Read kapsiki Job 32 Bible Online

Job 32 - kapsiki bible

Job 32

¹Tagha ne, pa Ɛlifaz, Bildad ba'a Sofar nzanji kezhɛne nda ghena ke Job, va nya veyi ghəa ŋkɛ ŋkɛ kawəndə nya tiɗiɗi.

²Ama mɓɛke Ɛlihəw hwepete wənə. Wəzege ta Barakɛl nya mbe hwelefe ta Bəwz, kwa yita ta Ram ŋkɛ. Va Job hwepete wənə ŋkɛ, va nya veyi ghəa ŋkɛ ŋkɛ tiɗiɗi ma ke Shala.

³Mɓɛke hwepete wənə ɓiyitsa va ka mcɛhɛ nyi mahekene nyi, va nya ɗema kwete ghena hɛ kazhɛne nda ke Job. Tsagha ne, nahe hɛ kendeke nda fete ke Shala.

⁴Pa Ɛlihəw nzanyɛ kegeze ghena, va nya nza kweci mbeli nyi ntsə ma ke gheŋkɛ.

⁵Ama kwa nakɛ Ɛlihəw kaɗema ghena kezhɛne mba kwa mɛa mbeli nyi mahekene nyi ne, mɓɛke hwepete wənə.

⁶Laŋe Ɛlihəw, wəzege ta Barakɛl nya mbe hwelefe ta Bəwz te ghena, ma ke: «Mempɛhweta 'ya hwa gheyɛ, ama gheyɛ ne, mbelia jama yɛ. Vatse zhɛte ɗa ghazlənə kencɛ ŋayɛ ɗepe wəsəa ɗa.

⁷Ma 'ya mbe ghəa ɗa: ‹Ŋa mbelia jama geze ghena, ŋa mbeli nyi kentsə ntsə teke nda ntsehwele ke mbeli.›

⁸Kaganda ne, sefəa Shala, zhɛne mpi ta Nde berete nde ve nda ntsehwele ke wəndə.

⁹Kandeke nda ntsehwele nza kande ntsə ntsə ke wəndə we, kandeke nda ɗepe wəsə nya tiɗiɗi nza kande hale hale ke wəndə we.

¹⁰Vatse nda geze ŋayɛ 'ya kafa ɗa ŋa ɗa: 'ya katencɛ ŋayɛ ɗepe wəsəa ɗa perə.

¹¹Nahe 'ya kefamte ghena ta ŋayɛ, nahe 'ya keveyite sleme yitea zəzə ta ŋayɛ, vəa ŋkwa nya zele ghena kegeze yɛ.

¹²Nahe 'ya kefate ghena ta ŋayɛ tsape tsape, ama wəndə shɛ hwa gheyɛ kezhɛnete nda ghena ke Job we, wəndə shɛ kendɛkwete nda ghena nyi geze ŋkɛ we.

¹³Gezema yɛ: ‹Nya ghena ntsehwele nya: Deke Shala nde nza kandɛkwete ŋkɛ, ama wəndə ŋelɛ we›, pe yɛ ma.

¹⁴Ke 'ya gezete ɗa ghena ta ŋkɛ Job we. Kala zhɛne ta ŋayɛ tezhɛne nda ghena 'ya we.

¹⁵Kwerɗake ɗake yɛ keta ta, mba ghena kegeze va gheyɛ we, ndɛkwe ghena kwa mɛa ŋayɛ.

¹⁶Kwele kwele temə 'ya kaneghe. Ama kwa ɗema yɛ mba kageze ghena, kwa ndɛkwe ŋayɛ yɛ ne,

¹⁷'ya kategeze ŋa ɗa ghena, 'ya katencɛ wəsə nya ɗepe 'ya, 'ya perə.

¹⁸Kwele kwele ghena va 'ya kageze, kwete wəsə ya mbe 'ya kave geze ghena.

¹⁹Kawepe ŋkwa nya kwa hwəa ɗa kala tɛ nya kemesle mesle nya kezele kawətətsə slibə hweta mɛnɛfɛ.

²⁰Pelakɛ ɗa mə kageze ghena, katepele geva ta ɗa. Kateghwene mɛ 'ya ba'a katezhɛne ghena 'ya.

²¹Kateŋzla 'ya kwa ghena ta wəndə we. Kategwəfə nda ghə 'ya ke kwete wəndə ŋayɛ we.

²²Bandanyɛ ne, keɗepe gwəfə nda ghə 'ya ke wəndə le ghena we, ma nda tsagha mene 'ya ŋkɛ ne, nza nahe Nde pate ɗa kezamte ɗa kahe kahe.»