Read kapsiki Job 31 Bible Online

Job 31 - kapsiki bible

Job 31

¹Nahe ghen'yɛ ketsahwe ghena le ntsə ta ɗa kezha ɗema kasla ntsə yitea degheli.

²Nza wa yatemene ɗa Shala sawa pelɛ ghweme wa? Nza tsema temene ɗa Nde berete sawa pelɛagha wa?

³Ashɛ kezha nde mene fete ndiremi ba'a kezha ka ndiremia mehele ɗa wəka?

⁴Ashɛ Shala kanewe nza ta dzeghwa ta ɗa wəka? Ashɛ ŋkɛ kaɓela pɛtɛa ŋkeɗe ta seɗa ta ɗa wəka?

⁵Tseŋwə yasla 'ya ghalanza na? Mbəɗəkwə yantsə geva seɗa ta ɗa kalə kamene na?

⁶Mehate ghwə nya kaganda Shala te 'ya! Tagha ne, kateɗepe ŋkɛ kaɗema fete va 'ya.

⁷Ma ya nahe seɗa ta ɗa kesamenji kwa hweŋkwa ganyɛ, ma ya nahe wənəa ɗa kezelete ɗe ta ntsə ta ɗa, ma ya nahe dzeve ta ɗa kemenete wəshi nyi wale wale ne,

⁸zehwe wəshi nyi wəzate 'ya kwete wəndə tsagha, keɗema nteɗate geva wəshi kwatepese ta ɗa te hɛɗi!

⁹Ma ya nahe kwete male kegha kaghwetete ɗa, ma ya nahe 'ya kese kawəmbə degha ta nde ghedəkwəa ɗa ne,

¹⁰nza male ta ɗa kakwa hə nda hə ke kwete wəndə ba'a ɓeɓelahe kweci mbeli le!

¹¹Kwa nza ŋkɛ ne, fete nya wəba yamenete 'ya, fete nya hi nde meha ghwə kaɗa ɗa te.

¹²Nza kaghwə nya ketetere ɗa hɛmɗɛke ɗɛke ba'a nya keteza sebe te wəshia ɗa tenza fete ta ɗa.

¹³Ma ya nahe 'ya kezehwe berete ta nde mene slene ta ɗa keɗema ŋa kwatera vəa ŋkwa nya nza ghena kwelɛ 'ya le hɛ ne,

¹⁴nza tsema mene 'ya vəa ŋkwa nya tesate Shala te ŋkwa wa? Tsema tezhɛne nda 'ya vəa ŋkwa nya te'yɛwe ghena ŋkɛ va 'ya wa?

¹⁵Kwa nza ŋkɛ Shala nya kwetɛŋe nde pate n'yɛ, 'ya le hɛ, kwa hwəa meyɛ n'yɛ.

¹⁶Nahe 'ya kegha kaŋkate nda wəsə ke ka titikwəa kɛfi na? Nahe 'ya kegha kasərəakɛ ka wedidi mbe yaka na?

¹⁷Nahe 'ya kegha kazehwe wəsə kezeme kwetɛŋe ɗa, kaɗema mezhɛte kekemave na?

¹⁸Ama se kawəzege 'ya ne, nahe ŋkɛ kekele yitea 'ya kala wəzege yitea yita. Sawama ta ɗa kwa hwəa va meyɛ ɗa ne, kande ncɛ nda ghena ke wede se 'ya.

¹⁹Nahe 'ya kese kasərə wəndə nya ɗema lekwesa ve, nde titikwə nya ɗema gwada ve na?

²⁰Ama ne, lekwesa ntasle nya tsate mbeli le shintia təmə yanta nda 'ya ke hɛ, ba'a ne, katsa ɗa hana hɛ.

²¹Ma ya nahe 'ya kese kaɗa mezhɛte, va nya ɗepe 'ya kaɗema ka meha ghwə kave ɗa fete ne,

²²ndaɗenyɛ paslɛ paslɛa ta ɗa seyi vare geva ba'a ɓelenyɛ dzeve ta ɗa kwelɛ fegwele.

²³Kaganda ne, kaghazlənə 'ya kwele kwele va ɗa ta Shala, wəsə shɛ kamenete 'ya kwa kema ta kwelea ŋkɛ we.

²⁴Ma ya nahe 'ya kese kave ghə te mze kwa tere tere, ma ya nahe 'ya kese kageze sha mze nya nza zləvə te: «Gha ya kanza ta ɗa gwezlayɛ» a 'ya,

²⁵ma ya nahe 'ya kese kazlama te kwelea wəshia ɗa, te mcɛlə nyi kemave dzeve ta ɗa,

²⁶ma ya nahe 'ya kese kanewe veci kaɓele ba'a ndeɗea dzeghwa ta tere,

²⁷ma ya nahe wənəa ɗa kese kaghwete geva tewəfərə ba'a ma ya nahe 'ya kezhɛrete hɛ kashala keɗema kese kahawe va hɛ ne,

²⁸nza kafete nya kekese ɗa te ghwə nza nde, kwa nza ŋkɛ nahe 'ya keɗema Shala nya ghweme.

²⁹Nahe 'ya kese kazlama vəa ŋkwa nya nza yaka te nde jaga ta ɗa na? Nahe 'ya kese kampereke va farefa vəa ŋkwa nya me ndiremi te na?

³⁰Kepelave nda 'ya ke mɛa ɗa kamene jaɗafa laka bezla nda mte we.

³¹Ma ke ka mentiɓəa slia ɗa sha geze: «Wa nde behema va slia ŋa wa?»

³²Kegha nde se se kahɛ pelɛ te ŋwela we, teghwene se degha ta ɗa kaŋa mbeli nyi kedzeghwa.

³³Kala Adam ne, nahe 'ya kewəfərəakɛ fete ta ɗa, kewəmbəyi beze ghena ta ɗa kwa slibəa ɗa na?

³⁴Kegha 'ya kaghazlənə va ghena ta kweci mbeli we. Wərə hɛ kaŋ'wəshi ɗa, ama kegha 'ya kadake we, kegha kaŋzlete ɗa mɛ, ya kafɛake ɗa keshave te ŋwela we.

³⁵Wa nde nza kandeke ɗa wəndə nya kefa ɗa ghena tse wa? Nya ya kakwa keɗaŋe ta ghena ta ɗa gɛ! Va Nde berete ŋkɛ kezha zhɛne ɗa gɛ! Ma kaŋa palepa ta ve ɗa fete nya rafete nde jaga ta ɗa ne,

³⁶katekele ŋkɛ 'ya le farefa te bazla ta ɗa, kateve ŋkɛ 'ya mbe ghəa ɗa kala derə meghe.

³⁷Kateɓela yɛ ŋkeɗe ta seɗa ta ɗa 'ya ke Shala, katehende nda geva 'ya kala wəndə nya te ghə.

³⁸Ma ya nahe yɛ wəvea ɗa kese kanehwene va 'ya, ma ya nahe yɛ ndəgə nyi mbe hɛ kese kabete nehwene,

³⁹ma ya nahe 'ya kezehwe wəshi nyi kese mbe hɛ gəmə, ma ya nahe 'ya kezehwe hwələa ka mene slene mbe hɛ ne,

⁴⁰pesete geva yɛ tigə te ŋkwa ha, pesete geva yɛ tigə kwara te ŋkwa megi. Teke keɗaŋe ghena ta Job.