweme, mbea shɛ nza hə ta mze kwa tere tere.

⁷Keɗepe hweŋkwa nya kedzawa mbe hɛɗia shɛ zele we, kegha ntsə ta zleŋa kanakɛ ŋkɛ we.

⁸Kegha wəshi keseɗa nyi hwa gamba kadzeghwa kwa we, kegha nivɛrə kadzeghwa kwa we.

⁹Ama kampə gela nya ntɛaŋentɛa wəndə ŋelɛ, katsəhwə ghweme ŋkɛ pa te shihə.

¹⁰Dzeyi mbe gela ne, kalela ghɛa ŋkɛ, kanewe wəshi nyi nza zləvə te ŋkɛ le ntsə ta ŋkɛ.

¹¹Kazhiɓə ntsə ta yɛmə ŋkɛ ba'a kancɛ wəsə nya tewəfərə ŋkɛ.

¹²Ama ntsehwele ne, tema kema mbeli wa? Tema ŋkwa kenza ta ɗepe wəshi wa?

¹³Kaɗepete səkəməa ŋkɛ wəndə ŋelɛ we, kakemave ŋkɛ mbeli te hɛɗia mbeli nyi teghweme we.

¹⁴Ma ke ndərə nya wəba sha geze: «Kwa 'ya ŋkɛ we.» Ma ke ndərə le ŋa ŋkɛ: «Kwa 'ya ŋkɛ we.»

¹⁵Kambeɗe geva ŋkɛ te hwa ta mze kwa tere tere we, kapave geva ŋkɛ te mze kwa tɛawetɛa kwele kwele we.

¹⁶Zləvə ma te ke mze kwa tere tere nya wɛŋe, ya pelɛ kwa gheme, ya pelɛ kwa lɛa lɛa ghweme.

¹⁷Ya mze kwa tere tere keɗema deraŋgale ne, kayipəte geva le səkəməa ŋkɛ we. Kambeɗeve geva ŋkɛ te kwenə mze kwa tere tere nya wɛŋe we.

¹⁸Wa nde geze ghena ta yɛ pelɛ kwa ghɛmɛ le kwalaba nya slɛfeslɛ gɛ! Za ma zləvə te ntsehwele ke wəshi kepesa geva.

¹⁹Zləvə ma te ke pelɛ kwa rəghwə rəghwə. Ya mze kwa tere tere nya wɛŋe ne, kayipəte geva le we.

²⁰Ama ntsehwele ne, tema se ŋkɛ wa? Tema ŋkwa kenza ta ɗepe wəshi tse wa?

²¹Nahe ŋkɛ kewəfərənyɛ va ntsə ta mbeli nyi teghweme, kanakɛ ŋkɛ 'yɛ nyi kezlə yitea ghweme we.

²²Ma ke mte ba'a ghɛa mbelia kwahɛɗi sha geze: «Kaganda ne, nahe sleme ta n'yɛ kegha kafa zləvəa ŋkɛ.»

²³Ama Shala nde ɗepe hweŋkwa ta ŋkɛ, deke gheŋkɛ nde ɗepe ŋkwa nya nza ŋkɛ te.

²⁴Kwa nza ŋkɛ pa te mendɛkwe ta hɛɗi newe ŋkwa ntsə ta ŋkɛ, pɛtɛ newe wəshi nyi kwake te hɛɗi ŋkɛ.

²⁵Kwa nza ŋkɛ ne, gheŋkɛ nde dzeghete ɗaŋeɗa ta sefə, nde dzeghete wəba ta yɛmə,

²⁶gheŋkɛ nde dzeghete ghala ta va nya keme, nde pelave nda hweŋkwa ke gaka ta va.

²⁷Vəa ŋkwa shɛ nakɛ ntsehwele Shala ba'a mareve ŋkɛ. Pa ŋkɛ neweve ŋkɛ ba'a dzeghete zləvəa ŋkɛ.

²⁸Kwa sebe ta ŋkɛ, ma ke sha wəndə ŋelɛ: «Hawe va Mahwətə ne, gheŋkɛ ya kantsehwele! Hwɛ va wəsə kwa ndiremi ne, gheŋkɛ ya kaɗepe wəshi!»