Read kapsiki Job 3 Bible Online

Job 3 - kapsiki bible

Job 3

¹Kwa sebe ta ŋkɛ ne, ntake Job kageze ghena ba'a kabezla veci nya ya ŋkɛ te.

²Wa nya ghena nya gezete ŋkɛ nya:

³«Awema! Kaɗe 'ya kazanyɛ veci nya ya 'ya te ba'a viɗi nya kegezete: ‹Wəzege teza ya kwa hwə› ke.

⁴Nza vecia shɛ kavecia ŋkwesle! Mba Shala nya pelɛ ghweme keve ntsə te! Mba ŋkwa kenza waŋe te vecia shɛ!

⁵Nza nde dibə dibə mbe ŋkwesle, zhiɓəyi geva ləmbə nya ɗɛkeɗɛ kənə keɗema menete geva viɗi veci talala veci kwa ghə!

⁶Ma viɗia shɛ ne, nza nde dibə dibə, mba nde keɓela geva hwa hɛ nyi mbe va, mba nde kedzehwa ɓela ta yɛ tere!

⁷Kaganda ne, nza viɗia shɛ kajɛŋa, yagha gaghwe kanza te viɗia shɛ!

⁸Bezlakɛ viɗia shɛ mbeli nyi kebezla hɛ, ka ɗepemte feɗeghe mɓɛa.

⁹Zanji saseregwa nyi kekiɗi nda ŋkwa! Nza nde leɓakwe va neghe waŋea veci! Ɗema nde nakɛ wakaka ta zeweve ta ghweme!

¹⁰Kwa ɗema ŋkɛ kezhiɓəte hwə nya sawa 'ya kwa, pa sərəakɛ ɗa kasa yaka nya ɓeshi.

¹¹Va wa ɗema 'ya kemte ɗa kwa hwə ɗa 'ya tse wa? Va wa ɗema 'ya lɛshe ɗa sawama ta ɗa kwa hwə wa?

¹²Wa raberə kemaneve ɗa nza kwa seɗa wa? Yitea wa kelete ɗa meyɛ ɗa le ŋ'wa ta nta wa?

¹³Nza gwezlayɛ tenza 'ya ɓeshi nya kwa kwele ta ɗa, kahɛ hɛ ta ɗa ba'a kazhɛne mpia ɗa

¹⁴zlaɓe le ka meghea kɛfi ba'a ka sleke hɛɗi, mbeli nyi keŋate ŋkwa nyi kakwəfi nyi,

¹⁵keɗema zlaɓe le mbeli nyi te ghə nyi nza mze kwa tere tere va hɛ, mbeli nyi keviɗikɛ ghɛa nci le wəshi nyi le mze kwa tɛawetɛa,

¹⁶keɗema kaɗema 'ya shɛ teghweme, kala ŋwale nyi keya kempə mpə kaɗema kenakɛ waŋe.

¹⁷Ma kwa kwele ne, kasa nda yaka ka 'yaghwa mehele ke mbeli we, ma ka dewə ŋeli ne, mpi yazhɛne hɛ.

¹⁸Ma kwagha ne, gwezlayɛ nzanji pɛtɛa ka daŋgayɛ, kazhɛne hɛ kafa ŋwələa nde ya ŋkwa we.

¹⁹Ghala kwelɛ yɛ ŋwale le mbelia jama we, waɗe nza mava va wəndə nya kesleke ŋkɛ.

²⁰Va wa ndeke nda waŋe ŋkɛ ke mbeli nyi kesa yaka wa? Va wa ndeke nda mpi ŋkɛ ke ka yirə yirəa mehele wa?

²¹Kaneghe mte hɛ, ama kase ŋkɛ we. Kazele ŋkɛ hɛ za ma ke mcɛlə.

²²Nza katezlama hɛ kwele kwele ba'a katewetse hɛ ketedzawa kwele hɛ.

²³Wəndə nya keɗepema ŋkwa nya lə ŋkɛ te 'ya, nahe Shala keŋzlete kala wəsə nya kwa zli.

²⁴Deke ŋələvə ya kaɗafa kezeme ta ɗa, kala ghwa hwɛ nehwene ta ɗa.

²⁵Ma wəsə nya ghazlənə 'ya ve ne, gheŋkɛ nde mene ɗa geva. Wəsə nya gezleŋe ghə 'ya ve ne, gheŋkɛ nde se ɗa se.

²⁶Nza gweɗakwe ba'a nza kwelɛŋe shɛ va 'ya we. Zhɛne mpi va 'ya we: ketaze taze mehele ta ɗa.»